دایران او اسراییل ترمینځ د امریکا په منځګړیتوب دشوي اوربند په دوهمه ورځ نن اوربند ټینګ دی او ددواړه هیوادونو فضا ارامه ښکاري.

اسراییلي چارواکو نن ګهیځ مهال په ولسي خلکو باندې د جګړې اړوند ډیری محدودیتونه لیرې کړل.

تردې څو ساعته مخکې د امریکا ولسمشر ډونالډ ټرمپ په دواړو هیوادونو دپیل په ساعتونو کې داوربند د ماتولو له امله توند انتقاد وکړ او د ارامۍ غوښتنه یې وکړه.

د اسراییلو پوځ وویل چې د محدودیتونود کمولو پریکړه د امنیتي وضعیت له ارزونې وروسته شوې ده.

دغه اقدام په اسراییلو کې ښوونځيو ته اجازه ورکوي چې ټولګي دشاګردانو په مخ پرانیزي او دغه راز خلکو ته دغونډو اجازه هم ورکوي.

بلخوا ، د ایران ولسشمر مسعود پزشکیان وویل چې هیواد یې چمتو دی چې د اوربند په ټینګیدو سره عادي ژوند ته راستون شي.

پزشکیان، په تلویزیوني وینا کې وویل، "له نن ورځې څخه، حکومت او اړوند ادارې به بیارغونه پیل کړي او عادي حالت به بیرته راولي."

وروسته لدې چې امریکايی ځواکونو څو ورځې مخکی دایران اټومی تاسیسات بمبارد کړل ، ولسمشر ډونالډ ټرمپ وايي چې امریکايي چارواکې به راتلونکې اونۍ د ایران له چارواکو سره د اټومي پروګرام په اړه خبرو لپاره وګوري.

ټرمپ د ناټو له کلنۍ غونډې وروسته په هالنډ کې په یوه مطبوعاتي کنفرانس کې ایران ته په اشاره وویل: "موږ به راتلونکې اونۍ له دوی سره خبرې وکړو."

د متحدو ایالاتو ولسمشر زیاته کړه : "یوازینی شی چې موږ به یې [په غونډه کې] وغواړو هغه څه دي چې موږ یې مخکې غوښتنه کوله، دا چې موږ هیڅ اټومي (وسله) نه غواړو."

دتیرې شنبې په ورځ د جون په ۲۱مه د امریکا له دولسو څخه زیاتو B-2 ډوله جنګي الوتکو د ایران د یورانیمو غني کولو او ذخیره کولو تاسیساتو باندې لوی بمونه وغورځول. د امریکا دسمندري پوځ اوبتلونو هم په خپلو توغندیو یو شمیر ځایونه په نښه کړل.

ټرمپ په مطبوعاتي کنفرانس کې وویل چې تاسیسات "ویجاړ شوي"، او د امریکا د استخباراتو لومړنی راپور یې رد کړ چې په کې ویل شوي وو دغه برید ممکن د ایران اټومي پروګرام یوازې د څو میاشتو لپاره تاخیر کړی وي.

چارواکي وايي په کورمه کې په بمي چاودنو کې لږ تر لږه څلور کسان وژل شوي دي او څلور نور ټپیان دي.

د پولیسو یوه چارواکي د چهارشنبې په ورځ د نوم نه ښودلو په شرط دازادی اروپا راډیو/ مشال څانګې ته وویل چې په پیوار شرمه خېلو کې سهار مهال غبرګې چاودنې وشوې چې پکې ځايي خلکو ته مرګژوبله واوښتله. نوموړی وايي، د دوی لومړني معلومات ښيي چې دا د ریموټ کنټرول بم چاودنې وې.

د پاړه چینار د مرکزي روغتون مشر ډاکټر میرحسن جان هم مشال راډیو ته ویلي دي چې هغوی ته څلور ټپی کسان وروړل شوي وو چې د یوه حالت نازک وو او هغه د درملنې لپاره پېښور ته استول شوی دی.

په سیمه کې د پولیسو چارواکو وویل ، دم ګړۍ معلومات نه لري چې د برید تر شا به څوک لاس لري؟ خو پلټنې روانې دي.

کومې وسلوالې ډلې هم ددغه خبر تر لیکلو په دې اړه څه نه وو ویلي.

