په ګراز او په اتریش کې داسې پېښې بې سارې بلل کېږي.
په دې برید کې ګڼ خلک سخت ټپیان شوي هم دي او روغتونو ته رسول شوي.
د اتریش صدراعظم کریسټین سټوکر دا برید "یوه ملي تراژیدي وبلله چې ټول هیواد یې کلک ولړزاوه."
«د هغه درد او غم لپاره هیڅ کلمې نشته چې موږ ټول - ټول اتریش – یې همدا اوس احساس کوو»د اتریش صدراعظم
د اتریش ولسمشر الکساندر وان ډیر بیلن وویل چې "دا وحشت په الفاظو کې نه شي بیانیدلی."
وژل شوي « هغه ځوانان وو چې خپل ټول ژوند یې مخکې درلود. یو ښوونکی چې د دوی په سفر کې ورسره ملګری و،»
پولیسو وویل چې تورن بریدګر یوازې عمل کړی او د هغه انګېزه نامعلومه ده.
د اتریش رسنیو راپور ورکړ چې مشکوک بریدګر یو ۲۲ کلن پخوانی زده کوونکی وو.
د اروپايي هېوادونو مشرانو په دې پېښې ژوره خواشیني ښوولې ده.
د اروپايي ټولنې لوړ پوړې ډیپلوماتې کایا کالاس ویلي دې پېښې سخت ټکان ورکړ. هغې په خپله ایکس پاڼه په بیان کې زیاته کړې: « هر ماشوم باید په ښوونځي کې خوندي احساس وکړي او د ویرې او تاوتریخوالي څخه پرته زده کړه وکړي.»
د اروپايي کمیسیون مشرې اورسولا وان دیر لاین ویلي: "د ګراز خبرونه مې زړه ماتوي."
د ایټالیا صدراعظمې جورجیا میلوني تر دغه "غمجن خبر" وروسته د قربانیانو له کورنیو سره خپله خواخوږي څرګنده کړه.
په اتریش کې چې د نړۍ په لسو خوندي هېوادونو کې حسابیږي داسې بریدونه کمساري بلل شوي.
په ښوونځیو کې وسله والې حملې په ټوله کې د امریکا متحده ایالاتو په پرتله په اروپا کې ډیرې غیر معمولي دي مګر په وروستیو کلونو کې د اروپا په ښوونځیو او پوهنتونونو کې د بریدونو پېښې زیاتې شوي چې اکثر یې د چارواکو په خبره له ترهګرۍ سره تړاو نه لري.
د فرانسې په ختیځ کې د نوجینټ په سیمه کې هم نن سه شنبه یوه بریدګر د یوه ښوونځي یو کارکوونکی په چاقو سره وژلی دی.
د ۲۰۲۵ کال په جنوري کې، یو ۱۸ کلن ځوان د سلواکیا شمال ختیځ کې په یوه ښوونځي کې د لیسې یو زده کوونکی او یو ښوونکی په چړو ووژل.
د ۲۰۲۴ کال په دسمبر کې، یو ۱۹ کلن بریدګر د کروشیا په زاګرب کې په یوه لومړني ښوونځي کې یو اووه کلن زده کوونکی په چاقو وواهه او څو نور یې ټپیان کړل.
د ۲۰۲۳ کال په دسمبر کې، د پراګ په چارلس پوهنتون کې یوه وسله وال بریدګر ۱۴ کسان ووژل او ۲۵ نور یې ټپيان کړل.
هغه کال، یو ۱۳ کلن هلک د بلګراد په ښار کې په یوه لومړني ښوونځي کې خپل اته ملګري ټولګیوال او یو امنیتي ساتونکی په ډزو ووژل. شپږ ماشومان او یو ښوونکی یې ټپيان کړل.
