دې کمېټې په خپله پرونۍ ناسته کې د حقاني شبکې له ځینو مشرانو د امریکا د جایزو په لرې کولو کلکې نیوکې وکړې.
د بهرنیو اړیکو د کمېټې مشر براین مسټ وویل حقاني شبکه چې څومره هم اوس د طالب چارواکو په شکل د ځان د سمولو هڅې کوي خو ګڼ امریکايي عسکر یې وژلي دي.
«حقاني شبکه لاهم د متحده ایالاتو لخوا ترهګریزه پېژندل شوې شبکه ده او باید هماغسې چلند ورسره وشي.»د بهرنیو اړیکو د کمېټې مشر براین مست
براین مست زیاته کړه:
«اداره حق لري چې افراد د عدالت لپاره د انعامونو له پروګرام څخه لرې کړي او موږ باور لرو چې کانګرس ته باید د دې پریکړو په خاطر ځواب ووايي. له همدې امله موږ د بهرنیو چارو وزیر ته یو لیک لیږلی چې په دې اړه ترې ځوابونه وغواړو»
مست په خپله هم د امریکا لپاره په افغانستان کې جنګېدلی.
د امریکا د استازیو جرګې د بهرنیو اړیکو کمېټې غړو په اکثریت رایو هغه قانوني تعدیل ته رایه ورکړه چې له بهرنیو چارو وزارت غواړي د افغانستان د پالیسیو په اړه په هر ډول بدلون کې د کانګرس نظر وپوښتي.
امریکا د طالبانو د حکومت د کورنیو چارو وزیر او د حقاني شبکې د مشر سراج الدین حقاني په سر لس میلیونه ډالري جایزه دوه اوونۍ مخکې لغوه کړې ده.
د حقاني نوم لا هم د اف بي ای/د امریکا د فدرال څېړنو د ادارې په لیسټ کې شته.
د امریکا د بهرنیو چارو وزارت څو اوونۍ مخکې تایید کړه چې د طالبانو د کورنیو چارو وزیر سراجالدین حقاني او د حقاني شبکې د دوو مشرانو نومونه د امریکا د څار لاندې کسانو له نوملړ لرې کړي.
دلیل یې دا راوړی چې بهرنیو چارو وزارت هر وخت د عدالت لپاره د جایزو پروګرام ارزوي او اصلاح کوي.
