د افغانستان په جنوب ختیځ خوست ولایت کې د غلام خان بندر اړوند ډیورنډ کرښې په اوږدو کې د تېر ماښام پیل شوې جګړه د ځايي طالب چارواکو په خبره، درېدلې خو کاروباریان وايي، حالات نورمال نه دي او د بیا جګړې امکان هم شته.
د ډيورنډ کرښې په اوږدو کې د طالبانو او پاکستاني پوله ساتو ځواکونو ترمنځ درنې وسلې کارول شوي دي.
د خوست ولایت د غلام خان بندر کمیسار بلال جان وردګ د جمعې په ورځ د سپټمبر۲۰مه ازادي راډیو ته وویل، په نښته کې د هاوان مرمیو د لګېدلو له کبله یو طالب وژل شوی او نوموړې ادعا کوي چې دغه نښته کې درې پاکستاني سرتېري هم وژل شوي دي.
وردګ وویل: "ماښام شپږ نیمي بجې جنګ شروع شو او د شپې تر دوو بجو یې دوام وکړ، د هغوی له اړخه هاوانونه فیر شول چې زموږ له ساحې وړاندې هلته د دفاع وزارت لومړی کنډک دی، لګېدلي دي، یو تن مجاهد شهید شوی او زموږ د معلومات له مخې، هاغاړه درې تنه وژل شوي، خو هغوی موږ ته یو کس ښيي."
بلال وردګ د نښتې د لامل په اړه څه نه وايي، خو اوس وضعیت نورمال ښيي.
که څه هم د غلام خان بندر کمیسار د وضعیت د عادي کېدو خبره کوي، خو په غلام خان بندر کې ځینې کاروباریان وضعیت ښه نه ګڼي او وايي، هټۍ او تاسیسات لا هم بند دي.
د غلام خان بندر یوه څنډه
په غلام خان بندر کې یوه کارو باري بسمالله په دې اړه ازادي راډیو ته وویل: "حالات نورمال نه دي او د بیا جګړې امکان هم شته، دوکانونه همدا اوس تړلي دي، ځینې کورونه د پاکستاني ځواکونو لهخوا د توپ په مرمیو لګېدلي چې مالي زیانونه لري، خو د ځاني زیان په اړه معلومات نهشته."
د بسمالله په خبره، د افغان طالبانو او پاکستاني ځواکونو ترمنځ نښته کې دواړو لوريو درنې وسلې کارولي دي.
دا لومړۍ ځل نه دي چې د ډیورنډ کرښې په اوږدو کې د طالبانو او پاکستاني پوله ساتو ځواکونو ترمنځ نښتې کېږي، بلکې تر دې وړاندې د روانې سپټمبر میاشتې په لومړیو کې هم د خوست په ځاځي میدان کې د دواړو لوریو ترمنځ جګړې شوې وې.
په دې اړه نور: د خوست اوسېدونکي: د طالب او پاکستانيو ځواکونو ترمنځ نښتې لا هم روانې دي په دې اړه نور: د سيمې خلک: ځاځي ميدان کې د طالبانو او پاکستاني پولهساتو ترمنځ نن هم نښتې دوام درلودهغه مهال هم د خوست لپاره د طالبانو د والي ویاند له ازادي راډیو سره په خبرو کې ویلي چې طالبانو د پاکستاني پوله ساتو ځواکونو مقابل کې ځوابي برید کړی دی.
یو شمېر ځايي خبریالانو له ازادي راډیو سره په خبرو کې ویلي چې د ډیورنډ کرښې په اوږدو کې د وروستیو نښتو له امله ګڼې کورنۍ اړې شوې چې خپلې سیمې پرېږدي.
د پاکستان حکومت او پاکستاني چارواکو د وروستۍ نښتې په اړه څه نه دي ویلي.
ملګرو ملتونو ویلي چې په تېرو درېیو میاشتو کې د طالبانو او پاکستاني پوله ساتو ځواکونو ترمنځ د ډیورنډ کرښې په اوږدو کې ۱۳ ځله نښتې شوې دي.
دغه خبره د ملګرو ملتونو سرمنشي د سپټمبر په ۱۷مه د ملګرو ملتونو امنیت شورا ته د درې میاشتني راپور د وړاندې کولو پرمهال کړې وه.