ډونالډټرمپ وایي د کابل د هوايي ډګر د چاودنې عامل نیول شوی

د امریکا ولسمشر ویلي په ۲۰۲۱ کال کې له افغانستانه د امریکايی سرتیرو د وتلو پر مهال د کابل په هوايي ډګر کې د شوې ځان مرګې برید طرحه کوونکې چې له ۱۳ امریکايي سرتیرو په کې ووژل شول نیول شوی دی. ډونالډ ټرمپ له لوړې وروسته کانګرس ته په خپله لومړنۍ وینا کې وویل، دا د هغو امریکايي سرتېرو کورنیو ته یوه مهمه ورځ ده، چې په دغه حمله کې وژل شوي وو. خو د پاکستان صدراعظم شهبار شریف نن چهارشنبه (د مارچ پنځمه) په خپله اېکس پاڼه لیکلی چې د داعش خراسان څانګې دا نیول شوی لوړ پوړی قومندان شریف الله نومیږي او د افغانستان اوسېدونکی دی. شریف لیکلي چې یاد "مطلوب ترهګر" دوی پر ډېورنډ کرښه د "بریالیو عملیاتو" پر مهال نیولی دی.