په کورمه کې د شیعه او سني ډلو او د مختلفو قبیلو ترمینځ خپلمنځي تربګنۍ هم موجودې دي چې کله کله پکې ولسي کسان وژل کېږي.

د ایران د بهرنیو چارو وزارت ومنله چې د امریکا بریدونو د ایران اټومي تاسیساتو ته "د پام وړ زیان" اړولی دی.

د الجزیرې خبرې شبکې د چهارشنبې په ورځ د ایران د بهرنیو چارو د وزارت د ویاند اسماعیل بقاني په وینا راپور ورکړ چې برید د ایران اټومي تاسیساتو ته "ډیر سخت زیان" اړولی دی.

د امریکا ولسمشر ډونالډ ټرمپ د یکشنبې په ورځ اعلان وکړ چې امریکایي الوتکو د فردو، نطنز او اصفهان پر اټومي تاسیساتو درنه بمباري کړ ده.

دا لومړی ځل دی چې د ایران د حکومت یو چارواکي اعتراف کړی چې وروستیو بریدونو دومره زیان اړولی دی.

د موی تای افغان لوبغاړي سید روح الله موسوي د اسیایي لوبو په ترڅ کې د سرو زرو میډال وګاټه.

موسوي د شپیته کیلوګرامه وزن په ګټورۍ کې په پایلوبه کې نن( د جون۲۵ ) خپل تایلنډي سیال ته ماتې ورکړه. ده تر دې مخکې په دوو لوبو کې یوه فلیپیني او یوه ویتنامي ته شکست ورکړی و.

د موی تای دا اتلولي د ویتنام په کوربتوب تیره اونۍ د جمعې په ورځ (جون شلمه) د څلویښت هیوادونو د لوبغاړو ترمنځ پیل شوه چې سبا یې وروستۍ ورځ ده.

د امریکا دفاع وزیر پیټ هیګسیت د هغه حکومتي راپور افشا کیدل تایید کړل چې د امریکا د هوايي بریدونو له امله د ایران دریو اټومي مرکزونو ته د اوښتو زیانونو ارزونه کوي.

پیت هیګیسټ دا راپور ابتدایي او کم باوره وباله. یوشمیر رسنیو راپور ورکړی دی چې د ایران پر دریو اټومي مرکزونو، فوردو، نطنز او اصفهان باندې د امریکایي الوتکو د سرطان د لومړۍ نیټې په بریدونو کې دومره زیان اوښتی چې ایران یې یوازې څو میاشتې له خپل اټومي پروګرامه شاته کړی دی.

دغه استخباراتي راپور د امریکا د متحد ایالتونو ولسمشر ډونالډ ټرمپ هم غندلی دی، دوی دواړو مشرانو، ټرمپ او هیګیسټ نن په هاګ کې د ناټو د سرمشریزې په څنډه کې خبریالانو ته د ایران د درې اټومي مرکزونو د تخریباتو په اړه معلومات ورکړل. ولسمشر ټرمپ وویل، دې بریدونو د ایران اټومي پروګرام تر څو لسیزو پورې شاته غورځولی دی.

د ملګرو ملتو د کډوالو عالي کمشنري( یو این ایچ سي ار) په خپل تازه راپور کې ویلي دي چې د جنوري له لومړۍ نیټې د مې تر یو دیرشمې، شاوخوا دولس لکه افغانان په قانوني او غیرقانوني ډول ایران او پاکستان ته کډوال شوې دي.

د راپور له مخې چې د سې شنبې په ورځ( د جون ۲۴ مه) خپور شو، د روان میلادي کال په لومړیو پنځو میاشتو کې اووه لکه دوه ویشت زره افغانان پاکستان او څلور لکه پنځوس زره ایران ته تللي دي.

( یو این ایچ سي ار) بهر ته د دې کسانو د تګ علت، د نجونو او ښځو پر زده کړو بندیز، ناامني او په افغانستان کې د کاري فرصتونو نشتوالی یاد کړی دی.

دې سازمان په نړیواله ټولنه غږ کړی چې په افغانستان کې باید د رامنځته شوي بحران د جرړو د ایستلو غم وخوړل شي.

د امریکا د بهرنیو چارو وزیر مارکو روبیو وايي چې د ایران پر اټومي تاسیساتو د امریکایي الوتکو تر برید وروسته به ایران به تر ډیرو و نه توانیږي چې اټومي وسلې جوړې کړي.

