طالبان کابل ښار ته له ننوتو وروسته ارګ ته دننه شول
طالبان کابل ښار ته له ننوتو وروسته بېګا ماخوستن ارګ ته دننه شول.
الجزیزې ټلوېزیون د هغې غونډې وېډيو په ژوندۍ بڼه خپره کړه چې د محمد اشرف غني یو ځانګړی ساتونکی طالبانو ته د ارګ د سپارلو په اړه خبرې کوي.
د ښاغلي غني دا ساتونکی چې نومیې راپورونو کې جنرال امین یاد شوی وایي چې له ارګه وته، خو د مرکچي پلاوي مشر معصوم ستانکزي ترې وغوښتل چې ارګ کې پاته شي.
دې غونډه کې د طالبانو یو چارواکی له خپلو وسلهوالو ساتونکو سره لیدل کېږي چې په ګلخانې ماڼۍ کې د محمد اشرف غني له ساتونکي سره په ګډه خبرې کوي.
بلېنکن: که طالبان نړیوال رسمیت غواړي، باید د افغانانو حقونو ته درناوی وکړي
د امریکا د بهرنیو چارو وزیر انتوني بلېنکن وایي، که طالبان په نړیوالو توګه د رسمیت پېژندلو غوښتنه لري، باید د افغانانو اساسي حقونو ته درناوی وکړي.
بلېنکن دا خبرې پرون په واشنګټن کې له (اې.بي.سي) نیوز ټلوېزیون سره د مرکې پر مهال وکړې.
بلېنکن زیاتوي: "که طالبان رښتیا هم منل او نړیوال رسمیت پېژندل غواړي او هیله لري چې ملاتړ یې وشي او بندیزونه ترې لیرې شي باید د خلکو اساسي او بنسټیز حقونه مراعات کړي. که دوی په واک کې وي او دا کار ونهکړي، فکر کوم افغانستان به په یوه منفور هېواد بدل شي."
دا څرګندونې وروسته تر دې کېږي چې په دې وروستیو کې له ځینو ولایتونو د طالبانو د بشري سرغړونو راپورونه خپاره شول.
د افغانستان د بشري حقونو کمېسیون هم خپل وروستي راپور کې دې سرغړونو ته اشاره کړې وه، خو طالبانو دا راپور په کلکه رد کړ.
د بریتانیا صدراعظم: هېوادونه دې د طالبانو له رسمیت پېژندلو ډډه وکړي
د بریتانیا صدراعظم وایي، هېڅ هېواد باید طالبان د افغانستان د دولت په توګه په رسمیت ونهپېژني.
د بریتانیا صدراعظم وایي، هېڅ هېواد باید طالبان د افغانستان د دولت په توګه په رسمیت ونهپېژني.
بورېس جانسون وویل، دا واضح ده چې طالبان به ډېر ژر افغانستان کې خپل نوی دولت اعلانوي.
جانسون له لندنه په یوه وېډیویي پیغام کې ویلي: "موږ نهغواړو چې څوک دې طالبان په دوه اړخیز ډول په رسمیت وپېژني، موږ غواړو چې د امکان تر حده د خپلو همفکرو په منځ کې په دې اړه واحد دریځ ولرو، موږ باید هر کار ترسره کړو چې افغانستان یو ځل بیا د ترهګرو د ودې په ځای بدل نهشي."
د بریتانیا صدراعظم د خپل هېواد پارلمان هم د اوړي له رخصتیو راغوښتی چې ژر تر ژره د افغانستان په اړه بحث وکړي.
ده دغهراز د افغانستان په اړه د ملګرو ملتونو د امنیت شورا د بېړنۍ غونډې غوښتنه هم وکړه.
بریتانیا له افغانستانه د خپلو درې زره اتباعو د ایستلو لپاره شااوخوا شپږ زره سرتېري ګمارلي او دوی ویلي چې د سفارت ډېره برخه کارکوونکي هم هېواد ته ستنوي.
بل لور ته بیا ناټو ویلي چې کابل کې خپل سیاسي مأموریت ساتي او د کابل هوایي ډګر په فعاله پاته کېدو کې هم ونډه اخلي.
د ناټو عمومي منشي ینس سټولټنبرګ تېر ماښام پر خپله ټویټرپاڼه ولیکل چې د افغانستان د وضعیت په اړهیې د بریتانیا له صدراعظم او د کاناډا، ډنمارک او هالند له بهرنیو چارو وزیرانو سره خبرې کړې دي.
پر دې سربیره استونیا او ناروې هم پرون د ملګرو ملتونو له امنیت شورا وغوښتل چې د افغانستان په اړه غونډه ترسره کړي.
روسیې هم ویلي چې د افغانستان په تړاو یوه بېړنۍ غونډه جوړوي.
نړیوال د افغانستان په اړه دا بحثونه داسې مهال کوي چې طالبانو د ولایتونو له سقوط وروسته کابل ته مخه کړې او تېر ماخوستنیې وسلهوال د ارګ په دننه کې هم لیدل شوي دي.
