د ایران د حجاب او عفاف د نوي قانون تصویب ګڼ غبرګونونه پارولي دي.

دا قانون چې تمه کېږي د ایران جمهور رییس مسعود پزشکیان یې توشیح کړي د حجاب د نه رعایت لپاره پر ښځو له ۱۵ میلیونو تر ۱۶۵ میلیونو جریمې وضع کوي.

د راپورونو له مخې، هغه ښځې چې جریمه کېږي د جرمانې د نه ادا کولو په صورت کې له مالي، اداري او ټولنیزو خدمتونو بې برخې کېږي.

د دغه قانون هغې مادې هم ګڼ غبرګونونه پارولي چې بهرني اتباع هم کولای شي د حجاب په برخه کې ښځو ته سپارښتنې وکړي.

که څه هم په ایران کې امر باالمعروف منسوبین باید ایراني تابعیت ولري، خو د همدې قانون په تفسیر کې اشاره شوې چې د قانوني استوګنې بهرني اتباع له دې بنده مستثنی دي.

د ایران څه باندې نوي فیصده بهرني کډوال افغانان دي.

هلته د ملګرو ملتونو د کډوالو د کمېشنرۍ د راپور له مخې، څه باندې څلور میلیونه افغانان اوسېږي چې لږ تر لږه درې نیم لکه یې د ایران قانوني اقامې لري.

اسراییل د فلسطینانو اسلامي جهاد ډله تورنه کړه چې په غزه کې د یوه بل برمته د مړي د پاتې شونو په ورسپارلو کې په ځنډ سره یې له نازک اوربند څخه سرغړونه کړې.

د فرانسپرس په وینا دې ډلې د دوشنبې په ورځ وویل چې د غزې په مرکزي برخه کې د لټون د عملیاتو په ترڅ کې د یوه برمته د مړي ځای په نښه کړی دی. د دې ډلې یوې سرچینې د خپل هویټ د پټ ساتلو په شرط تایید کړې چې دغه مړی د هغو وروستیو دریو یرغملو له ډلې د یوه دی چې د دې ډلې په ولکه کې دي.

د اسراییل د صدراعظم بینیامین نتانیاهو دفتر په یوه بیان کې وویل چې په فوري توګه د موندل شوي مړي نه ورسپارل ډیرجدي او هغه له شوې موافقې څخه یوه بله سرغړونه بولي او غوښتنه کوي چې د یرغمل شویو د وروستیو درې مړي دې هم وروسپارل شي.

د اوکتوبر له لسمې راهیسې، له کله چې د امریکا په منځګړیتوب د اسراییل او حماس ترمنځ پراوربند موافقه شوې، حماس ټول شل ژوندي یرغمل اسراییل ته سپارلي او هم یې د مړو شویو اته ویشتو یرغملو له ډلې د ۲۵ هغو مړي یا د مړي پاتې شونې اسراییل ته ورکړي دي.

روسیې په داسې حال کې پرکییف بیا بریدونه کړي چې د راپورونو له مخې امریکایي چارواکي په ابوظبي کې له روسي او اوکرایني چارواکو سره په جلا کتنو کې هڅه کوي چې په اوکراین کې د جګړې د پای ته رسولو لپاره د امریکا د سولې د وړاندیزشوي پلان په اړه موافقه ترلاسه کړي. د اوکرایني چارواکو په وینا په دغو بریدونو کې لږترلږه شپږکسان وژل شوي او لږترلږه ۱۳ نور ژوبل شوي دي.

په کییف کې چارواکو ویلي چې د روسیې د پوځ په بریدونو کې په ښارکې د هستوګنې نهه پوړیزه او ۲۲ پوړیزه بلاکونه په نښه شوي او هم یې له امله د ښار په یوشمیربرخو کې د اوبو او بریښنا خدمات ګډوډ شوي دي.

