د افغانستان د شیعه عالمانو شورا وايي، د طالبانو حکومت ورڅخه غوښتي چې د محرم د مراسمو د اجرا مرکزونه کم کړي.
د دې شورا منشي سید حسین عالمي بلخي نن (یکشنبه) ازادي راډیو ته وویل، طالب چارواکو ورته ویلي چې که د مراسمو مرکزونه ډیر او تیت پرک وي، امنیت یې نه شي ساتلی.
خو ښاغلی بلخی وايي چې د شیعه عالمانو شورا له طالبانو غوښتي چې د محرم د مراسمو د مرکزونو له محدودولو پرته د ټولو امنیت خوندي کړي.
داعش ډلې په تېرو کلونو کې په کابل کې د محرم پر مراسمو انتحاري بریدونه کړي، چې له کبله یې لسګونو خلکو ته مرګ ژوبله اوښتې ده.