د امریکا د متحدو ایالتونو دفاع وزیر لوید اسټین پرون په بروکسل کې د ناټو د دفاع وزیرانو په جلسه کې وویل، هغه هېوادونه به چې تر اوسه اوکراین ته وسلې لېږلي، خپل دې کار ته دوام ورکوي.
د هغه په وینا دغه هېوادونه غواړي ډاډمن شي، چې اوکراین د اړتیا پر وخت د روسیې د یرغل په وړاندې وړ امکانات په لاس کې لري.
د اسټین په خبره د اوکراین ملاتړو هېوادونو د ټانکونو، مهماتو او د هوايي دفاع د دستګاو په ګډون اوکراین ته د نورو مرستو ورکولو ژمنه کړې ده.
د امریکا دفاع وزیر ویلي، د هغو جنګي جټ الوتکو په اړه کومه بیانیه نهلري، چې اوکراین له خپلو متحدانو غوښتي دي.
د ازادۍ راډیو د خبر مرکزي څانګې په لیکنه، په عین وخت کې د امریکا د ګډو ځواکونو لوی درستیز جنرال مارک میلي پر اوکراین د روسیې د یرغل د کال پوره کېدو ته په اشاره ویلي، روسیه هغه سرتېري او زندانیان جګړې ته لېږي چې د هغه په وینا «پښه یې د ګور پر غاړه» ده.
د میلي په وینا روسیه په ستراتیژیک، عملیاتي او تاکتیکي لحاظ ماته شوې ده.
د مارک میلي په وینا، روسیه په نړۍ کې منفوره شوې، حال دا چې نړۍ د اوکراین له زړورتیا الهام اخیستی دی.
ویل کېږي مسکو یوې اټکل شوې لویې جګړې ته ځان چمتو کوي.
د امریکا د ګډو ځواکونو لوی درستیز زیاته کړې، د هغو هېوادونو شمېر اوس یوولسو ته زیات شوی، چې غواړي اوکراین ته ټانکونه ولېږي، د دې تر څنګ ۲۲ هېوادونو ژمنه کړې، چې اوکراین ته به د پلیو ځواکونو جنګي وسایط لېږي، ۱۶ هېوادونو بیا د توپخانې او نورو مهماتو ژمنه کړې او نهو نور هېوادونه به د هوايي دفاع دستګاوې لېږي.
د ازادۍ راډیو د خبر مرکزي څانګه وايي، پر اوکراین د روسیې د یرغل د کال پوره کېدو په درشل کې روسیې د اوکراین په ختیځ او جنوب کې خپل پوځي عملیات شدید کړي، ځکه ویل کېږي مسکو یوې اټکل شوې لویې جګړې ته ځان چمتو کوي.
اوکرایني چارواکو پرون سېشنبه ویلي چې د روسیي د توپچي ځواک مرمۍ په دونیڅک کې د جګړې پر ټولو کرښو له دې جملې پر باخموت ښار چې د شخړو په مرکز بدل شوی، لګېدلې دي.
د برېتانیا استخباراتو پرون په خپل ورځني راپور کې وویل، چې د روسیې د واګنر شرکت اجیرو جنګیالیو په تېرو درېیو ورځو کې د باخموت ښار په څنډو کې لږ پرمختګونه کړي دي.
د اوکراین د لوی درستیز دفتر پرون په یوه اعلامیه کې وویل، چې اوکرایني ځواکونو د دفاع د پیاوړتیا لپاره اضافي اقدامات کړي دي.
د اعلامیې لهمخې، پرون روسي ځواکونو ۳۲ هوايي او دوې راکټي حملې کړې دي.
