نن د امریکا ولسمشرۍ انتخابات ترسره کېږي
د امریکا د ولسمشرۍ د دوو کاندیدانو ترمنځ د ټاکونکې سیالۍ ورځ. دواړه پر یو بل له میاشتو میاشتو نیوکو وروسته نن د مبارزې اصلي ډګر ته ځي.
د کرونا د وبا سربېره به میلونونه امریکایان رایې ورکړي چې په پایله کې بهیې د راتلونکو څلورو کلونو لپاره د امریکا مشرتابه وټاکي.
رسنۍ وايي چې د ډیموکراټ ګوند کاندید جوبایډن او مرستیالهیې کامالا هارس به نن له خپلو ژوند شریکو سره په پنسلوانیا کې رایې ورکړي.
ولسمشر ټرمپ تېره شنبې په فلوریډا کې رایه ورکړې وه.
د امریکا د ولسمشرۍ په انتخاباتو کې د دې هېواد ایالتونه په درې ګټګوریو وېشل کېږي، سره رنګي د جمهوري غوښتونکو ملاتړي، ابي د ډیموکراتانو ملاتړي او زیړ ټال وهونکي یا بدلېدونکي ایالتونه وي. همدا زیړ بدلېدونکي ایالتونه ډېر کله د امریکا د ولسمشر برخلیک ټاکي.
سږ کال فلوریدا، میشیګان، اوهایو، جورجیا او ارېزونا د تکزاس ترڅنګ د ګټونکي کاندید لپاره برخلیک ټاکونکي دي.
د امریکا د ولسمشرۍ په سږنیو انتخاباتو کې شااوخوا ۲۴۰ میلیونه وګړي د رای ورکولو په شرایطو برابر دي. امریکايي رسنیو راپور ورکړی چې له دوی څخه به په سلو کې ۶۵ په انتخاباتو کې ګډون وکړي.
د دوشنبې تر ورځې پورې نږدې ۹۷ میلیونه امریکایانو د خپلې خوښې کاندید ته تر وخت مخکې رایې ورکړې وې. دا شمېر د ۲۰۱۶ م کال په انتخاباتو کې د ټولو رأی ورکوونکو له درې برخو څخه د دوو برابر دی.
په عمومي توګه هغې انتخاباتو کې ۱۳۵ میلیونه وګړو رایې ورکړې وې.
د امریکا غږ د راپور په اساس په رأی ورکوونکو کې یوازې ۱۵ میلیونه هغه کسان شامل دي چې دې تېرو ۴ کلونو په موده کې ۱۸ کلن شوي او د رأی ورکولو په شرایطو برابر شوي دي.
په امریکا کې د ۱۹۹۴ م کال راهیسې تر اوسه د امریکا ولسمشران پرلهپسې دوه دورې په واک کې پاتې شوي دي. یوازې د جورج ډبیلو بوش پلار جورج اېچ ډبیلو بوش د ۱۹۹۴ م کال په انتخاباتو کې د څلور کلنې دورې له پوره کولو وروسته د بېل کلېنټن په وړاندې ماتې وخوړه.
اوس معتبرې امریکايي رسنۍ د ولسمشر ټرمپ د محبوبیت د کمېدو خبر ورکوي. دې رسنیو په ۲۰۱۶ م کال کې وړاندوینه کړې وه چې د هېلري کلېنټن ملاتړ تر ټرمپ زیات دی، خو په انتخاباتو کې کلېنټن ماتې وخوړه.
نن د ولسمشرۍ له انتخاباتو سره په یو وخت امریکا د دې هېواد د سنا غړو ته هم رایې ورکوي چې د شپږ راتلونکو کلونو لپاره ټاکل کېږي.
امریکایان د رایو د صندوقونو په لور روان شوي. دې انتخاباتو ته په څو لسیزو کې د مهمو ټاکنو په سترګه کتل شوي دي.
دواړه کاندیدان، ولسمشر ډونالد ټرمپ او پخوانی مرستیال ولسمشر جوبایدڼ سره ډېر بېل نظرونه لري او کرونا وبا هم په متحده ایالاتو کې خپره ده.
د اټکلونو له مخې دا ځل به د تېرو انتخاباتو په پرتله چې ۵۵ په ۱۰۰ کې د رایو په شرایطو برابرو خپلې رایې وکارولې، ډېر کسان رایې ورکړي.
په امریکا کې د ملي دفاع پوهنتون استاد علي احمد جلالي وایي چې دا ځل دا انتخابات په خاصو شرایطو کې ترسره کېږي.
ښاغلی جلالي زیاتوي: "یو دا چې کرونا وبا د ژوند پر هر اړخ اثر کړی دی، بل اقتصاد تهیې لږ صدمه رسولې ده، بل په امریکا کې خلک ډېر سره وېشل شوي دي."
تر اوسه ۹۷ میلیونه کسانو د اېمېل او پوستې له لارې خپله رایه کارولې ده.