وروسته له هغې چې ګلبدین حکمتیار د افغانستان د حالت په اړه په ننګرهار کې په یوې عمومي غونډه کې د حزباسلامي رسمي نظر څرګند کړ، د ولسي جرګې د غړو بېلابېل غبرګونونهیې راوپارول.
د افغانستان ولسي جرګې د دوشنبې ورځې عمومي غونډې ازاد بحث تر ډېره د ښاغلي حکمتیار په څرګندونو راڅرخېده.
د ولسي جرګې غړي کمال ساپي په دې اړه وویل، د سولې، ولسواکۍ او د ملي یووالي لپاره د حکمتیار هوډ ته باید د شک په سترګه ونهکتل شي.
نوموړی وايي:
"د ښاغلي حکمتیار د تل پاتې سولې، ولسواکۍ، د هېواد د ابادۍ، د بشر د حقونو او د ملي یووالي لپاره هوډ ته باید د شک په سترګه ونهکتل شي، باید د قدر په سترګه ورته وکتل شي او ارزښت ورکړل شي."
د حزباسلامي مشر ګلبدین حکمتیار د شنبې په ورځ په لغمان او د یکشنبې په ورځ په ننګرهار ولایت کې یو شمېر پلاوو او حکومتي چارواکو ته په وینا کې په افغانستان کې روانه جګړه نامشروع وبلله او وسلهوال طالبانیې د سولې بینالافغاني مذاکراتو ته وهڅول.
ښاغلي حکمتیار همدارنګه په ځینو رسنیو انتقادونه وکړل او هغهیې په افغانستان کې په نفاق اچونې تورنې کړې.
که څه هم ډېریو وکیلانو د ګلبدین حکمتیار د خبرو هرکلی وکړ، خو یو شمېر نورو بیا ټینګار کاوه چې ښاغلی حکمتیار باید د افغانستان له سیاسي او ټولنیزو بدلونونو سره ځان عیار کړي.
د ولسي جرګې غړې فوزیه کوفي
د دغې جرګې غړې فوزیې کوفي په عمومي غونډه کې وویل:
"هر سیاسي رهبر چې غواړي افغانستان کې سیاسي تداوم او بقا ولري، باید خپل ځان د افغانستان له سیاسي او ټولنیزو بدلونونو سره عیار کړي، له هغه پرته زه باور لرم چې سیاسي عمر او دوام بهیې لنډ وي."
خو حزباسلامي وايي چې د افغانستان له اساسي قانون سره سم به خپل سیاسي فعالیتونه پر مخ وړي.
د دغه حزب ویاند حشمتالله ارشد ازادي راډیو ته وویل چې حزباسلامي به له افغانانو سره یوځای پر مخ ځي.
ښاغلي ارشد زیاته کړه:
"موږ ټول افغان ملت ته ډاډ ورکوو چې حزباسلامي افغانستان د اساسي قانون په منلو سره، حزباسلامي ته د هېواد د نافذه قوانینو پر اساس یوه نوې پاڼه خلاصه شوې ده، په دې چوکاټ کې به په ټولو ولایتونو کې سیاسي فعالیتونه کوي، موږ د افغانستان له خلکو سره و، یو به او یوځای په مخکې ځو."
ارشد: حزباسلامي به له افغانانو سره یوځای پرمخ ځي.
په ورته وخت کې په افغانستان کې د ملګرو ملتونو د مرستندویه پلاوي مأموريت یا یوناما د افغان حکومت او د ګلبدین حکمتیار د سولې له بهیره هرکلی وکړ.
د یوناما لهخوا په خپره شوې اعلامیه کې راغلي چې ملګري ملتونه د هر هغه تړون هرکلی کوي چې په افغانستان کې د تاوتریخوالي له کمېدو سره مرسته وکړي او اجازه ورکړي چې افغانان په سوله کې له یو بل سره ژوند وکړي.
وړاندې په اعلامیه کې راغلي په افغانستان کې د ملګرو ملتونو مرستندویه پلاوي مأموریت د سولې له بهیر سره د نورو وسلهوالو ډلو یوځای کېدو ته سترګې په لاره ده.
په افغانستان کې د امریکا سفارت هم د یوې خپرپاڼې په خپرولو سره د سولې برخه کې د افغان حکومت له وروستیو اقداماتو هرکلی کړی او د ورته بهیر د دوام هیلهیې کړې ده.
راپور: رحمت الله افغان