د افغانستان د ملي امنیت شورا وایي، د حکومت له خوا پر داسې یوې طرحې کار روان دی چې پر لویو لارو د مسافرو د برمته نیولو له مخنیوي سره مرسته وکړي.
د ملي امنیت شورا ویاند تواب غورځنګ وايي د دې طرحې له جوړېدو مخکې ټولو امنیتي ځواکونو ته امر شوی چې د مخالفینو دا تکتیک پر موجوده امکاناتو ناکام کړي.
د افغانستان د ملي امنیت شورا وایي، وسله والو مخالفینو د دې لپاره د برمته نیولو چارې ته زور ورکړی چې د جګړې په ډګر کې خپله ناکامي جبران کړي.
د دغې شورا ویاند تواب غورځنګ وایي، د برمته نیولو د پېښو له زیاتېدو سره سم، حکومت هم پر داسې طرحې کار پيل کړی چې د مسافرو امنیت خوندي او د برمته نیونې مخنیوی وشي.
ښاغلي غورځنګ د شنبې په ورځ ازادي راډیو ته وویل، د وسله والو مخالفینو نوی تاکتیک به ډېر ژر شنډ شي.
هغه زیاته کړه:
"د افغانستان د ملي امنیت شورا ته به په دې اړه ډېر ژر یوه اساسي طرحه وړاندې شي او مخکې له دې چې دا پلان ترتیب شي د افغانستان ټولو امنیتي او دفاعي ځواکونو ته د د ستور استول شوی چې د ملکي خلکو تښتونې د مخنیوي لپاره له خپلو ټولو امکاناتو منظمه او اغېزمنه استفاده وکړي."
که څه هم امنیت شورا د طرحې له جزیاتو ورکولو ډډه کوي خو له دې وړاندې د کورنیو چارو وزارت ویلي چې د نوي پلان له مخې به په لویو لارو د امنیتي ځواکونو ګرځنده ټيمونه ډېر کړي.
دا په داسې حال کې ده چې وسله والو طالبانو د تېرې یوې میاشتې راهیسې د افغانستان د کندزـ تخار، کندزـ کابل، کندهارـ کابل په لویو لارو او ځينو سیمو کې لسګونه کسان یرغمال بیولي دي.
په وروستیو پېښو کې دغې ډلې په غزني کې شپږ له هغې وړاندې بیا د کندز کابل په لویه لار ۱۸۵ او او د تخار کندز په لار ۴۷ مسافر له موټرو ښکته کړي دي.
وسله والو طالبانو ویلي، هغه کسان چې دوی وژلي او یا یې هم تښتولي، د امنیتي ارګانونو کارکوونکي دي، خو حکومت دغه کسان عام وګړي بولي.
پر لویو لارو د مسافرو برمته نیونه څه نوې خبره نه ده، تېر کال هم څو ځله داسې پېښې وشوې، خو په تېر کال کې د برمته نیوونکو هدف تر ډېره هزاره توکمي افغانان وو، خو سږکال ورته د امنیتي ځواکونو د کارکوونکو نوم ورکوي.
بل لورته د افغانستان د ولسي جرګې اداري پلاوی او غړي وايي چې دغو تښتونو اندېښمن کړي او باید حکومت په دې اړه جدي ګامونه واخلي.
د دې جرګې رئیس عبدالروف ابراهیمي د شنبې ورځې په غونډه کې د وکیلانو اندېښنو له اورېدو وروسته وویل چې امنیتي بنسټونه باید په دې اړه ملت ته ځواب ورکړي.
نوموړي زیاته کړه:
"د افغانستان د امنیت او په همدې ډول د لویو لارو امنیت په خاطر موږ د دوشنبې په ورځ امنیتي مسولین ولسي جرګې ته رابللي دي."
د امنیتي چارو کارپوهان هم وايي چې دغو پېښو د خلکو تر منځ اندېښنې له پخوا ډېرې کړي او د ډاډمن ځمکني سفر فضا یې له منځه وړي ده.
له دې ډلې یې جاوېد کوهستاني ازادي راډیو ته وویل چې طالبان غواړي د جګړې بدل په لویو لارو د برمته نیولو له لارې واخلي خو افغان حکومت چې د خلکو د ساتنې حق لري باید د همغږی، پولیسو او ګزمو په ډېرولو هغوی ته دا فرصت ورنه کړي.
راپور: یوسف خان ځدراڼ
