د راپورونو په اساس د سالنګونو د لویې لارې له تړل کېدو څلور ورځې تېریږي.
که څه هم د طالبانو د ټولګټو وزارت وايي چې د دې لویې لارې د خلاصون لپاره خپله هڅه کوي خو لا په دې چاره نه دي بریالي شوي.
د دغه وزارت ویاند محمد اشرف حق شناس په خپله ایکس پاڼه په یوه بیان کې ویلي چې د دوی ولایتي ټيمونه او قراردادي شرکتونه د لویو لارو په تېره د سالنګونو په پاکولو لګیا دي.
په سالنګونو کې سلګونه بار وړونکي موټر او چلوونکي یې ایسار ولاړ دي.
د بار وړونکو موټرو چلوونکي وايي د لارې بندېدل دوی ته زیان رسوي ځکه په ګاډو کې یې بار مېوه او ترکاري خرابیږي.
په پروان کې د ایسارو موټر چلوونکو له ډلې تورشاه وايي:
«دلته پروان کې ولاړ یو. لار بنده ده. سالنګ کې واوره شوې. ډېر غټه ستونزه جوړه ده. موټرو کې سبزۍ ډکې دي مالونه دي دا ټول خرابیږي.»
د افغانستان په اکثرو شمالي، مرکزي او لویدیځو ولایتونو کې لویې لارې د درنو واورو په سبب تړل شوي چې د طالبانو د فواید عامې وزارت په خبره ځینې یې بېرته د خلکو په مخ پرانیستل شوي.
د لارو تړل کېدو نه یواځې د موټرو د تګ راتګ مخه نیولې بلکې د ولایتونو مراکزو او روغتونو ته یې د ناروغانو د رسېدو ستونزه هم رامنځته کړې.
د بېلګې په توګه د کاپیسا د څو ولسوالیو لارې د دغه ولایت مرکز ته تړل شوي او په ویډیوګانو کې ښکاري چې له مسافرو ډک لسګونه موټر ایسار پاتې دي.
که څه هم د سړې هوا او د درنې واورې د اورښت له امله د خلکو د احتمالي مرګژوبلې ډېر راپورونه لا نه دي خپاره شوي په فاریابو کې درنو واورو او طوفان لږ تر لږه دوه کسان وژلي.
په فاریاب کې د طالبانو امنیه قومنداني ویلي چې دا دوه کسان د شنبې په شپه په کوهستان ولسوالۍ کې په واوره کې ایسار پاتې او ساه یې ورکړې. د قومندانۍ په خبره څلور څاروي هم له دغو کسانو سره وو چې تلف شوي.
د درنو واورو ورښت په بې سارې توګه هوا هم سړه کړې ده.
د طالبانو تر کنټرول لاندې د هوا پېژندنې ادارې د وړاندوینو په اساس بدخشان، بامیان، غزني، غور او کابل دا اوونۍ تر ټولو سړه هوا تجربه کوي.
په بدخشان کې به هوا تر منفي ۱۹ پورې ټېټيږي. په بامیانو کې بیا هوا تر منفي ۱۷ پورې سړیږي.
په کابل کې هم دا څو ورځې سړه څپه حاکمه ده چې خلک یې له ستونزو سره مخ کړي.
