د افغانستان د خبریالانو مرکز ویلي چې د طالبانو له‌خوا د شمشاد خصوصي راډیو - تلویزیون د خپرونو درول د یوې خپلواکې رسنۍ په چارو کې «روښانه او مستقیمه لاسوهنه» ده.

دغه مرکز د یوې سرچینې له قوله چې له کابل څخه یې خبرې کړې، ویلي چې د طالبانو د استخباراتو ادارې په امر د جمعې په ورځ، د تلې ۲۵مه (اکتوبر ۱۷مه) د شمشاد د خپرونو مخه ونیول شوه.

د سرچینې په وینا، طالبانو شمشاد تلویزیون تورن کړی چې د طالبانو او د پاکستاني ځواکونو ترمنځ د وروستۍجګړې او د پاکستان له خوا پر افغانستان د هوايي بریدونو په اړه یې “دقیق او یې پرې” راپورونه نه دي خپاره کړي، او د پاکستان پر وړاندې “ یې د طالبانو د حکومت د دریځ او اقداماتو په کافي اندازه” دفاع نه ده کړې.

تر اوسه د طالبانو حکومت د شمشاد د خپرونو د بندېدو په اړه رسماً څه نه دي ویلي، او د شمشاد تلویزیون چارواکو هم تر اوسه په دې اړه تبصره نه ده کړې.

په قطر کې د طالبانو او پاکستان چارواکو په سمدستي اوربند موافقه کړې او تمه ده راتلونکی پړاو خبرې په استانبول کې وکړي.

د قطر د بهرنیو چارو وزارت په دې اړه په خپل بیان کې ویلي چې دواړه خواوو په یوه سمدستي اوربند او داسې یوه میکانیزم موافقه وکړه چې د دغو هېوادونو تر منځ دایمي سوله او ټیکاو رامنځته کړي.

د طالبانو د حکومت ویاند ذبیح الله مجاهد هم په خپله ایکس پاڼه په یوه بیان کې د دې خبرو د منځګړتوب لپاره د قطر او ترکیې د هڅو مننه کړې.

ښاغلی مجاهد وايي دواړو خواوو توافق وکړ چې د یوبل پر وړاندې به د دښمنۍ عمل نه کوي او د هغو ډلو د حملو ملاتړ به نه کېږي چې د پاکستان د حکومت مخالفان دي.

د قطر په خبرو کې د طالبانو د پلاوي مشري مولوي محمد یعقوب مجاهد او د پاکستان د پلاوي مشري خواجه محمد آصف کوله.

د پاکستان دفاع وزیر خواجه اصف په خپله ایکس پاڼه په بیان کې بیا لیکلي چې د دې توافق د جزییاتو په اړه د بحث لپاره به د خبرو بل پړاو د اکتوبر په ۲۵مه په استانبول کې وي.

د طالبانو او پاکستاني پوځیانو ترمنځ د ډیورنډ کرښې په اوږدو کې جګړه هغه مهال پیل شوه چې پاکستان د افغانستان په خاوره کې هوايي حملې وکړي.

د افغانستان او زمبابوې د کرکټ ملي ټیمونه سبا سه دوشنبه خپله ټیسټ لوبه پيلوي.

لوبه به د زمبابوې په هرارې کې پیل شي چې تر جمعې به دوام وکړي.

راشدخان دې ټیسټ لوبه کې نشته. کرکټ بورډ ویلي خان به دې یواځینۍ ټیسټ لوبه کې د هغه د ارامتیا او راتلونکو ښو نړیوالو لوبو په خاطر ونه لوبیږي خو په شل اووریزو لوبو کې برخه اخلي.

تر ټیسټ لوبې وروسته به دواړه لوبډلې درې شل اووریزې لوبې هم وکړي.

د حکومت ویاند ذبیح الله مجاهد د دې خبرو د منځګړتوب لپاره د قطر او ترکیې د هڅو مننه کړې او پر خپله ټویټر پاڼه په یوه بیان کې یې ویلی دي چې افغان او پاکستاني لورو هغه سند هم لاسلیک کړی دی چې له مخې یې دواړه هېوادونه سولې، یوبل ته د احترام او ګاونډیتوب د ښو اړیکو پر ژمنه تاکید کوي.

د قطر په خبرو کې د دواړو هېوادونو د پلاوو مشري د دفاع وزیرانو ملامحمدیعقوب مجاهد او خواجه محمدآصف کوله.

ښاغلی مجاهد وايي دواړو خواوو توافق وکړ چې د یوبل پر وړاندې به د دښمنۍ عمل نه کوي او د هغو ډلو د حملو ملاتړ به نه کېږي چې د پاکستان د حکومت مخالفان دي.

