په افغانستان کې د ولسي جرګې د پرونيو انتخاباتو په دوام نن د ٢٢ ولايتونو په څه باندې ٢٥٠ مرکزونو کې رايه اچونه روانه ده.
دا هغه مرکزونه دي چې خلک نه وو توانېدلي د ولسي جرګې په پرونيو انتخاباتو کې رأيه ورکړي.
د ټاکنو خپلواک کمېسيون وياند سيد حفيظ الله هاشمي نن ازادي راډيو ته وويل:
"زه هيله مند يم چې نن تر پايه پورې هغه کسان چې پرون په ټاکنو کې له ګډونه بې برخې پاتې وو، وکړاى شي خپلې رأيې وکاروي."
د ټاکنو خپلواک کمېسيون وايي، پرون خلکو د ولسي جرګې د انتخاباتو لپاره په ٤٥٠٠ مرکزونو کې رأی ورکړي.
د ټاکنو د خپلواک کمېسیون مشر ګلاجان عبدالبدیع صیاد ازادي راډيو ته وويل، دوى اټکل کوي، ښايي تر پنځو میليونو پورې کسانو په انتخاباتو کې خپلې رأی کارولي وي.
د لغمان په مرکزي روښان عالي لېسه کې د رأی اچوونکو اوږد کتار
سید قدیر شاه ازادي راډیو ته د انتخاباتي بهیر ویډیو لېږلې خو نوموړي د خپل ځای په اړه څه نه دي ویلي.
په ننګرهار ولایت کې د امنیتي ستونزو له امله د رای ورکولو بهبر بند شو.
د دغه ولایت په یو شمېر ولسوالیو کې چې د تخینکي او امنیتي ستونزو له امله ټاکل شوې وه نن یکشنبه هم رایې ورکړل شي، د امنیتي ستونزو له امله دغه بهیر بند شوی دی.
د ننګرهار د انتخاباتو د کمېسیون رئیس ډاکټر احمد داود صدیق زاد ازاي راډیو ته وویل چې د دغه ولایت په شپږو ولسوالیو کې ۱۴ مرکزونه د امنیتي ګواښونو له امله بند شوي دي.
دغه مرکزونه په خوګیاڼو، لعلپوري، نازیان، سپین غر، بټي کوټ او شینوارو ولسوالیو کې دي.
د ننګرهار ولایتي چارواکي هم مني چې د امنیتي ګواښونو له امله یې دغه مرکزونه بند کړي دي.