ایران ادعا کړې چې د پاکستان په خاوره کې یې د جیش العدل ډلې دوه مرکزونه په توغندیزو بریدونو او بې پیلوټه الوتکو په نښه کړي دي.
د ایران سپاه پاسداران ته نږدې تسنیم خبري اژانس تېر ماښام راپور ورکړ چې په نښه شوې سیمه د پاکستان په بلوچستان ایالت کې زرغون غر دی هغه ځای چې د ایراني چارواکو د ادعا له مخې د جیش العدل ډلې یو لوی مرکز پهکې پروت دی.
ایراني چارواکو ادعا کړې چې په توغندیزو او ډرون الوتکو بریدونو سره یې د جیش العدل ډلې دوه مرکزونه په نښه او له منځه وړي دي.
دا برید وروسته له هغه شوی چې جیش العدل ډلې د ایران د سیستان و بلوچستان په راسک کې په ایراني پولیسو د یوه برید مسوولیت په غاړه واخیست.
په هغه برید کې یو ایرانی پولیس وژل شوی و.
تر دې مخکې هم جیش العدل ډلې تېر ډسمبر د ایران په راسک کې د پولیسو یو مرکز تر برید لاندې نیولی وو او لږ تر لږه یوولس ایراني ځواکونه یې وژلي وو.
د امریکا په ګډون ایران او یو شمېر لوېدیځو هېوادونه جیش العدل ډله یو ترهګر سازمان ګڼي.
د پاکستان په خاوره تر بریدونو مخکې ایران په عراق او سوریه کې هم یو لړ بریدونه کړي دی.
د ایران سپاه پاسداران له خوا د عراق د کردستان په ایربیل کې بریدونو تُند عکس العملونه یې پارولي.
ایراني رسنیو د سه شنبې په سهار راپور ورکړ چې د ایران سپاه پاسداران ځواکونو هغه څه چې دوی د عراق په کردستان کې د اسراییلي جاسوسانو هدفونه بللي په توغندیو وویشتل.
د ایران راکټي بریدونه
د دغو بریدونو په غبرګون کې بغداد له ایرانه خپل سفیر ور وغوښت او د ایران سفیر یې هم احضار کړ.
امریکا متحده ایالتونو او ناټو سازمان د عراق په خاوره کې د ایران راکټي بریدونه په کلکه غندلي دي.
د عراق په کردستان کې چارواکو ویلي دي چې د اربیل په ښار کې په دغو بریدونو کې لږ تر لږه څلور ملکي کسان وژل شوي او شپږ نور ټپیان شوي دي.
د عراق د بهرنیو چارو وزارت وايي، د دغه هېواد له راتلونکو اقداماتو څخه به یو دا وي چې د دغو بریدونو په اړه د ملګرو ملتونو امنیت شورا ته شکایت وکړي.
دا بریدونه په داسې حال کې شوي چې په غزه کې د اسراییلو د جګړې له امله په سیمه کې کړکېچ زیات شوی او د جګړې د پراخېدو اندېښنې یې راپورته کړې دي.
اسراییلو وروسته له هغه په غزې بریدونه پیل کړل چې د امریکا او اروپا له خوا ترهګر ګڼل شوې ډلې حماس په اسراییل د اکتوبر په اوومه بریدونه وکړل.
له حماسه د سیمې ګڼې نورې وسله والې ډلې له هغې جملې حوثي یاغیان ملاتړ کوي چې د ایران له مرستو او همکاریو برخمن دي.