د افغانستان د ازادو او عادلانه انتخاباتو یا فیفا اجرائیوي رئیس وايي په کابل او بدخشان کې د غیر مسؤلو وسله والو لخوا یو شمېر خلک په زور مجبور شوي چې د دوی د خوښې کاندید ته رایې ورکړي.
یوسف رشید دغه څرګندونې نن سهار ازادي راډیو ته وکړې.
ښاغلي رشید پر وخت د رایو ورکولو د مرکزونو نه خلاصېدل او په انتخاباتي سیایټونو کې د کافي کارمندانو نشتوالی هم د اندېښنې په توګه یاد کړل.
نوموړي له اړوندو ارګانونو وغوښتل چې دغه ستونزو ته رسیدګي وکړي.
د هلمند له ولایته راپورونه وايي چې په دې ولایت کې که څه هم رأیه اچونه د یو ساعت په توپیر په ځنډ پیل شوې ده خو د دې ولایت خلک په ډېرې علاقه مندۍ په رایه اچونې کې برخه اخلي.
په هلمند کې د ازادي راډيو خبریال وايي چې که څه هم سهار مهال د دې ولایت د مرکز لښکرګاه هوايي ډګر ته څېرمه یو توغندی هم ولګېده خو په رأیه اچونه کې يې د خلکو په ګډون تاثیر ونه کړ.
د دغه ولایت امنیه قوماندان عبدالرازق یعقوبي په سیمه کې د ازادي راډيو ته ویلي چې دغلته یوازې د رأيې اچونې ۸ مرکزونه تر امنیتي تهدید لاندې دي خو خلکو ته يې ډاډ ورکړی چې په رأیه اچونه کې برخه واخلي او دوی به د خلکو د امنیت ساتنه وکړي.
د پروان په مرکز چاریکار قلعه زايي سیمه کې چاودنه شوې خو په اړه يې نور معلومات نه دي ورکړل شوي.
په پروان ولایت کې د ازادي راډيو خبریال وايي چې پېښه څو شېبې وړاندې د رایه اچونې د یو مرکز سره نږدې شوې ده.
ویل کېږي چې په دغه ولایت کې د رایه اچونې یو شمېر مرکزونه په ځنډ خلاص شوي دي خو په ټوله کې دغلته خلک په علاقه مندۍ په رایه اچونه کې برخه اخلي.
