د امریکا د استازو جرګې د بهرنیو چارو کمیټې په استماعیه غونډه کې د کانګرس د دواړو ګوندونو، واکمن او اپوزسیون غړیو پریکړه وکړه چې تر هرڅه مخکې باید دې ته لومړیتوب ورکړي چې ایران اټومي وسلې تر لاسه نه کړي.
البته په دې برخه کې اختلاف په ځپل ځای پاتې شو چې واشنګتن باید د دیپلوماسۍ پرځای تر کوم بریده فشار وارد کړي.
جمهوريپالو د ولسمشر ډونالډ ټرمپ د دې پریکړه سخت ملاتړ وکړ چې د اعظمي فشار لاره دې خپله شي.
د فرعي کمیټې مشر جمهوريپال مایک لاولر د اپریل په لومړۍ نیټه د ولسمشر ټرمپ د لومړۍ ولسمشرۍ د دورې د ډير فشار موضوع ته اشاره وکړه او ویې ویل:
« د اعظمي فشار کمپاین د ایران اقتصاد ویجاړ کړ او د دغه هیواد مهمې اقتصادي سرچینې یې وځپلې»
ډیموکراتانو هم د ایران له لورې رامنځته شوی ګواښ تایید کړ خو پر ډیپلوماسۍ یې ټینګار وکړ.
د ډیموکرات ګوند غړي ګریګوري میکس وویل، د دواړو ګوندونو غړي دا مني چې ایران د نړۍ د یوه مخکښ دولت په توګه د ترهګرو ملاتړی دی خو موږ باید په ګډه دیپلوماتیک فشارونه زیات کړو.
ولسمشر ټرمپ خبرداری ورکړی دی که چیرته ایران له واشنګتن سره یوې هوکړې ته ونه رسیږي نو بمباري به پرې وکړي. تهران دا ګواښ د سولې او امنیت لپاره توهین بللی دی.
ایران د مارچ په وروستیو کې د ولسمشر ټرمپ هغه لیک ته چې د نوي اټومي تړون لپاره یې پکې د مخامخ خبرو وړاندیز کړی ، ځواب ورکړ او ویې ویل د فشار له امله خبرو ته چمتو نه دی.
امریکایۍ ویبپاڼه ایکسوس راپور ورکوي چې سپینه ماڼۍ د ایران له لورې د غیرمستقیمو خبرو اترو پر وړاندیز جدي غور کوي، په داسې حال کې چې په منځني ختیځ کې خپل پوځي حضور زیاتوي.
ایران ټینګار کوي چې اټومي پروګرام یې سوله ییز دی، خو په ایران کې دننه داسې غوښتنې په زیاتیدو دي چې اټومي وسلې د امریکا د متحده ایالتونو او اسراییل پرضد استعمال کړي.