اشرف غني: د وینې د سېلاب د مخنیوي لپاره مې هېواد پرېښود
د افغانستان په معاصر تاریخ کې پرون د زمري ۲۴مه د یوه مهم بدلون یا انقلاب د ورځې په نوم ثبت شوه.
د افغانستان ولسمشر محمد اشرف غني پلازمېنې ته د طالبانو له ننوتو سره هممهاله په یوه ځانګړې الوتکه کې له هېواده ووت.
د افغانستان ولسمشر محمد اشرف غني پلازمېنې ته د طالبانو له ننوتو سره هممهاله په یوه ځانګړې الوتکه کې له هېواده ووت.
ښاغلي غني تېر ماخوستن پر خپله رسمي فېسبوک پاڼه په یوه پيغام کې لیکلي، که له کابله نهوی وتلی، دا شپږ ملیوني ښار به له لویې بشري فاجعې سره مخامخ شوی وی او د وینې د سېلاب د مخنیوي لپارهیې غوره وګڼله چې هېواد پرېږدي.
ده ویلي، "د تورې او ټوپک قضاوت طالبانو ګټلی او اوس د وطنوالو د ناموس، مال او ځان د ساتلو مسؤل دي. مګر د زړونو مشروعیت دوی نهده ګټلی."
ښاغلي غني ویلي، طالبان اوس له یوه نوي تاریخي ازمیښت سره مخامخ دي چې په خبرهیې یا به د افغانستان نوم او عزت ساتي او یا به نورو ځایونو او شبکو ته لومړیتوب ورکوي.
ښاغلي غني نهدي ویلي چې کوم هېواد ته تللی دی، خو ځینو ناتأیید شویو راپورونو کې ویل شوي چې نوموړی لومړی تاجکستان او بیا عمان ته تللی دی.
محمد اشرف غني په ښکاره د خپلې استعفا په اړه څه نهدي ویلي، خو د پيغام په پای کې یې لیکلي "زه به همېش د خپل ولس خدمت ته له فکري لحاظه او د برنامو د مطرح کولو له لارې دوام ورکړم".
له افغانستانه د محمد اشرف غني وتلو چې له نږدې ۷ کالو راهیسې د واګ پر ږدۍ ناست و، غبرګونونه پارولي دي.
د ښاغلي غني د حکومت شریک او د مصالحې عالي شورا مشر عبدالله عبدالله هغه ته د "مخکېني ولسمشر" خطاب کړی دی.
ښاغلي عبدالله ویلي: "اوسنیو شرایطو کې یوازنی شی چې له تاسو یې غواړم هغه دا ده چې د الله په مرسته خپله ارامتیا وساتئ، له دفاعي او امنیتي ځواکونو غواړم چې د امنیت په ټینګښت کې مرسته وکړي. دا چې مخکېني ولسمشر افغانستان پرېښود او خلک او هېواد یې له داسې یوه حالت سره مخامخ کړل الله به ورسره محاسبه کوي او د افغانستان خلک به هم خپل قضاوت وکړي."
طالبان پرون د ورځې په ترڅ کې کابل ته راغلل او ماښام مهال ځینو رسنیو له هغې ډلې الجزیزې ټلوېزیون داسې وېډیویي راپور خپور کړ چې ښيي وسلهوال طالبان ارګ ته ننوتلي دي.
د طالبانو د تحریک مرستیال او د سیاسي دفتر مشر ملا عبدالغني برادر هم بېګا ناوخته پر خپلو وسلهوالو غږ وکړ چې دامتحان وختیې رارسېدلی او باید د خلکو خدمت او امنیت ته ورودانګي.
اوس اصلي پوښتنه دا ده چې کابل ته د طالبانو له ننوتو وروسته به سیاسي ګامونه څه وي او د واک انتقال به څه ډول ترسره کېږي.
پخواني ولسمشر حامد کرزي تر یوه بریده دا پوښتنې ځواب کړي او ویلي یې دي چې د واک د سولهییز انتقال او ګډوډیو د مخنیوي لپاره د همغږۍ درې کسیزه شورا جوړه شوې.
دې شورا کې خپله حامد کرزی، د مصالحې عالي شورا مشر عبدالله عبدالله او د حزب اسلامي مشر ګلبدین حکمتیار غړیتوب لري.
حامد کرزي تېر ماښام پر خپله فېسبوک پاڼه ولیکل چې دا شورا له افغان ځواکونو او د طالبانو د تحریک له ځواکونو غواړي چې د جګړو، ګډوډیو او د غیر مسؤله کسانو د تحرکاتو مخنیوی وکړي.
طالبانو هغه راپورونه هم رد کړل چې ګواکې د دوی د تحریک مرستیال ملا عبدالغني برادر دې پرون کابل ته رسېدلی وي.