د ګډو رزمي ورزشونو یا ام ام اې افغان لوبغاړي فرید بشارت خپل امریکايي سیال کریس ګوتیرز ته ماتې ورکړه.

بشارت او سیال یې بېګا ناوخته په لاس ویګاس کې د ام ام اې د معتبر سازمان یو اف سي په بلنه د مبارزې قفس ته ننوتل.

بشارت چې په هېڅ لوبه کې یې ماته نه ده خوړلې، د لوبڅارانو د پرېکړې له مخې د دې لوبې ګټونکی اعلان شو او په دې توګه یې خپله څوارلسمه پرله پسې بریا هم ثبت کړه.

د څارونکو په باور د غېږو نیولو او د سیال د کنټرول مهارت د فرید بشارت په بریا کې اساسي رول درلود.

په پام کې ده چې د افغانستان او پاکستان د فوټبال ملي لوبډلې د آسیاي جام د غوراوي په دریم ګروپي پړاو کې راتلونکې اونۍ لوبه وکړي.

د ټاکلي پلان په اساس دواړه لوبډلې به د تلو راتلو په دې پړاو کې یوځل د راروانې پنجشنبې په ورځ (د اکتوبر ۹مه) او دوهم ځل د سه شنبې په ورځ (د اکتوبر ۱۴مه) سره مخامخ شي.

په دې پړاو کې ۲۴ لوبډلې په شپږو ګروپونو کې لوبې کوي. افغانستان په E ګروپ کې له پاکستان، سوریې او میانمار سره یوځای دی. افغان لوبډلې له سوریې او میانمار پر وړاندې خپلې مخکینۍ لوبې بایللې دي.

د آسیايي جام لوبې په ۲۰۲۷ کال کې ترسره کېږي.

د خیبرپښتونخوا اعلی وزیر وايي چې د ډیورنډ پر کرښه د پرتو سیمو د ناامنیو په اړه د طالبانو له حکومت سره د خبرو لپاره د ده وړاندیز ته د پاکستان د مرکزي حکومت غبرګون امېدبښونکی دی.

د ډان ورځپانې د راپور له مخې علي امین ګنډاپور پرون په خپل دفتر کې یوې غونډې ته وویل چې د یو دایمي حل لپاره له افغانستان سره خبرې ضروري دي.

ښاغلي ګنډاپور ادعا وکړه چې د افغانستان بې ثباتي د خیبرپښتونخوا پر نظم ناوړه اثر کوي. په راپور کې د اسلام آباد د غبرګون په اړه څه نه دي ویل شوي.

ګنډاپور یوه اونۍ مخکې په پېښور کې د عمران خان په مشرۍ د تحریک انصاف ګوند یوې غونډې ته د وینا پرمهال هم ویلي و، چې ایالتي حکومت د تروریستي ډلو پرضد د پاکستان د پوځ د عملیاتو ملاتړ نه کوي.

د غزې د ملکي دفاع اداره وايي د حملو د درولو لپاره د ولسمشرډونالډ ټرمپ له غوښتنې سره سره په غزې ښار کې د اسراییلو حملې روانې دي.

د دې ادارې ویاند محمود بسال فرانسپرس خبري آژانس ته ویلي دي چې په غزه کې بېګانۍ شپه ډېره سخته تېره شوه او اسراییلو لسګونه بمبارۍ او د توپونو حملې وکړې.

په غزه کې لږ تر لږه اویا کسان یواځې د جمعې په ورځ په بریدونو کې وژل شوي.

د امریکا ولسمشر ډونالډ ټرمپ پرون پر اسراییلو غږ وکړ چې سمدستي پر غزې بمبار ودروي. دا غوښتنه وروسته له هغه وشوه چې حماس د اسراییلي یرغملو د خوشې کولو او د جګړې د پای ته رسولو لپاره د ټرمپ د وړاندیز شوي پلان ځينې برخې ومنلې.

ولسمشر ټرمپ په خپله ټولنیزه شبکه ټروث سوشیل کې لیکلي، اسراییل باید پر غزې بمباري سمدستي ودروي ترڅو یرغمل شوي کسان په خوندي او چټکۍ سره خوشې شي.

که څه هم حماس پرون ماښام د ټرمپ د شل فقره يي پلان ځینې برخې ومنلې خو د وسلو د کېښودو په اړه یې تراوسه څه نه دي ویلي.

د ایران قضا نن سهار د اوو نورو سیاسي او امنیتي بندیانو د اعدام حکمونه تطبیق کړل.

د ایران د قضا د خبري آژانس میزان د راپور له مخې شپږ اعدام شوي هغه کسان دي چې تجزیه غوښتونکي او د خوزستان په خرمشهر ښار کې د تروریستي حملو تنظیموونکي بلل شوي. د دې کسانو نومونه تراوسه نه دي اعلان شوي. میزان ویلي دي چې دوی خپل جرمونه منلي وو. د میزان د خبر له مخې دې کسانو له اسراییلو سره هم اړیکي درلودل.

د میزان د خبر له مخې اووم تن یو کرد دی چې په ۲۰۰۹ کال کې د حکومت پلوه سني دیني عالم ماموستا شیخ الاسلام د وژنې په تور نیول شوی دی.

د دې کسانو د محاکمې جریان نه دی خپور شوی او د بشري حقونو ډلو بیا بیا د ایران پر حکومت د تورنو کسانو له حقونو د سرغړونو له کبله انتقاد کړی.

