د امریکا پوځ اعلان کړی چې بي۵۲ ستراتېژیکې بمبارد الوتکې یې منځني ختیځ ته رسېدلي دي او لهدې سره هممهاله اکسیوس وېبپاڼې د "سپینې ماڼۍ لهخوا تهران ته د خبرداري پیغام" په اړه راپور ورکړی دی.
په همدې حال کې اکسیوس وېبپاڼې دا هم ویلي چې، سپینې ماڼۍ په وروستیو ورځو کې تهران ته د اسراییل پر ضد د نوي برید په اړه مستقیم خبرداری ورکړی.
د امریکا مرکزي قوماندۍ (سنتکام) نن سهار (یکشنبه، د لړم په ۱۳مه) اعلان وکړ چې بي۵۲ الوتکې د دې قوماندانۍ د مسوولیت سیمې ته داخلې شوې دي.
سنتکام د بمبارد الوتکو شمېر په شمول نور جزییات نهدي ورکړي او یوازې یې ویلي چې دا الوتکې د امریکا د ماینت له هوايي اډې څخه روانې شوې وې.
دا خبر یوه ورځ وروسته له هغې خپور شو چې، پنتاګون اعلان وکړ د متحدایالتونو دفاع وزیر امر کړی چې، څو بي۵۲ الوتکې، همداراز بېړۍ ماتوونکې بېړۍ او د سونګ رسولو الوتکې منځني ختیځ ته واستول شي.
د پنتاګون په وینا، دا بمبارد الوتکې او بېړۍ منځني ختیځ ته د امریکا د پوځي حضور د پیاوړتیا، د اسراییل د دفاع او د بریدونو د شنډولو له لارې د کړکېچ د کمولو په هدف لېږل شوي دي.
په همدې حال کې اکسیوس وېبپاڼې راپور ورکړی چې سپینې ماڼۍ په وروستیو ورځو کې تهران ته د اسراییل پر ضد د نوي برید په اړه مستقیم خبرداری ورکړی.
سپینې ماڼۍ ویلي، که داسې برید وشي، نو دوی به د اسراییل د کنټرول او د ایران پر ضد د بل ډول برید مخنه ونهشي نیولی.
اکسیوس دا راپور د یوه امریکایي او یوه پخواني اسراییلي چارواکي له خولې ورکړی.
د راپور لهمخې، دا پیغام له تهران سره د امریکا د ګټو ساتونکي هېواد سویس له لارې ایراني چارواکو ته رسول شوی دی.
دغه امریکایي چارواکي چې نوم یې نهدی ښودل شوی، اکسیوس ته ویلي: "موږ ایرانیانو ته وویل چې اسراییل له حملې نهشو راګرځولی او هم ډاډ نهشو ورکولی چې د اسرايیل راتلونکی برید به هم د پخوا په شان دقیق او هدفمن وي."
ده زیاته کړه چې دا پیغام په مستقیم ډول ایراني چارواکو ته لېږدول شوی دی او د اکسیوس په وینا، دا ډول مستقیم پیغامونه ډېر کم افشا کېږي.
یوه پخواني اسراییلي چارواکي ویلي چې، دا پیغام د سویس له لارې چې په ایران کې د امریکا د ګټو ساتنه کوي، ایران ته لېږدول شوی.
څو ایراني چارواکو د پنجشنبې په ورځ ټینګار وکړ چې ایران به اسراییل ته حتماً ځواب ورکړي.
د ایران مذهبي مشر علي خامنهيي چې مخکې یې دا پرېکړه د خپل هېواد د حکومت چارواکو ته پرېښې وه، د شنبې په سهار پر دې ټینګار وکړ چې ایران به امریکا او اسراییل ته یو "کلک او غچ اخیستونکی" ځواب ورکړي.
د ایران د اسلامي شورا د ملي امنیت او بهرنیو اړیکو کمېسیون غړي اسماعیل کوثري ویلي چې، د ایران د ملي امنیت عالي شورا پر اسراییل د برید پرېکړه کړې، خو لا هم د دې برید کره نېټه او اندازه نهده معلومه شوې.
هغه زیاته کړې چې دا برید به د "مقاومت ډلو" په همکارۍ ترسره شي او دا به د پخواني برید پرتله لوی وي.
ایران په سیمه کې خپلو نیابتي ډلو ته "د مقاومت ډلې" وايي.
په وروستیو اوونیو کې د امریکا او لوېدیځ چارواکو ایران ته خبرداری ورکړی چې د اسراییل ځوابي برید ته دې ځواب نه وايي او باید د کړکېچ زیاتوالی ودروي.
ایران په تېرو شپږو میاشتو کې دوه ځله په اسراییل د پراخو توغندويي بریدونو هڅه کړې ده؛ لومړی ځل د حمل ۲۵، او دوهم ځل د تلې په لسمه.
