د اوکرایني ځواکونو اعلی قوماندان اولکساندر سیرسکي اعلان وکړ چې ځواکونه به یې د اوکراین له اودېفکا څخه په بشپړ ډول ووځي.

د اوکراین په دغه ختیځ ښار کې اوکرایني ځواکونه له څلور میاشتو راهیسې له روسیي پوځیان سره په سخته جګړه کې ښکېل وو.

سیرسکي نن پر خپل فېسبوک کې لیکلي چې د اودېفکا شاوخوا د عملیاتي وضعیت له مخې، له محاصرې څخه د پوځیانو د مخنیوي په خاطر او د هغوی روغتیا ته په پام سره ده دا پرېکړه کړې چې خپل پوځي واحدونه له دې ښاره وباسي او په نورو مناسبو دفاعي لیکو کې یې ځای پرځای کړي.

د جګوار لنډرور شرکت به د یوې میاشتې لپاره په بریټانیا کې د تولید شویو موټرو صادرات امریکا ته ودروي.

د رویترز خبري اژانس د راپور له مخې، دا شرکت هڅه کوي داسې حل لارې ومومي څو د امریکا له خوا د وضعه شویو لوړو مالیاتو په وړاندې خپل لګښتونه را کم کړي.

د رویتز په ټکو، امریکا ته د موټرو د احتمالي صادراتو درول، د بریټانیا د موټر جوړونې پر صعنت د منفي اغیزو په اړه انديښنې لا پسې زیاتې کړي دي.

په بریټانیا کې د موټرو په صعنت کې شاوخوا۲۰۰ زره کسان کار کوي.

متحده ایالات له اروپايي ټولنې وروسته په بریټانیا کې د تولید شویو موټرو دویم لوی واردوونکی هېواد دی.

د امریکا ولسمشر ډونالډ ټرمپ وړمه ورځ پر بریټانیا لس سلنه تعرفه وضعه کړه.

په میانمار کې د وروستیو زلزلو له کبله د قربانیانو شمیر ۳۳۰۰ کسانو ته پورته شو.

د دې هېواد د دولتي رسنیو د راپورونو له مخې، شاوخوا۴۵۰۰ کسان ټپیان او ۲۲۰ نور لادرکه دي.

ملګرو ملتونو پر نړیوالو غږ کړی چې له میانمار سره مرستې وکړي.

دې سازمان ویلي، ښايي د وروستیو زلزلو له کبله څه باندې درې میلیونه کسان زیانمن شوي وي.

د مارچ په ۲۷ د ریښتر په کچه ۷،۷ درجې زلزلي د میانمار ډیرې برخې ولړزولې.

د دې زلزلې له کبله د میانمار په ښارونو کې لوې ودانۍ او د استوګنې کورونه ونړیدل چې اوسمهال يې ډیر خلک بې سرپناه دي.

د طالبانو له خوا د دوو زنداني شویو برتانوي اتباعو زوی جانتن رینلډز د امریکا له ولسمشر ډونالډ ټرمپ څخه غواړي چې د مور او پلار په خوشې کولو کې ورسره مرسته وکړي.

په هغه ویډیو کې چې رینلډز ازادي راډیو ته لیږلې، هغه د خپلې لور سره د سپینې ماڼۍ مخې ته ولاړ لیدل کیږي او له ولسمشر ټرمپ څخه د مرستې غوښتنه کوي.

"موږ ته په وار وار ویل شوي چې دوی بې ګناه دي، هیڅ جرم یې نه دی کړی او ډیر ژر به خوشې شي. خو دوی لا هم په زندان کې دي. د برتانیا حکومت موږ ته ویلي چې زما د مور او پلار د خوشې کولو لپاره به په خپل ټول توان سره هرڅه وکړي. خو د یو برتانوي او امریکايي تبعه په توګه، زه دلته ولاړ یم او له تاسو څخه غواړم چې له زندان او له هغه هېواده زما د مور او پلار د ایستلو په برخه کې مرسته وکړئ."

