په داسې حال کې چې د روسیې او لوېدیځ تر منځ د سوریې د کورنۍ جګړې پر سر ترینګلتیا زیاته شوې، د امریکا د بهرنیو چارو وزیر رکس ټېلرسن پرون مسکو ته ولاړ.
رکس ټېلرسن مسکو ته تر روانېدو مخکې او په ایټالیا کې د اوو صنعتي هېوادونو په غونډه کې له ګډون وروسته له روسیې وغوښتل چې د سوریې د ولسمشر بشار الاسد له ملاتړه لاس واخلي.
رکس ټېلرسن: روسیه دې د اسد رژیم او امریکا تر منځ یو انتخاب کړي
نوموړي تر دې غوښتنې مخکې هغه څه چې تېره سې شنبه د سوریې په ادلب کې پېښ شول د زهرجن ګازو یو وحشیانه برید وباله.
د امریکا د بهرنیو چارو وزیر رکس ټېلرسن
ښاغلي ټېلرسن وويل:
"موږ نهغواړو چې د سوریې د رژیم ناکنټرول شوي د کیمیاوي وسلو زېرمې د داعش یا نورو هغو ترهګرو ډلو لاس ته ورشي چې غواړي او کولای شي د امریکا پر متحده ایالاتو او یا زموږ پر متحدینو حملې وکړي. موږ سوریه او نورو ځایونو کې د هېوادونو او ډلو لهخوا د کیمیاوي وسلو د کارولو عادي کېدل نهشو منلی."
په داسې حال کې چې تر اوسه د روسیې ولسمشر ولادیمیر پوتین یا نورو روسي چارواکو داسې څه نهدي ویلي چې د سوریې د حکومت څخه د ملاتړ د پای ته رسولو څرګندونه وکړي، د سیپنۍ ماڼۍ ویاند شان سپایسر روسیه منزوي شوې وبلله.
د سوريې حکومت ته د سپینې ماڼۍ خبرداری
نوموړي پرون واشنګټن کې خبریالانو ته وویل:
"دې کې هېڅ شک نهشته چې روسیه منزوي ده. هغوی «روسانو» خپل ځان له شمالي کوریا، سوریې او ایران سره همغږه کړی. دا دقیقاً هغه هېوادونه نهدي چې تاسو غواړئ وخت ورسره تېر کړئ. له روسیې پرته دا ټول ناکام دولتونه دي."
د سیپنۍ ماڼۍ ویاند شان سپایسر
بلخوا د روسیې ولسمشر ولادیمیر پوتین، د سوریې پر یوې پوځي اډې د امریکا د راکټي بریدونو وروسته په خپلو لومړنیو څرګندونو کې ویلي چې امریکا له واکه د بشارالاسد د لیرې کولو لپاره پلمه لټوي.
نوموړي مسکو ته د امریکا د بهرنیو چارو د وزیر رکس ټېلرسن له سفر مخکې خبریالانو ته وویل، روسیه به د سوریې په خان شیخون سیمه کې د رامنځته شوې پېښې په اړه د نړیوالو څېړنو غوښتنه وکړي.
پوتین زیاته کړه، هېواد بهیې په هاګ کې د ملګرو ملتونو له ادارو وغواړي چې په دې اړه هر اړخیزې څېړنې وکړي او د څېړنو د نتایجو په پام کې نیولو سره پرېکړه وکړي.
د روسیې ولسمشر همدارنګه ادعا وکړه چې هېواد یې له بېلابېلو استخباراتي ادارو معلومات ترلاسه کړي چې ښيي د دمشق د څنډو پهشمول د سوریې په نورو برخو کې هم همداسې پارونکي اقدامات په پام کې دي.
د نوموړي په وینا داسې ځایونه چې ښايي زهرجن کیمیاوي مواد پهکې وکارول شي او پړهیې د سوریې پر حکومت واچول شي.
د امریکا متحده ایالاتو د خان شیخون په ښارګوټي کې د کیمیاوي وسلې د کارولو د ادعاوو په ځواب کې د اپرېل په اوومه نېټه لسګونه کروز توغندي د سوریې پر یوې پوځي هوايي اډې وویشتل.
سوریه کې د کیمیاوي وسلې مشکوکې حملې ۷۲ تنه وژلي
واشنګټن ویلي له همدې پوځي اډې څخه د سوریې ادلب کې پر خان شیخون ښارګوټي برید شوی.
د امریکايي چارواکو په وینا د تېرې سې شنبې په ورځ د خان شیخون په ښارګوټي کې د ماشومانو پهشمول تر اتیاوو زیات کسان وژل شوي وو.