ویاند دا هم ویلي دي چې په راتلونکي کې به د منځګړو په وساطت داسې میکانیزم رامنځ ته کېږي چې دوه اړخیزې ادعاوې وڅېړي او توافق عملي کړي.

د پاکستان دفاع وزیر پر خپله ایکس پاڼه لیکلي دي چې د دې توافق د جزییاتو په اړه د بحث لپاره به د خبرو بل پړاو د اکتوبر په ۲۵مه په استانبول کې وي.

د قطر د بهرنیوچارو وزارت هم نن سهار وویل چې د افغانستان او پاکستان پلاوو د شنبې په ورځ د قطر او ترکیې په منځګړتوب په دوحه کې د خبرو پرمهال پر سمدستي اوربند موافقه کړې ده.

د طالبانو او پاکستاني پوځیانو ترمنځ د ډیورنډ کرښې په اوږدو کې جګړه هغه مهال پیل شوه چې پاکستان د افغانستان په خاوره کې هوايي حملې وکړي.

د جرمني د مونشن ښار د هوايي ډګر د ځغاست لیکه پرون شنبې ظاهرا د یوه مشکوک فعالیت له خبرداري وروسته وتړل شوه.

د جرمني د خبري آژانس ډي پي اې د راپور له مخې دا اقدام وروسته له هغه وشو چې یوشمېر کسانو پولیسو ته راپور ورکړ چې یو مشکوک شی یې هلته لیدلی دی خو څرګنده نه شوه چې آیا دا راپورونه یوځل بیا هوايي ډګر ته نژدې د بې پیلوټه الوتکو د لیدل کېدو په اړه و، که نه.

د روانې اکتوبر میاشتې په پیل کې هم د مونشن د هوايي ډګر په شاوخوا کې د بې پیلوټه الوتکو تر لیدل کېدو وروسته په دې هوايي ډګر کې الوتنې د دوو پرله پسې شپو لپاره ځنډول شوې وې.

اوکرایني چارواکي وايي چې روسیې تېر ماښام د اوکراین پر بېلابېلو ښارونو څو حملې وکړې.

د آزادۍ راډیو د خبر د مرکزي څانګې د راپور له مخې اوکرایني چارواکو ویلي چې خارکییف، سومي او زاپوریژیا هغه سیمې دي چې د روسیې جنګي الوتکو یې ښارونه له لیرې لارې د اداره کېدونکو بمونو په وسیله په نښه کړي دي.

د اوکراین د بېړنیو خدماتو ادارې اعلان کړی چې د خارکییف سیمې د لوزووا ښار د استوګنې پر یوه سیمه د برید پرمهال څلور تنه ټپیان شوي دي.

د راپورونو له مخې د روسیې بې پیلوټه الوتکې په چرنیهو او دنیپروپیتروفسک ښارونو کې هم لیدل شوې دي. د دې حملو د تلفاتو په اړه جزییات نه شته خو د انرژۍ د یوه سیمه ایز شرکت د چارواکو په وینا په چیرنیهو کې د دوی د انرژۍ د تاسیساتو یوه برخه په نښه شوې ده.

د دې پېښې په نتیجه کې د اوکراین د شمال د شاوخوا ۱۷ زره اوسېدونکو لپاره د بریښنا جریان پرې شوی دی.

د امریکا د بهرنیوچارو وزارت وايي، داسې موثق راپورونه شته چې حماس ډله په غزه کې د ملکي وګړو پرضد د یوه برید لپاره د تیارۍ په حال کې ده.

د فرانسپرس خبري آژانس د راپور له مخې د امریکا د بهرنیوچارو وزارت د شنبې په ورځ په یوه بیان کې ویلي دي چې د ملکي فلسطینیانو پرضد د حملې دا پلان د اوربند مستقیمه او جدي سرغړونه ګڼل کېږي او هغه د پام وړ پرمختګ به ډېر کمزورې کړي چې د منځګړو د هڅو په نتیجه کې ترلاسه شوی دی.

بیان زیاتوي، که حماس ډله چې امریکا او اروپايي ټولنه یې یوه تروریستي ډله بولي دا حمله ترسره کړي نو د غزې د خلکو د ساتنې او د اوربند د اعتبار د خوندیتوب لپاره به تدابیر ونیول شي.

د کریکټ نړیوالې شورا ( ای.سي.سي) په پکتیکا کې د د افغانستان د کورني کریکټ د دریو لوبغاړو په وژلو ژوره خواشیني څرګنده کړې او پر هغوی شوی برید یې غندلی دی.

دغې شورا نن شنبه په یوه خبرپاڼه کې ویلي چې د کبیر اغا، صبغت الله او هارون په نوم دغه کریکټران هغه مهال ووژل شول چې له یوې لوبې وروسته یوه کور ته ستانه شوي وو.

