د روغتیا نړیوال سازمان وايي، د افغانستان کابو نیمايي وګړي له سختې لوږې سره مخامخ دي او له دې کبله د افغانانو په منځ کې د ویروسي ناروغیو د خپرېدو امکان ډېر دی.
د روغتیا د نړیوال سازمان په وینا، د افغانستان په څلوېښت میلیون وګړو کې اتلس میلیونه او ۹ لکه په لوړه کچه د خوراکي موادو له کموالي سره مخامخ دي چې په نتیجه کې یې د ناروغیو د خپرېدو وېره زیاته شوې ده.
د ملګرو ملتونو د دې ادارې له راپور سره سم، په خوارځواکۍ د اخته ماشومانو شمېر هم ورځ تر بلې په زیاتېدو دی او د سپټمبر تر میاشتې پورې له ۵ کلونو کشر ۳۴ زره ماشومان د کافي خوړو د نه ورسېدو له کبله روغتیايي مرکزونو ته وړل شوي دي.