رکس ټېلرسن په واشنګټن کې د افغانستان او جنوبي اسیا لپاره د ولسمشر ډونالد ټرمپ د ستراتېژي په اړه په خپلو خبرو کې د افغانستان په سوله کې د پاکستان او هند پر اهمیت ټینګار وکړ.
ده وویل چې د اوس لپاره موږ په افغانستان کې پاتېږو.
د امریکا د متحده ایالاتو د بهرنیو چارو وزیر وایي چې تر هغو به په افغانستان کې یوو چې روغه جوړه نهوي شوي.
رکس ټېلرسن په واشنګټن کې د ستراتېژيکو او نړیوالو مطالعاتو په څېړنیز مرکز کې د چهارشنبې په ورځ د افغانستان او جنوبي اسیا لپاره د امریکا د نوې ستراتېژي په اړه په خپلو خبرو کې وویل:
"طالبانو او نورو عناصرو ته مو دا پيغام دی چې موږ هېڅځای نهځو، موږ به تر هغو هلته یوو چې ستاسو فکر نهوي بدل شوی چې پرېکړه وکړئ چې له افغان حکومت سره د روغې جوړې له لارې یوځای شئ."
ټېلرسن: د افغانستان ثبات د پاکستان د راتلونکي ثبات لپاره مهم دی
ټېلرسن زیاته کړه چې د روغې جوړې له لارې کېدای شي چې د افغانستان له حکومت سره یوځای داسې یو حکومت رامنځته شي چې د افغانانو له کلتور سره سم وي.
واشنګټن د اګسټ په وروستیو کې د افغانستان او جنوبي اسیا لپاره خپله نوې ستراتېژي اعلان کړه.
ټېلرسن پر دې موضوع له ټینګار سره چې د بشپړې ستراتېژي پلي کول وخت ته اړتیا لري وویل:
"دا یوازې د افغانستان قضیه نهده، تاسو د افغانستان لانجه د سیمې ګواښونو ته په پام سره هوارولی شئ او پاکستان یو مهم عنصر دی، هند بیا وروستي هدف ته د رسېدو لپاره مهم دی، ترڅو یو باثباته افغانستان ولرو چې بیا د ترورېستي ډلو په اډې بدل نهشي."
ټېلرسن زیاته کړه چې د پاکستان راتلونکې ته چې کوم خطر متوجې دی هغه باید لهمنځه ولاړ شي ترڅو افغانستان ته سوله راشي.
دی وايي:
"موږ به هغه وخت یو باثباته، سولهییز افغانستان ولرو چې د پاکستان د راتلونکي ثبات په وړاندې ستر خطر لهمنځه تللی وي چې بیا به د هند او پاکستان د ښو اړیکو لپاره هم ښه شرایط چمتو شي."
ټېلرسن: د پاکستان راتلونکي ته چې کوم خطر متوجې دی هغه باید لهمنځه ولاړ شي.
ټېلرسن زیاته کړه چې پاکستان دوه لانجمن سرحدونه لري او واشنګټن چمتو دی چې په دې برخه کې له اسلاماباد سره مرسته وکړي او د پاکستان د حکومت راتلونکی ثبات په دې ډول خوندي شي.
د ځینو ناتائید شویو راپورونو له مخې ټاکل شوې ده چې په لنډ راتلونکي کې د امریکا د بهرنیو چارو وزیر هند او پاکستان ته سفر وکړي.
په کابل او بغداد کې د واشنګټن پخواني سفیر زلمي خلیلزاد دا خبره ازادي راډیو ته تائید کړه او ویېویل چې دا سفر د سولې د خبرو د څرګندیدو لپاره مهم دی.
په کابل او بغداد کې د واشنګټن پخوانی سفیر زلمی خلیلزاد
نوموړي زیاته کړه:
"د امریکا د بهرنیو چارو وزیر په خپله د هند او پاکستان په ګډون د اسیا جنوب ته ځي، فکر کوم چې سیمې ته د امریکا د بهرنیو چارو د وزیر تر سفر وروسته به دا څرګنده شي چې ډیپلوماسي څومره چانس لري."
خلیلزاد وروسته تر دې دا خبره وکړه چې د دوشنبې په ورځ د عمان په مرکز مسقط کې د افغانستان، پاکستان، امریکا او چین استازو له طالبانو سره د سولې په اړه غونډه وکړه او د دې غونډې په ارتباط د افغانستان د بهرنیو چارو وزارت دومره ویلي دي چې پاکستان پهکې د خپلو ژمنو پر عملي کېدو ټینګار کړی دی.