د سعودي عربستان پاچا سلمان بن عبدالعزیز ال سعود د افغانستان له حکومت سره ژمنه کړې چې له طالبانو سره د سولې په خبرو کې به مرسته وکړي.
هغه پرون سې شنبه ریاض کې د افغانستان د ملي یووالي حکومت له اجرائیه رئیس عبدالله عبدالله سره د حکومت او طالبانو تر منځ د سولې پر امکان په خبرو کې ټینګار کړی چې د سولې لپاره د درېیم هېواد تر منځګړیتوب مخکې باید طالبان د جګړې بندولو ته اراده څرګنده کړي.
پاچا سلمان بن عبدالعزیز ال سعود همداراز ویلي چې د افغانستان د سولې لپاره باید د کابل او اسلاماباد روابط ښه شي څو د روانې جګړې سیاسي حل پیدا شي.
د اجرائیه رئیس مرستیال ویاند جاوید فیصل پرون سې شنبه ازادي راډیو ته وویل، عبدالله عبدالله له سعودي چارواکو غوښتنه وکړه چې سیمه کې له خپله نفوذه کار واخلي او د ترورېزم پر ضد د مبارزې لپاره همږغي رامنځته کړي.
جاوید فیصل زیاته کړه:
"د سعودي پاچا وویل که طالبان غواړي چې دې سولې خبرې ورسره وشي، د سولې لپاره صادق وي او د سولې نیت ولري نو هغوی باید د دې خبرو تر پيل وړاندې او د کوم هېواد تر منځګړیتوب وړاندې، له جګړې لاس واخلي او د افغانانو له وژلو لاس واخلي څو مشخصه شي چې هغوی د سولې خبرو نیت لري."
جاوید فیصل زیاته کړه چې عبدالله عبدالله د خلیج د همکاریو شورا له رئیس سره هم د سولې او له طالبانو سره د حکومت د روغې پر امکاناتو غږېدلی او په ځانګړي ډولیې له ترورېستي ډلو د پاکستان پر ملاتړ خبرې وسره کړې دي.
جاوید فیصل وویل:
"د خلیج د همکاریو ټولنې له سکرتر جنرال سره په خبرو کې دا بحث مطرح شو. د افغانستان اجرائیه رئیس یادونه وکړه چې د دې ټولنې له ادرسه کار وشي څو د وسلهوالو ترورېستانو مالي منابع وچې شي. د پاکستان دا یادونه وشوه چې لاهم ترورېستان له پاکستانه ملاتړ ترلاسه کوي او اړتیا ده چې دا ملاتړ لهمنځه ولاړ شي څو یوازې په افغانستان کې نه بلکې په ټوله سیمه کې د سمون او د ترورېزم د مخنیوي لپاره کار وشي."
سعودي عربستان د پاکستان له حکومت سره نېږدې اړیکې لري.
د افغانستان حکومت مخکې هم له سعودي غوښتنه کړې چې پر پاکستان له خپله نفوذه کار واخلي او په اغېزمن ډولیې د وسلهوالو ډلو د فعالیت مخنیوي ته او په افغانستان کې د سولې له پروسې سره مرستې ته وهڅوي.
د پاکستان حکومت له وسلهوالو ډلو مالي او سیاسي ملاتړ ردوي.
