په عربي متحده اماراتو کې د کرکټ د اسیايي جام په روانو سیالیو کې نن هندوستان او پاکستان سره مخ کېږي.
دواړه ټیمونه په اې ګروپ کې تر اوسه د هانګ کانګ په وړاندې برلاسي شوي دي.
تمه کېږي چې د پاکستان صدراعظم او د دې هېواد پخوانی کرکټر، عمران خان به هم په دوبۍ کې د دې لوبې نندارې ته ورشي.
که څه هم پاکستان او هندوستان دواړو د دې جام نیمه پایلوبې ته لاره موندلې ده، خو نننۍ لوبه به د «A» ګروپ کې مخکښ ټیم وټاکي.
هانګ کانګ پرون له هندوستان څخه له ماتې خوړولو وروسته له دې ګروپ ووت.
د اسیايي جام په «B» ګروپ کې بیا افغانستان او بنګلهدېش سره د پنجشنبې په ورځ مخ کېږي.
دې دواړو ټیمونو هم سرېلانکا ته په ماتې ورکولو نیمه پایلوبې ته لاره موندلې ده.