د ننګرهار چارواکي وايي له هغو څلورو پاکستاني اتباعو څېړنې روانې دي، چې په دې ولايت کې نن له داعش ډلې سره د يوځاى کېدو په تور نيول شوي دي.
له دغو پاکستاني اتباعو سره دوه افغانان هم د همکارۍ په تور نيول شوي دي.
د والي وياند عطا اله خوږياڼي نن ازادۍ راديو ته وويل، له دوى سره يو عراده موټر هم نيول شوى دى.
د والي وياند وايي نيول شويو کسانو پر خپل جرم اعتراف کړى دى.
د ننګرهار چارواکو خبر ورکړى، چې وړمه ورځ په اچين کې د ځايي خلکو او داعش ډلې ترمنځ په جګړه کې د دې سخت دريځې ډلې ١٥ غړي وژل شوي وو.