د لبنان المیادین تلویزیون، چې په تهران کې دفتر لري، هم د یکشنبې په ماسپښین په تهران کې د درنو چاودنو راپور ورکړ.
په ټولنیزو رسنیو کې خپاره شوي انځورونه او ویډیوګانې هم ښکاري چې د تهران له څو ځایونو څخه چاودنې او لوګي پورته کېږي.
د ایران دولتي رسنیو لا تر اوسه په دې اړه راپور نه دی خپور کړی.
د اسراییلو ۱۲م چینل ویلي چې د سپاه پاسداران اډې او د هوايي دفاع سیسټمونو پورې اړوند ودانۍ یې هدف وې، چې د لسګونو جنګي جټ الوتکو لخوا پرې برید شوی.
په تل ابیب او بیت المقدس کې د خطر زنګونه لګېدلي
د اسراییلو پوځ د یکشنبې په ورځ اعلان وکړ چې ایران د بریدونو په یوه نوې څپه کې په اسراییلو راکټونه توغولي دي.
د ایران دولتي رسنۍ دا هم وویل چې د ایران د راکټ بریدونه د هیواد له مختلفو برخو څخه پیل شوي دي.
د اسراییلو پوځ په یوه بیان کې وویل چې "هوایي ځواک اوس مهال د ګواښ د مخنیوي او شنډولو لپاره عملیات ترسره کوي."
د ایراني ولسمشر نوی خبرداری
د ایران ولسمشر مسعود پزشکیان ویلي که د اسراییلو بریدونه دوام پیدا کړي له لا کلک غبرګون سره به مخ شي.
پزشکیان نن د دولت په کابینه کې دا خبرې کړي.
هغه په متحده ایالاتو تور ولګاوه چې اسراییلو ته یې شین څراغ ورکړی چې "په سیمه کې پرته له کوم محدودیت څخه هر ډول جرم ترسره کړي."
مګر د متحده ایالاتو ولسمشر ډونالډ ټرمپ او د بهرنیو چارو وزیر مارکو روبیو دواړو د اسراییلو او ایران ترمنځ په شخړه کې د متحده ایالاتو ښکیلتیا رد کړې ده.
دوی تهران ته هم خبرداری ورکړی چې په سیمه کې د امریکا اډې یا پوځي ځواکونه په نښه نه کړي.