باربي او پیټر رینلډز، یوه برتانوۍ جوړه چې له ۱۸ کلونو راهیسې په افغانستان کې اوسېده، د فبروري په لومړۍ نیټه د طالبانو لخوا ونیول شول.

دوی د زده کړې او د ماشومانو د ساتنې په برخو کې کار کاوه.

د اوکرایین ولسمشر ولودومیر زیلینسکي ویلي په کریويي رییه ښار کې د روسیې په یوه توغندیز برید سره لږ تر لږه ۱۶ کسان وژل شوي.

د هغه په خبره په وژل شویو کې شپږ تنه ماشومان دي.

د اوکرایین د کورنیو چارو وزیر ایهور کلیمنکو هم ویلي چې په دغه برید کې لږ تر لږه ۵۰ تنه ټپيان شوي دي.

په کوم ښار چې اوس روسیې برید کړی د اوکرایین ولسمشر ولودومیر زیلینسکي پکې زیږیدلی.

د دنیپرو پتروفیسک سیمې والي سرهي لیساک ویلي دا برید ۲۰۲۵ کال په اوکرایین کې پر ملکیانو تر ټولو خونړۍ دی.

د اوکراین په شمال ختیځ کې د خارکیف ښار د استوګنې پر ودانیو د روسیې د بې پیلوټه الوتکې د پروني برید له امله لږ تر لږه درې کسان وژل شوي او دوه دیرش نور ټپيان شوې دي.

د سیمې والي اولیه سینیهوبوف په ټیلګرام کې لیکلي دي چې په ټپيانو کې دوه ماشومان دي.

سینیهوبوف زیاته کړه چې د ژغورنې ډلې له برید څو ساعته وروسته هم په کنډوالو کې د ژوندي پاتې شویو کسانو لټه کوي.

چارواکي په دې باور دي چې د جګپوړیو ودانیو تر کنډوالو لاندې به نور خلک هم پاتې وي.

د خارکیف ښاروال ایهور تیریخوف وویل چې روسیي ډرون الوتکو د څلویښت دقیقو په ترڅ کې څه باندې څوارلس حملې وکړې.

د اروپا یوشمیر جګپوړیو دیپلوماتانو د روسیې پر ولسمشر ولادیمیر پوتین انتقاد کړی دی چې د اوکراین د جګړې د پای ته رسولو لپاره د امریکا په مشرۍ د سولې له وړاندیز سره مخالفت کوي.

دا غوښتنه په داسې وخت کې شوې ده چې له څو اونیو خبرواترو وروسته واشنګتن ته هم د کرملین د نیت په اړه اندیښنې پيدا شوې دي.

د جمعې په ورځ، د اپریل په څلورمه، په بروکسل کې د ناټو د بهرنیو چارو وزیرانو د غونډې په دویمه ورځ، یو شمېر لوړ پوړیو اروپايي ډیپلوماتانو په متحدینو غږ وکړ چې پر مسکو فشار زیات کړي چې دې تړون ته غاړه کیږدي.

مسکو تېره میاشت د امریکا د بشپړ ۳۰ ورځني اوربند پلان رد کړ. که څه هم اوکراین او روسیې د یو بل د انرژۍ پر زیربناوو د بریدونو د نه کولو پر سر موافقه کړې وه، خو لاهم دواړه لورې یو بل تورنوي چې له دې تړونه سرغړونې کوي.

د حماس ډلې یو قوماندان حسن فرحات نن د لبان په جنوب کې د هوایي برید پرمهال ووژل شو.

حماس د امریکا متحد ایالتونه او اروپایي ټولنه د ترهګرې ډلې په توګه پيژني.

د رویټرز اژانس د راپور له مخې د حماس د دې قوماندان له وژلو سره په لبنان کې د حزب الله او اسراییل ترمنځ شوی اوربند ممکن اغیزمن کړي.