دغه کریکټران او لږ تر لږه ۷ نور ملکیان پرون جمعه د پکتیکا په ارګون ولسوالۍ کې د پاکستان د هوایي برید له کبله ووژل شول.

د افغانستان کریکټ بورد، د کریکټ د ملي لوبډلو لوبغاړو او ګڼ شمېر نورو کسانو دا برید غندلی دی.
کریکټ بورد له همدې برید وروسته پاکستان سره د راتلونکې نومبر میاشتې سیالۍ هم لغو کړي، هغه درې اړخیزې سیالۍ چې ټاکل شوې وه د پاکستان، سریلانکا او افغانستان ترمنځ وشي.

یوه زلزله، چې شدت یې د ریښتر په حساب څلورنیم و، نن ماسپښین د افغانستان او پاکستان ترمنځ سیمې ولړزولې.

د جرمني د زلزله پېژندنې ادارې د راپور له مخې، د دې زلزلې مرکز د افغانستان له پولې نژدې ۶ کیلومتره او د تاجکستان له پولې ۴۴ کیلومتره لیرې، په خیبرپښتونخوا کې و.

د زلزلې مرکز د مځکې له سطحې ۱۰ کیلومتره لاندې ثبت شوی دی.

تراسه پورې د دې زلزلې له کبله د مرګ ژوبلې او تاوانونو په اړه کوم راپور نه دی ورکړل شوی.

په وروستیو کې د افغانستان ختیځې سیمې سختو زلزلو وځپلې چې له کبله یې زرګونو کسانو ته مرګ ژوبلې واوښتې.

د افغانستان د شل اوره لوبډلې کیپتان راشد خان د شنبې په ورځ د پاکستان پر هوایي برید سخت انتقاد وکړ .

د راپورونو له مخې، د جمعې په شپه د پکتیکا ولایت په اورګون ولسوالي کې د بمبارۍ په نتیجه کې لږ تر لږه اته تنه ووژل شول چې درې تنه ځوان کرکټران هم پکې شامل وو. په برید کې اووه تنه نور ټپیان شوي دي.

محمد نبي، او فضل حق فاروقي هم دا برید غندلی دی.

د افغانستان کرکټ بورډ د دې برید له کبله له پاکستان سره راتلونکې سیالۍ لغوه اعلان کړې.

د امریکا ولسمشر ډونالډ ټرمپ وايي، لا وختي دی چې اوکراین ته «ټاماهاک» توغندي ولېږي، او هیله لري چې تر هغې وړاندې وکولای شي له روسیې سره د سولې موافقه ترلاسه کړي.

ټرمپ د جمعې په ورځ، د تلې ۲۵مه (اکتوبر ۱۷مه)، په سپینه ماڼۍ کې د اوکراین له ولسمشر ولودیمیر زیلنسکي سره د لیدنې پر مهال خبریالانو ته وویل:

«هیله لرم چې موږ ورته اړتیا پیدا نه کړو. هیله لرم چې پرته له دې چې حتی د ټاماهاک توغندیو په اړه فکر وکړو، وکولای شو دا جګړه پای ته ورسوو.»

ټرمپ همداراز د امریکا د پوځي چمتووالي په اړه د اندېښنو یادونه وکړه او ویې ویل چې د اوکراین د دوامداره ملاتړونو لړۍ کېدای شي د امریکا دفاعي ظرفیتونه تر فشار لاندې راولي.

کله چې له هغه وپوښتل شول که امریکا په خپله یوې جګړې ته ورګډه شي او د ټاماهاک توغندیو ته اړتیا پیدا کړي، څه به وکړي؟ ټرمپ ځواب ورکړ:

«دا په خپله یوه ستونزه ده. موږ په خپله ټاماهاک توغندیو او ډېرو هغو شیانو ته اړتیا لرو چې په تېرو څلورو کلونو کې مو اوکراین ته ورکړي دي. موږ ډېر څه ورکړي دي.»

ټرمپ، چې یوه ورځ وړاندې یې اعلان کړی و د اوکراین د جګړې د پای ته رسولو په هدف به په راتلونکو دوو اوونیو کې په هنګري کې د روسیې له ولسمشر ولادیمیر پوتین سره وګوري، دا ځل وویل چې دا لیدنه به ښايي مخامخ، او د اوکراین له مستقیم ګډون پرته ترسره شي.

هغه د زیلنسکي او پوتین د اړیکو په اړه زیاته کړه:

«دا دواړه ولسمشران یو له بله کرکه لري، او زه غلط نه یم که ووایم وضعیت ډېر، ډېر سخت او پېچلی دی.»