د فوټبال نړیوال فدراسیون 'فیفا' له نړیوالې ټولنې وغوښتل چې د افغانستان د لوبغاړو غم وخوري.
روانه میاشت د افغانستان د ښځینه لوبغاړو په ګډون تر یو نیم سل ډېر لوبغاړې له کابله قطر ته انتقال شول.
د فیفا مشر جیانو اینفانتینو فرانس پرېس اژانس ته پرون په پلازمېنه دوحه کې وویل:"زه په اروپا کې په نوره نړۍ کې پر حکومتونو غږ کوم چې له موږ سره مرسته وکړي یو نوی کور دې دې نجونو او د دوی کورنیو ته ورکړي. موږ باید یوازې د خواخوږۍ خبرې ونه کړو موږ باید د مرستو غږ وکړو، موږ باید دا کار ترسره کړو."
د فیفا مشر زیاته کړه چې لا هم په سلګونو افغان لوبغاړې په افغانستان کې دي چې د هغو غم هم باید وخوړل شي.