د طالبانو د بهرنیو چارو وزارت په یوه بیان کې ویلي چې ښاغلي متقي په دې لیدنه کې د افغان کډوالو په جبري ایستلو باندې خپله ژوره خواشیني او اندېښنه څرګنده کړې.
امیر خان متقي همداراز له ښاغلي دار غوښتي چې هلته د مېشتو افغان کډوالو د حقونو د ضایع کېدو مخه ونیسي.
د اسحق دار په حواله ویل شوي چې اجازه نه ورکوي له افغان کډوالو سره ناوړه چلند وشي. هغه همداراز هوډ ښوولی چې د افغان کډوالو شتمنۍ به څوک نه شي ایسارولی او پاکستاني پوځیان به د هر ډول خپلسري عمل مخه ونیسي.
تر متقي وروسته ښاغلي دار په ارګ ماڼۍ کې د طالبانو له رییس الوزرا ملا محمد حسن اخوند سره پر سوداګرۍ، امنیت او سیمه ییز اتصال باندې خبرې کړي دي.
د پاکستان د بهرنیو چارو وزارت په یوه بیان کې ویلي چې دواړو خواو په لوړه کچه د تماس پر دوام ټینګار کړی دی.
د پاکستان د بهرنیو چارو وزیر په داسې حال کې کابل ته تللی چې پاکستان په تیرو ۲۰ ورځو کې په لسګونو زره افغان کډوال ایستلي دي.
د پاکستان د کورنیو چارو وزیر طلال چودري د جمعې په ورځ په یوه خبري غونډه کې وویل چې د اپریل له پیل راهیسې ۸۵۰۰۰ افغانان له پاکستان څخه افغانستان لېږل شوي دي.
خو د طالبانو حکومت دا شمېره شاوخوا ۷۱۰۰۰ ښيي.
