د ملګرو ملتونو امنیت شورا د پنجشنبې په ورځ د منځني ختیځ په تېره د غزې د وروستي وضعیت په اړه غونډه درلوده.
په دې غونډه کې د ملګرو ملتونو د بشري حقونو عالي کمیشنر وولکر تُرک وویل:
«د اوربند لنډمهاله راحت چې فلسطینیانو پکې د ارام سا اخیستلو فُرصت پیدا کړ له منځه تللی. د غزې د روغتیا وزارت په وینا، د مارچ له لومړۍ نیټې راهیسې، د اسراییلو پوځي عملیاتو له ۱۲۰۰ څخه ډیر فلسطینیان وژلي دي، چې لږترلږه ۳۲۰ ماشومان هم پکې شامل دي.وولکر تُرک
هغه زیاته کړه:
«د استوګنې ودانیو، خیمو، روغتونونو او ښوونځیو بمبارۍ دوام لري. د هغو ځایونو په شمول چې فلسطینیانو ته د ور کډه کولو امر شوی. حتی هغه وخت چې فلسطیني کورنیو اختر لمانځه هم کوم [په بریدونو] کې څه کمی رانغی.»
وولکر تُرک د اسراییلو یو وروستی هوایي برید چې پکې د هغه په خبره پنځلس روغتیاپالان او بشري مرستندویان وژل شوي د وحشت وړ وباله.
د چهارشنبې په ورځ د ملګرو ملتونو په یوه ودانۍ کې چې ویل کېږي د کډوالو یو پنډغالی پکې دی د اسراییلو په هوایي برید کې د حماس تر کنټرول لاندې غزې روغتیا وزارت په خبره لږ تر لږه ۶۰ کسان ووژل شول.
د اسراییلو پوځ بیا وویل دا ودانۍ چې مخکې یو روغتون وو اوس د حماس د قوماندې یو مرکز وو دوی هدف ګرځولی.
حماس چې د امریکا او اروپا له خوا ترهګره ډله ګڼل کېږي د اسراییلو دا ادعا په بشپړه توګه رد کړې ده.
د ملګرو ملتونو د امنیت شورا په غونډه کې د بشري حقونو عالي کمیشنر وولکر تُرک ټينګار وکړ چې په غزه کې باید سمدستي دا بریدونه متوقف او اوربند ټینګ شي.
تر دې مخکې د ملګرو ملتونو سرمنشي انتونیو ګوتریش ویلي چې د اسراییلو په بمباریو او ځمکنیو عملیاتو کې د خلکو د ډېرې زیاتې مرګژوبلې په اړه سخت خواشینی دی او باید سمدستي اوربند ټینګ شي.
اسراییلي چارواکو ویلي چې په غزه کې به خپلو بریدونو ته دوام ورکړي. د اسراییلو صدراعظم بنیامین نتنیاهو د چهارشنبې په ورځ وویل چې غواړي غزه تړانګه برخه برخه کړي او ګام په ګام فشار زیات کړي څو حماس اسراییلي یرغمل بېرته دوی ته وسپاري.
د اسراییلو دفاع وزیر اسراییل کاتز ویلي د جنګ د پای یواځینۍ لار دا ده چې فلسطینیان د حماس غړي وباسي او ټول یرغمل خوشې کړي.
د اسراییلو پوځ د رفح جنوبي ښار او شاوخوا سیمو د بشپړې تخلیې امر هم ورکړی دی.
اسراییلي پوځ ویلي چې غواړي د تصفیې په پرمختلو سره په غزه کې یو امنیتي کوریدور رامنځته کړي.
