په کندهار کې معلولین وايي، نه یې کلني امتیازات پر وخت دي او نه هم نورې مرستې ورته رسېږي چې له امله يې د سختو اقتصادي ستونزو سره مخ دي.
په کندهار کې د تېرو څو لسیزو جګړو له امله د معلول شویو کسانو شمېر زرګونو ته رسېږي چې ډېری یې دا مهال په بد اقتصادي وضیعت کې ژوند کوي.
پر عبدالهادي ۳۳ کاله مخکې د ماین چاودنه شوې، خو لا یې هم په پرې شوې پښه کې پرزې بندي پاتې او کله نا کله يې ځوروي.
هغه چې د روسانو سره د جګړې پر مهال پرې ماین چاودلی او دواړې پښې يې پرې شوي دا مهال په بد اقتصادي وضیعت کې ژوند کوي.
د ده په خبره، په کورنۍ کې بل د ګټې وټې کس نه لري او دی هم د کار کولو نه دی.
عبدالهادي زیاتوي: "زه د کور سرپرست یم، زموږ ژوند په کړاو کې دی، طالبانو د یونیم کال راهیسې زموږ پیسې بندې اچولي، زما د کلي د دوکاندارانو او ډاکتر څخه پوښتنه وکړئ چې زه يې پوروړی یم."
معلولین وايي، د نوي حکومت په راتلو سره يې کلني امتیازات پر وخت نه ورکول کېږي چې له امله يې دوی د ستونزو سره مخ دي.
په کندهار کې معلولین
د نورعلي په نوم یو بل معلول د طالبانو له حکومت څخه غوښتنه کوي چې کلنی معاش دې پر وخت ورکول شي څو دوی خپلې اړتیاوې پرې پوره کړي.
نورعلي زیاتوي: "په یوه سترګه او یوه لاس معذوره یم، خواري نهشته، د تېر کال نیمي تنخواوي یې راکړي، نیمې پاتې دي، د سږ کال دا خو مو تر اوسه یوه روپي هم نه ده لیدلې."
معلولین وایي، نه یوازې مالي امتیازات پر وخت نه ورکول کېږي، بلکې د ټولنیز ملاتړ او فزیکي پاملرنې نشتوالي هم د دوی ژوند د کړاوونو سره مخامخ کړی.
د نصرالله په نوم یو بل معلول ازادي رادیو ته وویل چې دوی ته د روغتیایي خدمتونو او درملنې زمینه برابره نه ده او د خپلي کورنۍ د غړو د درملنې پیسې نه لري.
نصرالله وايي: د کوچني اختر راهیسې مې کوچنیان په میرویس روغتون کې پراته دي، دومره پیسې ولاکه لرم چې شخصي روغتون کې یې تداوي وکړم.
نصرالله وايي: "اقتصادي ستونزې لرو، معاشونه مو بند دي، د کوچني اختر راهیسې مې کوچنیان په میرویس روغتون کې پراته دي، دومره پیسې ولاکه لرم چې شخصي روغتون کې یې تداوي وکړم."
د ازادي راډیو خبریال هڅه وکړه چې په دې اړه د طالبانو د حکومت د کندهار معلولینو ریاست د مسوولانو نظر هم واخلي، خو د دې راپور تر خپرېدو پورې خبرو ته حاضر نه شول.