د ملي یووالي حکومت د موافقې په اړه د امریکا د بهرنیو چارو د وزیر وروستیو څرګندونو د مشرانو جرګې د یو شمېر غړو غبرګونونه را پارولي دي.
دغو سناتورانو د یکشنبې په ورځ وویل چې د اوسني حکومت د سیاسي هوکړه لیک په اړه د جان کري دریځ د افغانستان د اساسي قانون خلاف دی.
د امریکا د بهرنیو چارو وزیر جان کري پرون په کابل کې وویل، د ملي وحدت حکومت موافقه د دوو نه بلکې د پنځو کلونو لپاره ده.
مشرانو جرګه وایي، د ملي یووالي حکومت د موافقې په اړه د امریکا د بهرنیو چارو د وزیر جان کري وروستۍ څرګندونې د دې هېواد په کورنیو چارو کې ښکاره لاسوهنه ده.
د دې جرګې مشر فضل هادي مسلمیار د یکشنبې ورځې په عمومي غونډه کې وویل چې د افغانستان د برخلیک په اړه دا ډول پریکړې د شرم وړ دي.
ښاغلي مسلمیار زیاته کړه:
"زه افسوس کووم او عار یې ګڼم چې د یوه بهرني هېواد د بهرنیو چارو وزیر راځي او موږ ته برخلیک ټاکي دا موږ ته د عیب خبره ده دا د افغانستان په کورنیو چارو کې ښکاره لاسوهنه ده، دا کار خپله جمهور رییس او اجراییه ریس هم کولای شول چې خلکو ته یې ډاډ ورکړی و."
د ملي یووالي حکومت موافقه څه باندې یو نیم کال مخکې د ولسمشرۍ د دوو مخکښو کاندیدانو محمد اشرف غني او عبدالله عبدالله ترمنځ د جان کري په حضور کې لاسلیک شوه.
د امریکا د بهرنیو چارو وزیر جان کري د شنبې په ورځ کابل ته په خپل سفر کې د ملي یووالي له حکومته د امریکا د دوامداره ملاتړ ترڅنګ وویل چې د ولسمشر او اجراییه رییس ترمنځ سیاسي هوکړه لیک د پنځو کلونو لپاره دی.
پخوا تر دې افغان چارواکو ویل چې د ملي یووالي حکومت موافقه د دو کلونو لپاره ده او د دوو کلونو له پوره کیدو وروسته به لویه جرګه را غوښتل کیږي او اجرائیه ریاست به صدارت ته اړوي.
د ملي یووالي حکومت موافقه څه باندې یو نیم کال مخکې د ولسمشرۍ د دوو مخکښو کاندیدانو محمد اشرف غني او عبدالله عبدالله ترمنځ د جان کري په حضور کې لاسلیک شوه.
افغان سناتوران وایي، د هېواد مهمې سیاسي چارې باید خپله افغان چارواکي فیصله کړي نه بهرنیان.
دوو تنو سناتورانو امنې افضلي او محي الدین منصف وویل:
"د دې څرګندونو پرځای باید دوی له موږ سره د سولې په برخه کې هڅه وکړي پر پاکستان فشار راوړي ترڅو وسله وال مخالفان د خبرو میز ته کیني.
-زما په نظر دا د شرم وړ خبره ده چې د یوه بهرني هېواد د بهرنیو چارو وزیر راځي او زموږ د جمهوري ریاست موده تمدیده کړي، د جان کري څرګندونې د افغانستان په کورنیو چارو کې ښکاره لاسوهنه ده."
د امریکا د بهرنیو چارو وزیرجان کري د افغان حکومت د پایښت خبره په داسې حال کې کوي چې له دې حکومته د خلکو شکایتونه ورځ تربلې زیاتيږي.
د ملي یووالي حکومت له جوړېدو سره سم خلکو ته د هر اړخیزو اصلاحاتو، له فساد سره د مبارزې او ښې حکومتولۍ ژمنې ورکړې وې، خو سناتور ګل احمد اعظمي وایي، په همدې برخو کې د ژمنو نه عملي کیدو پر حکومت د خلکو باور کم کړی دی.
ناجیه ساپۍ