روسي چارواکو هم نن سې شنبې د روسیې پرروستوف او کراسنادار سیمو د اوکراین د ډرون بریدونو خبرورکړی او ویلي یې دي چې په دغو بریدونو کې څلورکسان ټپیان او څو کورونه او اپارټمانونه زیانمن شوي دي.

په عین حال کې اوکرایني چارواکي نن سې شنبې ابو ظبي ته لاړل چې له امریکایي چارواکو سره د سویس په جینوا ښار کې د ترسره شویو خبرو په تعقیب نورې خبرې ترسره کړي. د یوشمیرامریکایي رسنیو د راپورونو له مخې امریکایي چارواکي به همدارنګه په ابوظبي کې له روسي چارواکو سره هم وګوري.

د اوکراین ولسمشر ولودومیر زیلینسکي ویلي چې د جینوا په خبرو کې "مهم ګامونه" اخیستل شوي خو له روسیې سره سوله لا هم لرې ده.

هغه دا خبره یوې غونډې ته چې په سويډن کې جوړه شوې وه په یوه ویډیويي اړیکه کې وکړه.

د اوکراین، امریکا او اروپا چارواکو د یکشنبې په ورځ په سویس کې سره ولیدل، دا غونډه وروسته له هغه وشوه چې امریکا د روسیې د نږدې څلور کلن یرغل د پای ته رسولو وړاندیز وکړ.

سپینې ماڼۍ وویل چې له اوکراین سره د جینوا خبرو د جګړې د پای ته رسولو په لور "د پام وړ پرمختګ" کړی او یو تازه چوکاټ یې رامینځته کړی چې د اوکراین حاکمیت به وساتي او د عادلانه سولې لپاره به لاره هواره کړي، که څه هم د امریکا د ۲۸ ټکو پلان کې د بدلونونو جزئیات نه دي ورکړل شوي.

د پاکستان صدراعظم شهباز شریف ویلي د پېښور د ننني برید عاملین باید ژر تر ژره ونیول شي او د قانون منګولو ته وسپارل شي.

هغه د پېښور د سرحدي پولیسو د یوه مرکز مخ ته ځانمرګی برید غندلی او په عین حال کې یې د لا زیاتو مرګژوبلو په مخنیوي کې د پاکستاني پوځیانو «په وخت عمل» ستایلی دی.

د پېښور پولیسو تایید کړې چې د دوی دری ملیشه سرتیري په ننني ځانمرګي برید کې وژل شوي او څلور نور ټپیان دي.

د پېښور د پولیسو مشر میا سعید رسنیو ته ویلي چې ځانمرګي بریدګر د سرحدي پولیسو د مرکز مخ ته برید کړی وو.

هغه ویلي پولیسو دوه نور بریدګر په ډزو سره وژلي دي.

د ملیشه سرحدي پولیسو دغه مرکز د پیښور د ګڼې ګوڼې په یوه سیمه [صدر روډ] کې موقعیت لري او نږدې ورته د پوځ یو مرکز هم پروت دی.

د برید مسولیت تراوسه کومې وسله والې ډلې نه دی منلی.

د اسراییلو پوځ وايي چې د لبنان د پلازمینې بیروت په څنډه کې یې د حزب الله دوهم نمبر مشر هیثم علي طباطبایي په هوایی برید کې وژلی دی.

حزب الله یوه وسله واله ډله او همدارنګه یو سیاسي ګوند دی.

متحده ایالات حزب الله یو ترهګر سازمان ګڼي، او اروپايي اتحادیې یوازې د حزب الله پوځي څانګه په تور لیست کې شامله کړې ده.

د یکشنبې په ماسپښین د اسراییلو له برید څو ساعته وروسته، حزب الله په یوه بیان کې تایید کړه چې هیثم علي طباطبایي، چې د دې ډلې د لوی درستیز په توګه هم پیژندل کیږي، وژل شوی دی.

متحده ایالاتو مخکې د طباطبایي د نیولو په اړه د معلوماتو لپاره د ۵ ملیون ډالرو انعام وړاندیز کړی و.

