د افغانستان جمهوري ریاست وايي چې په دې هېواد کې د اسلامي دولت په نوم وسلهوالې ډلې یا داعش مشر ووژل شو.
دا خبر پرون یکشنبه د جمهوري ریاست مطبوعاتي دفتر خپور کړ او په افغانستان کې امریکايي ځواکونو هم تائيد کړ.
د ارګ په خبرپاڼه کې راغلي چې افغانستان کې د داعش مشر عبدالحسیب په ننګرهار کې د افغانستان د ځانګړو ځواکونو په عملیاتو کې وژل شوی دی.
عبدالحسیب هغه څوک و چې د جمهوري ریاست د خبرپاڼې په حواله، د سردار محمد داوود خان پر روغتونیې د وروستۍ حملې امر کړی و.
پر دې روغتون د مارچ په اتمه نېټه په وسلهواله حمله کې چې مسئولیتیې داعش واخیست، لسګونه ډاکتران، نرسان، د روغتون کارکوونکي او هلته بستر ناروغان ووژل او زخمیان شول.
د روېټرز خبري اژانس په حواله، عراق او سوریه کې د اسلامي دولت نومې ډلې له وسلهوالو سره ملګرې ډله چې د "خراسان اسلامي دولت" بلل کېږي له ۲۰۱۵ میلادي کال راهیسې، په افغانستان کې فعالیت کوي.
د روېټرز په وینا، داسې ګڼل کېږي چې د امریکا د بېپيلوټه الوتکې په حمله کې د حافظ سعید خان تر وژلو وروسته، عبدالحسیب د دې ډلې مشر ټاکل شوی و چې د وسلهوالو طالبانو، د افغانستان د امنیتي ځواکونو او امریکايي قواوو پر ضد جنګېږي.
د ارګ خبرپاڼه وايي چې افغانستان کې د داعش مشر عبدالحسیب د ثور په اتمه نېټه، په پوځي عملیاتو کې وژل شوی خو خبر یې تر اوسه ځکه نهو خپور کړی چې حکومت غوښتل پهدې اړه بشپړ ډاډ ترلاسه او بیا یې ولس ته اعلان کړي.
په افغانستان کې د امریکا پوځ ویلي چې عبدالحسیب د اپرېل په میاشت کې د امریکايي ځواکونو په هوايي حمله کې وژل شوی دی.
پوځ مخکې ویلي وو چې د عبدالحسیب د وژل کېدو د خبر تائید به پهدې هېواد کې د داعش او د خراسان اسلامي دولت نومې ډلې فعالیت ډېر کمزوری کړي.
ننګرهار کې د داعش ډلې د وژل کېدو خبر په داسې حال کې خپرېږي چې د امریکا پوځ څو اوونۍ وړاندې په ننګرهار کې د داعش پر پټنځایونو خپل تر ټولو ستر غیر هستوي بم وغورځاوه.
د افغانستان حکومت وویل، د ننګرهار په اچین ولسوالۍ کې د امریکايي پوځیانو په دغه برید کې د داعش ډېر پټنځایونه چې د افغانستان په بېلابېلو سیمو کې له دغه ځایه بریدونه پلان کېدل، لهمنځه وړل شوي.
د افغانستان د ولسمشر د مطبوعاتي دفتر خبرپاڼه وايي، حکومت د ټولو ترورېستي ډلو پر ضد د مبارزې دوام ته متعهد دی خو هغو کسانو ته چې د خبرپاڼې په حواله، سوله غواړي د مذاکرو ور پرانیستی دی.
په خبرپاڼه کې یو وار بیا له حزباسلامي سره د حکومت د سولې موافقې ته اشاره شوې او وايي چې دې پرمختګ ثابته کړې چې سوله د افغانانو تر منځ د مذاکرو او خبرو له لارې ممکنه ده.
د ارګ په خبرپانه کې په دې اړه چې د عبدالحسیب د وژلو لپاره عملیات د ننګرهار په کومه سیمه کې شوي معلومات نهدي ورکړل شوي.
پهدې عملیاتو کې د داعش یو شمېر نور غړي هم وژل شوي دي.