د سره صلیب نړیوالې کمېټې 'ICRC' عمومي رییس رابرټ ماردیني وايي، پرون جمعه (د سلواغې ۲۲مه) یې د سوېس په جنیوا ښار کې د طالبانو له پلاوي سره وکتل.
ښاغلي ماردیني پر ټویټر د دې لیدنې خبر ورکړی او لیکلي یې دي چې د دوامدار ډیالوګ په لړ کې د اسلامي امارت له استازو سره یې رغنده بحثونه وکړل.
Today in Geneva I had constructive discussions with Islamic Emirate of Afghanistan representatives as part of our long-standing dialogue. We spoke about @ICRC’s inclusive & expanding work in healthcare, detention, disability, water & sanitation for the people of #Afghanistan.
— Robert Mardini (@RMardiniICRC) February 11, 2022
ماردیني زیاتوي، دې بحثونو کې په افغانستان کې د روغتیايي خدماتو، د توقیف ځایونو د وضعیت، معلولیت، اوبو او حفظ الصحې په برخو کې د سره صلیب د فعالیت په اړه چې د ټولو لپاره او د پراختیا په حال کې دي خبرې شاملې وې.
د طالبانو د حکومت لس کسیز پلاوی تېره اوونۍ د جنیوا کال د غیر حکومتي ټولنې په بلنه د سوېس جنیوا ښار ته ورسېد او د پلان له مخې د یوې اوونۍ په ترڅ کې د سره صلیب د نړیوالې کمېټې او همدا راز د سوېس او نورو اروپايي هېوادونو له چارواکو سره خبرې دوی د سفر په اجنډا کې شاملې وې.
په دې اړه نور: سوېس کې د 'جنیوا کال' ناسته دوام لري؛ نصرتي: ډېر تمرکر د مېرمنو پر حقونو دیجنیوا کال د پنجشنبې په ورځ پر خپل ټویټر خبر ورکړ چې د طالبانو حکومت په جنیوا کې له جګ پوړو چارواکو سره تر خبر وروسته د بشري مرستو په برخه کې اعلامیه تایید کړه.
د دې ټولنې په وینا په دې اعلامیه کې د ټولو افغانانو لپاره د روغتیايي خدماتو او تعلیم د برابرولو او مصوونیت، د بشري مرستو لپاره د امکاناتو د چمتو کولو او د مرستندویو ټولنو کار ته د درناوي او د کلتوري میراثونو د خوندي ساتلو په ګډون یو لړ مهم مسایل شامل دي.