د لبنان د روغتیا وزارت ویلي چې د اسراییلو په برید کې چې په یوه استوګنیزه ودانۍ شوی، لږ تر لږه پنځه کسان وژل شوي او ۲۸ نور ټپیان شوي دي.

د کاناډا صدراعظم مارک کارني او د جرمني صدراعظم فریدریش میرتس د اوکراین د جګړې او د غزې د وضعیت په اړه خبرې وکړې.

کاناډا او جرمني د یکشنبې په ورځ (د نومبر ۲۳مه) په یوه ګډه اعلامیه کې وویل چې دواړو صدراعظمانو په جنوبي افریقا کې د G20 سرمشریزې په څنډه کې سره ولیدل.

دواړو مشرانو د اوکراین په ملاتړ ټینګار وکړ او ویې ویل چې هر ډول تړون کې باید په مستقیم ډول کیف شامل وي، د هغه هېواد اصلي ګټې خوندي کړي او د امنیت د پام وړ تضمینونه ورکړل شي.

کارني او میرتس د غزې په اړه، د جګړې په پوره پای ته رسولو او هلته په لویه کچه د بشري مرستو پر لېږد ټینګار وکړ.

د غزې د ملکي دفاع اداره وایي، د اسراییل په بېلابېلو بریدونو کې پرون شنبه لږ تر لږه ۲۱ تنه فلسطینیان ووژل شول او لسګونه نور ټپيان شول.

د فرانسپریس د راپور له مخې، حماس او اسراییل یوځل بیا یو بل د نازک اوربند په ماتولو تورن کړي دي.

متحده ایالتونه او اروپایي ټولنه حماس یوه ترهګره ډله بولي.

فرانسپریس لیکلي، د اکتوبر له لسمې راهیسې چې غزه کې د امریکا په منځګړیتوب اوربند نافذ شوی، پرون د لیندۍ لومړۍ تر ټولو خونړۍ ورځ وه.

د اسراییل پوځ وایي " یو وسله وال ترهګر" غزه کې له ټاکل شوې زیړې کرښې اوښتی او پر اسراییلي سرتیرو یې ډزې کړي.

د اسراییل د پوځ په وینا، د دغو ډزو په ځواب کې دوی په غزه کې د دوی ټکو " د ترهګرو" پر پټن ځایونو بریدونه کړي دي.

خپلواکو سرچینو تراوسه په دې اړه څه نه دي ویلي.

په داسې حال کې چې دایران دوه الیوشن الوتکې ، ۷ هیلي کوپټرې او شاوخوا ۴۰۰ کسان دهیواد په شمال ځنګلونو کې د لګیدلی اور د مړه کولو هلې ځلې کوي او بهرنۍ مرسته یې هم غوښتې ،ګاونډۍ ترکې داطفایې الوتکې ورلیږلي دي.

د کسپین سمندرګي په زرکیلومتر ساحل تر آذربایجان پورې دغه ځنګلونه د یونیسکو سازمان لخوا د نړۍ په اثارو کې شامل دي.

دغه ځنګلونه ویل کیږي له ۲۵ تر۵۰ ملیون کلونه عمر لري او څه دپاسه ۳۲۰۰ مختلف النوع نباتات په کې دي.

ایرنا دولتي خبري اژانس رپوټ ورکړ چې هغه اور چې دنومبر میاشتې پیل کې په دغو ځنګلونو کې لګیدلی وو او مړ کړای شو د نومبر په ۱۵ بیا لګیدلی.

دایران دولسمشرمرستیال محمد جعفر قایم پناه د جمعې په ورځ په خپلې ایکسپاڼه کې ولیکل چې ایران د اور دمړه کولو لپاره د دوستو هیوادونو بیړنۍ مرسته غوښتې .