د افغانستان د کرکټ ملي ټیم په دویمه شل اووریزه لوبه کې هم له بنګله دیش ماته وخوړه.
دا لوبه په شارجه کې وشوه. افغان لوبډلې ۱۴۸ منډې هدف ورکړی وو خو بنګله دیشي لوبغاړو د شلم اوور په لومړي بال سره پوره کړ او لوبه یې د دوو ویکټو په توپیر وګټله.

افغانستان اولنۍ لوبه هم د پنجشنبې په ورځ بایللې وه. تمه ده دریمه شل اووریزه لوبه د یکشنبې په ورځ ترسره شي.

د هند د بهرنیو چارو وزارت اعلان کړی چې د اکتوبر له ۹ تر شپاړسمې به د طالبانو د بهرنیو چارو د وزیر امیرخان متقي کوربه وي.

د دغه وزارت ویاند راندهیر جیسوال پرون په یوه خبري کنفرانس کې د ملګرو ملتونو د امنیت شورا هغه بیان یاد کړ چې په اساس یې متقي ته د هند د دغه سفر معافیت ورکړل شوی دی.

د طالبانو د بهرنیو چارو وزیر او ګڼ نور لوړپوړي چارواکي د ملګرو ملتونو د سفري بندیزونو په لیسټ کې دي او کله کله یواځې د ملګرو ملتونو د دغه سفري بندیز په معافیت سره بهر تلی شي.

د هند د بهرنیو چارو وزارت ویاند همداراز زیاته کړه چې هندي چارواکي له طالب چارواکو سره په تماس کې دي او هند له افغانانو سره خپلو مرستو ته دوام ورکوي.

هغه د بېلګې په توګه له زلزله ځپلو افغانانو سره د هند د مرستو یادونه وکړه او ویې ویل چې په لومړي سر کې دوی بېړنۍ مرستې ورسولې او وروسته یې نورې محمولې هم د چابهار له لارې افغانستان ته واستولې.

پاکستان وايي د غزې د سولې لپاره د امریکا د ولسمشر پلان د اسلامي هېوادونو له وړاندیز سره سمون نه لري.

د پاکستان د بهرنیوچارو وزیر اسحق ډار نن پارلمان ته په وینا کې وویل کوم پلان چې ټرمپ په روانه اونۍ کې اعلان کړ له هغه شل فقره یې طرحې چې سره چې د څو اسلامي هېوادو مشرانو د سپټمبر په ۲۲مه هغه ته وړاندې کړه توپیر لري.

دې ډلې اسلامي هېوادونو ټرمپ ته وړاندیز کړی و، چې اسراییلي ځواکونه باید په بشپړ ډول له غزې څخه وځي په داسې حال کې چې د ټرمپ په اعلان شوې طرح کې د اسراییلو د قسمي وتلو خبره شوې څو په نتیجه کې یې د حماس ډلې له خوا برمته شوي اسراییلي وګړي خوشې شي.

د پاکستان صدراعظم شهباز شریف مخکې د ټرمپ د سولې پلان ستایلی و.

د سویس په جنوا ښار کې د پولیسو او لاریونوالو تر منځ نښتو کې لږ تر لږه ۵ پولیس ټپيان شوي دي.

پولیسو ویلي اړ شول چې په لاریونوالو یې اوښکی بهوونکی ګاز او اوبه وشیندي.

لاریونوال د غزې د بحري کاروان په ملاتړ راوتلي وو خو وروسته له هغه په تاوتریخوالي واوښتل چې په جنوا کې یې د ټرافیکو بهیر په ټپه ودراوه. پولیسو ادعا کړې چې لاریونوالو شیان غورځول او ملکیتونو ته یې زیان رساوه.

د لاریون کوونکو شمېر شاوخوا ۳۰۰۰ کسانو ته رسېده.

اسراییلي ځواکونو پرون سلګونه هغه فعالان ونیول چې په شاوخوا ۴۰ کښتیو کې د غزې د محاصرې د ماتولو په هدف غزې تړانګې ته نږدې شوي وو.

په نیول شویو کې مشهوره فعاله ګریتا تونبرګ هم شامله ده.

د فوټبال نړیوال فدراسیون د افغان کډوالو نجونو د فوټبال ټیم غوره کړی دی.
تمه ده دا ۲۳ کسیزه لوبډله د روانې اکتوبر له ۲۳ تر ۲۹مې په متحده عربي اماراتو کې د فیفا د ښځو د یووالي په یوه ټورنمټ کې برخه واخلي. هلته به افغان نجونې له چاد، لیبیا او کوربه متحده عربي اماراتو سره مخامخ شي.

فیفا پرون په خپله فیسبوک پاڼه د دغو نجونو د تمرینونو یوه ویډیو هم خپره کړې او د ټیم تشکیل یې یو تاریخي ګام بللی دی.

د فوټبال نړیوال فدراسیون د بیان په اساس د افغان کډوالو نجونو د فوټبال ټیم وروسته تر هغه تشکیل شو چې فیفا د دوی د مالي او عملیاتي چارو لپاره بودیجه تصویب کړه.

وروسته تر هغه چې طالبان په ۲۰۲۱ کال کې په افغانستان واکمن شول د افغانستان د فوټبال ښځینه ملي ټيم ګڼې غړې بهرنیو هېوادونو په تېره انګلستان او اسټرالیا ته کډوالې شوې او له لومړي سره یې هڅه کوله چې فیفا ورته د کډوالو نوی ټیم جوړ او ملاتړ ترې وکړي.