کابل چاپ ورځپاڼو په خپلو نننیو ګڼو کې بیا هم د افغانستان د سولې په ځانګړي ډول په دې اړه د افغانستان لپاره د روسیې د ځانګړي استازي د وروستیو څرګندونو په اړه یو شمېر مطالب چاپ کړي دي.
- مسیر
مسیر خپلواکې ورځپاڼې پهدې اړه په خپله سرمقاله کې لیکلي، کابلوف د سولې لاره ښيي، که امریکا ته ګواښ کوي؟
په سرمقاله کې وړاندې راغلي، د افغانستان لپاره د روسیې ځانګړي استازي ضمیر کابلوف ویلي چې امریکا دې یا له طالبانو سره د سولې مخامخ خبرو ته حاضر شي او یا دې هم په افغانستان کې روانې ناپایه جګړې ته تیار شي.
ورځپاڼې لیکلي:
کابلوف دا هم ویلي چې طالبان د افغانستان پر ۴۰ سلنه خاوره واکمن دي، له افغان حکومت سره د سولې خبرې نهکوي او غواړي چې له امریکا سره مخامخ د سولې خبرې وکړي.
سرمقاله لیکونکي پوښتنه مطرح کړې چې د روسیې دا دریځ څه معنی ورکوي؟ ضمیر کابلوف د سولې لار ښيي او که ګواښ کوي؟
- سرخط
سرخط خپلواکې ورځپاڼې هم په همدې اړه په خپله سرمقاله کې لیکلي دي.
سرخط لیکي، روسیه غواړي پهدې توګه اوبه خړې او ځان ته کبان ونیسي.
روسیه غواړي پهدې توګه له افغانستانه د پخواني شوروي اتحاد د ماتې ټس واخلي.
په سرمقاله کې راغلي، کابلوف په دا ډول څرګندونو سره غواړي چې طالبان پیاوړي وښيي او د افغان ځواکونو روحیه کمزورې کړي.
ورځپاڼې دا هم لیکلي چې روسیه غواړي پهدې توګه له افغانستانه د پخواني شوروي اتحاد د ماتې ټس واخلي، دوی نوې نیابتي جګړه پیلوي او یوازنی هدفیې افغان دولت ته د ستونزو پیدا کول او د امریکا لاس له دغه هېواده لنډول دي.
د سرمقاله لیکونکي په باور په داسې یو حالت کې د افغانستان د بهرنیو چارو او دفاع وزارتونه باید له روسي ډیپلوماتانو او د هغه هېواد له سیاسي او پوځي چارواکو سره د دوی د بېبنسټه څرګندونو په اړه خبرې وکړي.
- هېواد
هېواد دولتي ورځپاڼې هم پهدې اړه په خپله نننۍ ګڼه کې لیکلي دي.
هېواد د کابلوف د څرګندونو په اړه د ولسي جرګې د یو شمېر غړو او افغان سیاسي کارپوهانو غبرګونونه راخیستي چې پهکې راغلي روسیه هڅه کوي امریکایان په افغانستان کې له ماتې سره مخ شي، نو ځکه له وسلهوالو طالبانو سره مرسته کوي.
هېواد د دغو کسانو په حواله دا هم لیکلي چې افغان حکومت باید زیار وباسي چې خپل نړیوال متحدین د سولې په پروسه کې لازمو او جدي هڅو ته تشویق کړي.
- افغانستان ما
خو افغانستان ما خپلواکې ورځپاڼې بیا د خپلې نننۍ ګنې په یو مطلب کې د سولې د یو کنفرانس د جوړېدو په اړه د افغانستان او پاکستان د هوکړې خبره کړې ده.
په مطلب کې د پاکستاني رسنیو په حواله راغلي چې دا کنفرانس به د افغانستان او پاکستان د دیني عالمانو ترمنځ وي چې هدفیې له طالبانو سره د کابل د سولې د خبرو د پیل لپاره د زمینو برابرول دي.
خو په مطلب کې د دغه کنفرانس د جوړېدو دقیقه نېټه نهده ښودل شوې.