د افغانستان د اوبو او انرژۍ او يو شمېر خصوصي شرکتونو ترمنځ په کندهار، هرات او بغلان کې د ۴۶۰ میلیونه ډالرو په ارزښت د برېښنا د تولید د درېیو پروژو تړونونه په اجرائیه ریاست کې لاسلیک شول.
د افغان حکومت اجرائیه رئیس عبدالله عبدالله د دغو تړونونو د لاسلیک مراسمو ته په وینا کې د اوبو او انرژۍ وزارت او د پروژو د پلي کوونکو شرکتونو نه وغوښتل چې دغه پروژې دې په بنسټیز ډول پلي کړي.
دی وايي:
"زموږ د نن ورځې د کار اساس چې د اوبو او انرژۍ وزارت او شرکتونه باید ورته متوجې وي، هغه د دغو پروژو بنسټیزوالی دی. زموږ د کار کیفیت باید داسې وي چې خلک مو څو لسیزې پرې ډاډه او خاطر جمع وي."
ښاغلی عبدالله وايي، دا چې افغانستان لا پهخپلو پښو ولاړ نهدی، نو هغه مرستې چې د نورو هېوادونو او نړیوالو بنسټونو لهخوا کېږي باید په اساسي ډول ولګول شي.
په یادو درېیو تړونونو کې د کندهار د دهلې د برېښنا بند چې ۳۲۲ میلیونه ډالر پرې لګښت راځي، په اساسي ډول رغول کېږي، دا شان د هرات ولایت په شینډنډ ولسوالۍ کې د دوه نیم میلیونه ډالرو په اررښت د لمریزې برېښنا د يوه مرکز او د پلخمري د برېښنا بند د څلورو دروازو جوړول شامل دي.
د افغانستان د اوبو او انرژۍ وزارت د معلوماتو له مخې د دغو پروژو په پلي کېدو سره به شااوخوا ۱۰۰ زره کورنۍ د برېښنا له نعمته برخهمندې او څه باندې ۶۰ زره هکتاره ځمکې به هم خړوبې شي.
د دغه وزارت د مسؤلینو په خبره په دې پروژو ټولټال ۴۶۰ میلیونه ډالر لګښت راځي چې ۳۲۲ میلیونهيې د اسیا پراختیايي بانک لهخوا ورکول کېږي.
دا په داسې حال کې ده چې نږدې دوه اوونۍ وړاندې د افغانستان د مالیې وزارت او د اسیا پراختیایي بانک ترمنځ د څه باندې ۴۴ میلیونه ډالرو په ارزښت، د سروبي ولسوالۍ په نغلو سیمه کې د لمریزې برېښنا د يوه سټېشن د جوړولو تړون لاسلیک شو.
بلخوا د افغانستان د اوبو او انرژۍ وزیر علي احمد عثماني بیا يادو مراسمو ته وویل چې د برېښنا د تولید د نویو بندونو د جوړولو تر څنګ دغه وزارت د اوبو د مدیریت پلان هم وروستی کړی دی.
علي احمد عثماني وویل:
"د افغانستان د اوبو د مدیریت پلان نږدې نهايي شوی، دغه پلان د دې تر څنګ چې د افغانستان د اوبو د مدیریت تګلاره روښانوي پهکې د اوبو د ریفورم موضوع ته هم اساسي پاملرنه شوې."
ښاغلی عثماني وايي، که څه هم د برېښنا د بندونو د جوړولو په برخه کې ستونزې شته، خو دغه وزارت هڅه کوي په هر ځای کې چې د برېښنا د بندونو جوړولو امکان وي، هلته بندونه جوړ کړي.
راپور: واصل وصال