د نیویارک ځوان او منتخب مسلمان ښاروال، زهران ممداني، په سپینه ماڼۍ کې د امریکا له ولسمشر ډونالډ ټرمپ سره ولیدل.

د نیویارک د کیڼ اړخي ډیموکراټ ښاروال او د متحده ایالاتو د جمهوري غوښتونکي ولسمشر ترمنځ د جمعې د ورځې دغه غونډه د تمې خلاف د خندا، ټوکو او د ډونالډ ټرمپ لخوا د ځوان ښاروال په ستاینه پای ته ورسیده.

مخکې له دې چې ممداني ټاکنې وګټي، هغه او ډونالډ ټرمپ په مکرر ډول په یو بل نیوکې کړې وې، او د امریکا ولسمشر د نیویارک د ښاروالي په ټاکنو کې د ممداني د سیال، انډریو کوومو ملاتړ کړی وو.

ممداني څو ځلې د غزې د جګړې په مهال د اسراییلو د ملاتړ او د مهاجرت دمحدودیتونو په اړه د ټرمپ ادارې پر پالیسیو نیوکه کړې وه.

د نیویارک د ښاروالۍ د ټاکنو د کمپاین په جریان کې، ټرمپ ګواښ کړی و چې که ممداني یې وګټي نو دغه ښار به د ملیاردونو ډالرو فدرالي تمویل څخه محروم کړي.

خو د جمعې په ورځ په سپینه ماڼۍ کې د دوی غونډه د ټرمپ د خندا، ټوکو او د ممداني د موسکا څخه ډکه وه.

ډونالډ ټرمپ د غونډې په جریان کې په خپلې دې یوې ژمنې سره ټول حیران کړل چې وویل: "موږ به د هغه سره د هرچا د هیلو په ترسره کیدو کې مرسته وکړو: د یو پياوړي او ډیر خوندي نیویارک د هیلو."

ټرمپ څو ځله د ممداني لپاره په خپله مرسته او ملاتړ ټینګار وکړ، حتی خبریالانو ته یې وویل چې په دې کې "هیڅ ستونزه نشته" چې ممداني دی "مستبد" بللی دی.

زهران ممداني هم د ښي اړخي ولسمشر سره خپله لیدنه "ډیره ګټوره" وبلله او د متحده ایالاتو د مالي او اقتصادي پلازمینې،( نیویارک) لپاره یې د ګډې مینې په اړه خبرې وکړې.

ولسمشر ټرمپ له غونډې وروسته، په خپلې ټولنیزه شبکه کې په یوه پیغام کې ولیکل: "د نیویارک د نوي ښاروال زهران ممداني سره لیدل یو لوی ویاړ و."

ټاکل شوې ده چې د نیویارک نوی ښاروال د ۲۰۲۶ کال د جنوري په لومړۍ نیټه لوړه وکړي.

ایراني رسنیو نن شنبې رپوټ ورکړ چې ددغه هیواد حکومت د هیواد په شمال کې د ځنګلونو د اور د مړه کولو لپاره بهرنۍ مرسته وغوښته.

د کسپین سمندرګي په زرکیلومتر ساحل تر آذربایجان پورې دغه ځنګلونه د یونیسکو سازمان لخوا د نړۍ په اثارو کې شامل دي.

دغه ځنګلونه ویل کیږي له ۲۵ تر۵۰ ملیون کلونه عمر لري او څه دپاسه ۳۲۰۰ مختلف النوع نباتات په کې دي.

ایرنا دولتي خبري اژانس رپوټ ورکړ چې هغه اور چې دنومبر میاشتې پیل کې په دغو ځنګلونو کې لګیدلی وو او مړ کړای شو د نومبر په ۱۵ بیا لګیدلی.

دایران دولسمشرمرستیال محمد جعفر قایم پناه د جمعې په ورځ په خپلې ایکسپاڼه کې ولیکل چې ایران د اور دمړه کولو لپاره د دوستو هیوادونو بیړنۍ مرسته غوښتې .