د هلمند په ګرشک ولسوالۍ کې لاهم درنه جګړه روانه ده.
د ملي اردو یوې سرچینې د نوم نهښودلو په شرط ازادي راډیو ته وویل د ګرشک ولسوالۍ د سربند د سیمې یوه مهمه قرارګاه سقوط شوې ده او د ملي اردو د درېیمې لوا د درېیم کنډک د درېیمې ټولي قوماندان فهیم او یو شمېر ملګري يې وژل شوي دي.
که څه هم جګړه وروسته له هغه چې د بهرنیو ځواکونو لهخوا د وسلهوالو پر یو شمېر پټنځایونو بریدونه وشول او تلفات ورته واوښتل راکمه شوه، خو د سربند په سیمه کې لاهم په شدت جریان لري.
د هلمند د والي ویاند عمر ځواک وايي، په دغو بریدونو کې چې په یوه وخت کې د امنیتي کمربند پر څلورو مهمو نقطو پیل شول تر اوسه ۶ امنیتي سرتېري ټپیان شوي دي.
هغه ازادي راډیو ته وویل د بهرنیو ځواکونو په هوايي بمبار کې ۱۸ وسلهوال وژل شوي دي او ګڼ شمېر نور ټپیان دي.
ځواک وویل وسلهوالو د سربند، د ادم خان، پارچاوې او اب پاشک په سیمو کي پر یو شمېر پوستو موټر بمونه او وسلهوال بریدونه وکړل چي په شا تمبول شوي دي.
هغه د سربند د قرارګاه د سقوط خبره رد کړه.
بلخوا وسلهوالو طالبانو رسنیو ته په لېږل شوې خبرپاڼه کې ویلي چې په یاده جګړه کې د ملي اردو یوه قرارګاهیې نیولې او یو شمېر امنیتي سرتېرو تهیې مرګ ژوبله اړولې ده.
دا په داسې حال کې ده چې درې ورځې مخکې افغان ځواکونو د هلمند ناوه ولسوالۍ له وسلهوالو طالبانو بېرته ونیوله.