مارکو روبیو چهارشنبه( جون پنځه ویشتمه) د ناټو د سرمشریزې په څنډه کې د پولیټیکو له ویبپاڼې سره په مرکه کې د امریکا د ولسمشر ډونالډ ټرمپ په پرتله نسبتا محتاطه ارزونه وړاندې وکړه، چې ویلي یې و د امریکا په برید کې د فوردو، نطنز او اصفهان اټومي تاسیسات یو مخ ویجاړ شوې دي.

ښاغلي روبیو زیاته کړه چې ایران نن ورځ د اټومي وسلو له جوړیدو د هغه وخت په پرتله چې ولسمشر ټرمپ زړور ګام واخیست او برید یې وکړ، ډیر لرې دی.

نوموړي بیا وویل چې د امریکا د جنګي الوتکو د بمبارۍ له امله د ایران اټومي تاسیساتو ته د پام وړ زیان اوښتی دی او امریکا په دې اړه د نورو معلوماتو د ترلاسه کوله لټه کوي.

د امریکا د دفاع وزارت د دفاعي استخباراتو ادارې د لومړني راپور له مخې، چې پرون د CNN لخوا افشا شو، د سرطان د لومړۍ نیټې د برید له امله د ایران اټومي هڅې څو میاشتې شاته لویدلې دي، خو روبیو دا راپورونه رد کړل او ویې ویل چې دا راپورونه بشپړ تصویر نه وړاندې کوي.

تمه ده چې د امریکا استخباراتي ادارې به په راتلونکو ورځو او اونیو کې په دې اړه نورې ارزونې وکړي.

د افغانستان د موی تای لوبغاړی سید روح اله موسوي به د اسیایي اتلولۍ په پایلوبه کې له خپل تایلنډي لوبغاړي سره مخامخ شي.

د شپيه کیلوګرامه وزن په ګټګورۍ کې به دا سیالي نن په ویتنام کې ترسره شي.

موسوي په خپلو تیرو دوو لوبو کې یوه فلیپیني او یوه ویتنامي لوبغاړي ته ماتې ورکړه.

د موی تای دا اتلولي د ویتنام په کوربتوب تیره اونۍ د جمعې په ورځ (جون شلمه) د څلویښت هیوادونو د لوبغاړو ترمنځ پیل شوه چې سبا یې وروستۍ ورځ ده.

د چین په جنوب لویدیځ کې د سختو سیلابونو له امله له ۸۰،۰۰۰ څخه زیات خلک له خپلو کورونو وتلي دي.

د چین دولتي خبري اژانس شینهوا راپور ورکړی چې د ژغورنې کارکوونکي په سیمه کې دي.

چین د اقلیم له پلوه د سخت اوړي تجربه کوي.

پدې اونۍ کې، په بیجینګ کې چینایي چارواکو د کال دترټولو ګرمې ورځې خبرداری ورکړ.

تیره اونۍ د سخت باران له امله لسګونه زره خلک د هونان له مرکزي ولایت څخه ایستل شوي وو.

د امریکا ولسمشر ډونالډ ټرمپ د ناټو دمشرانو په کلنۍ غونډه کې د ګډون لپاره هالنډ ته تللی دی .

تمه ده چې اروپایي متحدین د واشنګټن د راضي کولو لپاره په خپلو دفاعي لګښتونو کې د پام وړ زیاتوالي ژمنې وکړي.

ټرمپ د کلونو راهیسې د ناټو په تړون کې اروپايي متحدینو باندې د لږو مالي ونډو له کبله انتقاد کړی دی او تور یې لګولی دی چې دوی دامریکا دامنیتی چتر څخه وړیا استفاده کوي او حتی له تړون څخه د امریکا د وتلو پوښتنه یې هم راپورته کړې ده.

ټرمپ غوښتنه کړې چې متحدین دې د (GDP) ، یا ناخالص کورني تولید تر ۵ فیصده په دفاعی چارو ولګوي ، چې دا په ۲۰۱۴ کال کې د ټاکل شوي ۲ فیصدو څخه لوی زیاتوالی دی.

د مشرانو د روانې غونډې د اعلامیې یوه مسوده د تړون د مشترکې دفاع په پنځمې مادې ټینګار سره وايي چې د ناټو غړي به تر ۲۰۳۵ کال پورې د دفاعي لګښتونو کچه ۵ فیصدو ته لوړه کړي.