پاکستاني رسنیو راپور ورکړی چې تمه ده په شارجه سټډیوم کې د افغان او پاکستاني نندارهچیانو ځایونه سره جلا شي.
جنګ او جیو ټي وي راپور ورکړی چې د شارجې د سټډيوم مسوولینو دوی ته تایید کړې چې د افغان او پاکستاني ننداره چیانو د احتمالي لانجو د مخنیوي لپاره یې دا پرېکړه کړې ده.
تر اوسه پورې د شارجې د سټديوم منتظمینو او د متحده عرب اماراتو کرېکټ بورډ په دې اړه رسماً څه نهدي ویلي.
تمه ده د افغانستان او پاکستان د کرېکټ ملي ټیمونه د مارچ په وروستیو کې د شارجې په نړیوال سټډيوم کې درې شل اووریزې لوبې وکړي.
تېر سپټمبر د اسیا کپ پر مهال د افغان او پاکستاني ننداره چیانو تر منځ په سټډیوم کې دننه سخت اخ و ډب رامنځته شو.
د راپورونو لهمخې د شارجې پولیسو څه باندې درې سوه افغان نندارهچیان او لسګونه پاکستانیان تر دې پېښې وروسته نیولي وو.
د افغانستان د کرېکټ ملي ټيم لوبغاړي دمګړۍ په اماراتو کې دي او تمه ده همدا پنجشنبه له کوربه هېواد سره خپلې درې شل اووریزې لوبې پيل کړي.