د بشر د حقونو د څار نړیوال سازمان وايي، که څه طالبانو په هلمند کې د ازادي راډیو پر خبریال الیاس داعي د برید په اړه کوم بیان نه دی خپور کړی، خو د دې سازمان په وینا الیاس داعي دې سازمان ته ویلي و چې د طالبانو له خوا ورته د مرګ ګواښونه شوي او ورڅخه غوښتل شوي چې د دې ډلې د پوځي عملیاتو په اړه دې راپورونه نه ورکوي.
د بشري حقونو د څار دې نړیوال سازمان تېره ورځ ناوخته په یوه خپاره کړي بیان کې د دې ادارې د مرستیالې پاټریشا ګاسمن له خولې وویل: "یوازې په دې خاطر د الیاس داعي وژل کېدو چې خپله دنده یې ترسره کوله د افغانستان رسنیو ته یو پیغام ورکړ چې د طالبانو په اړه راپور ورکول دوی له لوی خطر سره مخ کولی شي."
د بشر د حقونو د څار نړیوال سازمان مرستیاله پاټریشا ګاسمن
پر الیاس داعي د برید مسؤلیت تر اوسه چا نه دی منلی خو یوه طالب ویاند ذبیح الله مجاهد ازادي راډیو ته ویلي چې په دې اړه څېړنې کوي.
د بشري حقونو د څار نړیوال سازمان په خپل بیان کې د دې سازمان د مرستیالې پټریشیا ګاسمن له خولې د الیاس داعي وژل یو قصدي اعدام بللې او زیاته کړې یې ده چې دې پېښې "د طالبانو سره د سولې د هر ډول خبرو په پایله کې د بیان د ازادي په وړاندې جدي شکونه راپورته کړي دي."
دا اعلامیه وړاندې وايي، الیاس داعي له هغو لسګونو افغان ژورنالېستانو څخه دی چې په وروستیو میاشتو کې یې د طالبانو له زیاتیدونکي خبرداري تر لاسه کول.
د بشري حقونو دا نړیواله ډله زیاتوي چې ګڼو نورو ژورنالېستانو هم دې ادارې ته ویلي چې دوی ته هم خبرداری ورکړل شوی چې د طالبانو د فعالیتونو په اړه دې راپورونه نه ورکوي.
د بشري حقونو د څار د نړیوال سازمان په دې بیان کې دا هم ویل شوي چې هغو ژورنالېستانو چې الیاس داعي یې پيژانده دې ادارې ته ویلي، د دې برید څخه څو اوونۍ مخکې طالبانو د داعي کور پلټلې و او له هغه څخه یې د ده د فعالیتونو په اړه پوښتنې کړې وې، همدارنګه یې له ځايي خلکو هم غوښتي وو چې د داعي د چلند په اړه دې دوی ته راپور ورکړي.
الیاس داعي پرون (د لړم ۲۲مه) دفتر په لور روان چې موټر ته یې مقناطیني ماین اېښودل شوی وو
د بشري حقونو د څار دا نړیواله اداره وايي، د نومبر په ۱۲مه نېټه طالبانو یوه اعلامیه خپرې کړې او په کې یې افغان رسنۍ د " د دښمن په تبلیغاتو " تورنې کړې دي.
د بشري حقونو د څار د نړیوال سازمان په بیان کې د طالبانو تر واک لاندې سیمو کې د ولسي خلکو د وضعیت په اړه هم اندېښنه ښودلې شوې او ویلي وو چې طالبانو تر خپل واک لاندې سیمو کې پر خلکو محدودیتونه لګولي دي.
تر دې مخکې د جمهور رئیس لومړي مرستیال امرالله صالح هم ادعا کړې وه چې طالبان په ښارونو کې پر رسنیو، مدني بنسټونو او نوم وتو شخصیتونو د بریدونو پلان لري.
د بشري حقونو د څار نړیوال سازمان له طالبانو غوښتي چې سملاسي دې رسنیو ته ګواښونه او پر دوی بریدونه پای ته ورسوي او د هغو خلکو له ځورونې، تهدید او سزا کولو دې هم لاس واخلي چې د طالبانو پر پالیسیو انتقاد کوي.
د بشر د حقونو د څار نړیوال سازمان په خپله خپره کړې اعلامیه کې د افغان سولې له ملاتړو هېوادونو په خبریالانو د حملو د غندنې غوښتنه کړې او ویلي یې دي چې باید پر طالبانو فشار راوړل شي چې دا ډله په رسنیو له حملو لاس واخلي او د سولې په هر ډول توافق کې د بیان ازادي وساتي.
د بشري حقونو د څار نړیوال سازمان په خپل بیان کې د دې سازمان د مرستیالې پټریشیا ګاسمن له خولې د الیاس داعي وژل یو قصدي اعدام بللې
په همدې حال کې د کابل پرېس کلب د یوې اعلامیې په خپرولو سره له افغان حکومت او د رسنیو له نړیوالو ملاتړو ټولنو غوښتنه کړې چې د ښاغلي داعي له کورنۍ سره دوامداره مرستې وکړي.
په اعلامیه کې راغلي دي چې الیاس داعي د بیان د ازادۍ قربانی شوی افغان حکومت باید په دې قضیه کې دخیلي کړۍ پیدا او په اړه يې معلومات له رسنیو سره شریک کړي.
د کابل پرېس کلب د اعلامیې په اساس چې افغان حکومت د وژل شویو خبریالانو د قاتلانو په موندلو او عدالت تامینولو کې پاتې راغلی او یواځې يې د دغه ډول قضیو په غندلو بسنه کړې ده.
دا په تېره اوونۍ کې دوهمه ورته پېښه ده چې خبریالان په کې وژل کېږي.
د تېرې اوونۍ د شنبې په ورځ د طلوع نیوز پخوانی ویاند یما سیاوش په پلازمېنه کابل کې په ورته ماین چاودنه کې وژل شوی وو.