اروپايي ټولنه، جرمني، بریتانيا او روسيه وايي، له ايران سره اټمي موافقه بايد خوندي شي.
وروسته له هغه چې د امریکا او فرانسې مشرانو له ايران سره د یوې نوې موافقې غوښتنه وکړه، د اروپايي اتحاديې د بهرني سیاست او امنیتي چارو لوړپوړې استازې فدریکا موګرېني وويل، له ايران سره اوسنۍ اټمي موافقه اټمي وسلو ته د دې هېواد د لاسرسي په مخنیوي کې اغېزمنه ثابته شوې، نو باید لغوه نهشي.
ايران هېڅکله باید هېڅ ډول اټمي وسله ونهلري.
د امریکا ولسمشر ډونالد ټرمپ او د فرانسې ولسمشر امانوئل مکرون د اپرېل په ۲۴مه نېټه په سپينه ماڼۍ کې له لیدو وروسته وويل، دوی غواړي چې باید له ايران سره د يوې نوې موافقې په اړه مذاکرات وشي چې د ۲۰۱۵ میلادي کال تر موافقې پراخه وي او سيمهیيزې اندېښنې پهکې په نظر کې ونيول شي.
د فرانسې ولسمشر امانوئل مکرون د اپرېل په ۲۵مه نېټه د امریکا کانګرس دواړو جرګو ته په وينا کې وويل:
"د ايران په اړه مو هدف واضح دی. ايران هېڅکله باید هېڅ ډول اټمي وسله ونهلري، نه اوس، نه په راتلونکو پنځو کلونو کې او نه په راتلونکو ۱۰ کلونو کې هېڅکله نه."
د اروپايي ټولنې د بهرنۍ پالېسۍ رئيسې فدریکا موګرېني په بروکسل کې د اپرېل په ۲۵مه نېټه د سوريې لپاره د مرستندويانو په کنفرانس کې د وينا پر مهال وويل، هغه څه چې په راتلونکي کې کېږي، هغه به بيا ووينو.
اوسمهال يو موافقهلیک شته بايد خوندي وساتل شي.
امریکا، بریتانيې، فرانسې، روسیې او چین په ۲۰۱۵ میلادي کال کې له ايران سره اټمي موافقه لاسلیک کړه.
د ايران پر وړاندې د اقتصادي بنديزونو د لیرې کولو په بدل کې دا هېواد مکلف دی چې خپل اټمي پروګرام محدود کړي.
ايران وايي، نهغواړي اټمي وسلې جوړې کړي.
د امریکا ولسمشر ډونالد ټرمپ د دې موافقې لاسليک کوونکو اروپايي متحدانو ته د مې مياشتې تر ۱۲مې نېټې وخت ورکړی چې په ياده موافقه کې اصلاحات راولي، که نه ده ویلي چې امریکا به له لهدې موافقې ووځي.
ده تهديد کړی چې که دا کار ونهشي، د ايران پر وړاندې به د امریکا ټول بنديزونه عملي شي.
د جرمني د بهرنيو چارو وزير هایکو ماس ويلي، موږ غواړو دا موافقه پاتې شي او غواړو له امریکا سره مرسته وکړو چې د مې مياشتې تر ۱۲مې نېټې وروسته هم دا موافقه پاتې شي.
د ایران اټمي پروګرام د اټمي وسلو د جوړولو په هدف نهدی.
د بریتانيا د حکومت يوه وياند ويلي، له ايران سره اټمي موافقه د ۱۳ کلونو د ډیپلوماتيکو هڅو نتيجه ده.
د کرملېن ویاند ویلي چې د ایران او نړۍ د سترو قدرتونو ترمنځ د اټمي تړون بل بدیل نهشته او دغه تړون باید د ټولو هغو اړخونو لهخوا مراعات شي چې لاسلیک کړی یې دی.
دمیتري پسکوف د دوشنبې په ورځ ویلي و:
"روسیه په کلکه د ایران د تړون د دوام غوښتنه کوي. موږ باور لرو چې د هغې بدیل نهشته او باید د ټولو اړخونو لهخوا یې درناوی وشي."
بلخوا د ايران ولسمشر حسن روحاني پر امریکا انتقاد کړی او ويلي يې دي چې د امریکا ولسمشر په نړيوالو سياسي او حقوقي موافقهلیکونو کې هېڅ ډول تجربه نهلري.
ايران ټينګار کوي چې د دې هېواد اټمي پروګرام د اټمي وسلو د جوړولو په هدف نهدی او که اټمي موافقه ناکامه شي، خپل اټمي پروګرام به بېرته پيل او پراخ کړي.
