په پام کې ده چې د افغانستان د موټرسایکل ځغلووونکو یوه ۱۸ کسیزه ډله په یوه نړیواله سیالي کې ګډون وکړي.
باختر خبري آژانس چې طالبان یې اداره کوي پرون خبر ورکړ چې د افغانستان د موټرسایکل ځغلولو فدراسیون ټیم د افغانستان، ایران، پاکستان او سعودي عربستان د ټیمونو ترمنځ په سیالۍ کې د ګډون لپاره پاکستان ته روان شوی دی.
په همدې حال کې د افغانستان د کرکټ ملي لوبډلې پرون د کوربه سریلانکا د لوبډلې پر وړاندې په دوهمه شل اووریزه لوبه کې ماتې وخوړه.
د سریلانکا لوبډلې د شپږو لوبغاړو په سوځېدو سره په شلو اوورونو کې افغان لوبډلې ته د ۱۸۸ منډې وټاکه، خو د افغان لوبډلې ټول لوبغاړي په ۱۷ اوور کې وسوځېدل په داسې حال کې چې یوازې ۱۱۵ منډې یې کړې وې.
د دواړو لوبډلو ترمنځ دریمه او وروستۍ شل اووریزه لوبه د راروانې چارشنبې په ورځ د فبروري په ۲۱مه په پام کې ده.