د اسراییل پوځ وویل چې حسن فرحات پروسږکال د صفد پر ښار د توغندیو د هغه برید مسوول و چې د څو تنو اسراییلي سرتیرو د وژلو او ټپي کیدو سبب شوی و.

د اسراییل پوځ ټینګار کوي چې د حماس غړي چې په هرځای کې فعالیت کوي، په نښه به یې کړي.

په بهرنیو هیوادونو کې د پانګونې او اقتصادي همکاریو په برخو کې د روسیې د ولسمشر ځانګړی استازی وایي، د ماسکو او واشنګتن ترمنځ په اړیکو کې مثبت تحرک لیدل کیږي، خو اختلافات لاهم په خپل ځای دي چې د حل کیدو لپاره یې څو نورو غونډو ته اړتیا شته.

کریل دیمتریف پرون په واشنګتن کې د ولسمشر ډونالډ ټرمپ د ادارې له یوشمیر غړیو سره تر لیدو کتو وروسته ( سي این این) تلویزیون ته وویل چې اوس موږ په دې فکر کوو چې څه کارونه باید ترسره شي چې یوه اوږدمهاله حل لاره ومومو.

د روسیي رسنیو په وینا ښاغلي دمیتریف په واشنګتن کې خبریالانو ته ویلي دي چې له متحده ایالتونو سره په دوه اړخیزو اړیکو کې مثبت بدلون ترسترګو کیږي.

په خپله دیمیتریف په ټیلګرام کې لیکلي دي چې د خبرو اترو رغیدنه ستونزمنه او تدریجي پروسه ده، خو هره ناسته او صادقانه غونډه د دې سبب کیږي چې چارې ښې مخته ولاړې شي.

د اروپایي ټولنې یوشمیر مشران نن په ازبکستان کې دي. دوی به په سمرقند کې د کوربه هیواد ازبکستان، همداراز قزاقستان، قرغزستان، تاجکستان او ترکمنستان له مشرانو سره غونډه وکړي.

په دې غونډه کې د اروپا د اووه ویشت غړیو هیوادو د پلاوي مشري د اروپایي کمیسیون مشره اورزلا ون دیر لین او د اروپایي شورا مسوول انتونیو کاستا کوي.

ون دیرلین تر دې سرمشریزې مخکې وویل چې هیلمنه ده چې د بروکسل او منځنۍ اسیا د هیوادو اړیکي به نوي پړاو ته داخل شي او د ترانسپورټ، طبیعي زیرمو، اوبو او انرژۍ په برخو کې به همکارۍ پراخې شي.

د منځنۍ اسیا د هیوادو خاوره تقریبا د اروپایي ټولنې د هیوادو په کچه ده خو په دغو پنځو هیوادو کې یوازې اتیا میلیونه خلک ژوند کوي چې د ټولې اروپایي ټولنې په پرتله یې نفوس پنځمه برخه کم دی او دا هیوادونه د بهرنیانو پانګونې ته سترګې په لاره دي.

روبیو دا خبره پرون د ناټو یا شمالي اتلانتیک پوځي تړون د بهرنیو چارو وزیرانو په ناسته کې چې په بروکسل کې جوړه شوې وه وکړه.

هغه چې د ناټو د بهرنیو چارو وزیرانو په کنفرانس کې د لومړي وار لپاره ګډون کړی وویل زیاته کړه چې ولسمشر ټرمپ په ښکاره اعلان کړی چې له ناټو ملاتړ کوي او موږ په ناټو کې پاتې کېږو.

اروپايي هېوادونو بیا ویلي چې خپله پوځي بودیجه د پام وړ لوړوي.

د ناټو سرمنشي مارک روت هم تایید کړې چې تېرو څو میاشتو کې دې برخه کې د پام وړ بدلونونه رامنځته شوي دي.