د ایران د قضائیه قوې چارواکي وایي، محکمې درې کسان امريکا او يو تن بريتانيا ته پر جاسوسۍ مجرم وپېژندل او له دې ډلې یو تن په اعدام محکوم شو.
د ایران د قضائیه قوې ویاند غلام حسین اسماعیلي پرون (اکتوبر لومړۍ) په یوه خبري کنفرانس کې وویل، ترڅو چې سترې محکمې اجازه نه وي ورکړې، امريکا ته د جاسوسۍ په تور په اعدام د محکوم شوي شخص هويت پټ ساتل کېږي.
ښاغلي اسماعیلي زیاته کړه: "کله چې د فرد نوم اخيستل کېږي او دوسيه لا هم د لومړنيو تحقيقاتو په پروسه کې ده، موږ په وار وار ويلي چې د قانون له مخې نور جزئيات نه شو ورکولاى؛ خو د دغه شخص نيول کېدل دقيق دي."
نوموړي وويل، دوه نور کسان، علي نفرئيه او محمد علي باباپور د امريکا د مرکزي استخباراتو ادارې (سي ای اې) ته د کار کولو په تور هریو په لس کاله بند محکوم شول.
دغه ايراني چارواکي زياته کړه، د امين نصاب په نوم بل شخص بريتانيا ته د جاسوسۍ په تور په لس کلن بند محکوم شوى دى.
ايران په وروستيو کې غرب ته د جاسوسۍ په تور د اشخاصو نيول زيات کړي دي.