د ازادې اروپا/ازادۍ راډیو مشر جیمي فلای ویلي، ازادي راډیو په هېڅ صورت کریملین ته اجازه نه ورکوي چې د دې راډیو د پالیسۍ لپاره پرېکړه وکړي.
ښاغلي فلای دا غبرګون وروسته تر دې څرګند کړ چې د روسیې د رسنیزو چارو د تنظیم دولتي ادارې (روسکوم ندزور) ګواښ وکړ چې د ازادۍ راډيو ۸ وېب پاڼې به بندې کړي.
د دغې ادارې نېوکه د ازادۍ راډيو د وېب پاڼو په هغو راپورونو ده چې روسیه کې د اداري فساد په اړه شوي دي.
دوی ویلي، که د ازادې اروپا راډیو په روسیه کې د اداري فساد د څېړنو په اړه خپل راپورونه له وېب پاڼو لیرې نه کړي، وېب پاڼې به یې بندې کړي.
دغه وېب پاڼې د روسیې، اوکراین او مرکزي اسیا لپاره خپرونې لري.
د فساد دا څیړنې د کریملین د سرسخته منتقد الکسي ناوالني د موسسې له خوا کېږي، خپله ناوالني اوس زنداني دی.
د روسیې د رسنیو د تنظیم دولتي ادارې د دغو راپورنو د لیرې کولو لپاره ازادۍ راډیو ته څه باندې ۶۰ برښنا لیکونه لېږلي دي او ۲۴ ساعته وخت یې ورکړی چې دا لیکنې لیرې کړي.
د فساد په دغو څېړنیزو راپورونو کې د هغې ماڼۍ په اړه هم ویل شوي چې د ادعاوو له مخې د روسیې د ولسمشر ولادمیر پوتین له خوا د تور سمندر په یوه څنډه کې جوړه شوې ده.
روسي چارواکو دغه لیکنې د سخت دریځۍ او ترهګرۍ ضد قانون څخه سرغړونه بللې ده.
روسیې ورته غوښتنې له څه باندې لسو روسیي نشریو څخه هم کړي دي.
د بشري حقونو د څار نړیوال سازمان تېر دسمبر میاشت کې وویل چې روسي چارواکو د انلاین رسنیو د ازادۍ مخه نیولې او د سانسور هڅه یې کوي.
روسیې له دې وړاندې هم پر ازادې اروپا راډیو او نورو ازادو رسنیو فشارونه راوستلي او عدلیې وزارت یې د دغو رسنیزو بنسټونه خبریالان بهرني اجنټان بللي دي.