د لوګر د کرنې ریاست چارواکي وايي چې دوی په یاد ولایت کې د بې وزلو ښځو او غریبو کورنیو د اقتصادي ستونزو د کمولو په هدف هغوی ته د شاتو مچۍ او د دې کاروبار وسایل او توکې ورکوي.
چارواکو یادې څرګندونې د شنبې په ورځ د لوګر په محمداغې ولسوالۍ کې لسګونو بې وزلو مېرمنو او کورنیو ته د شاتو د مچېو د وېش په ځای کې وکړې.
د چارواکو په وینا چې دا مهال په لوګر کې خواوشا لس زره کورنۍ د شاتو د مچېو د پاللو پر کاروبار بوختې دي.
د لوګر د کرنې رئيس محمد دین مومند ازادي راډيو ته وویل چې دوی دا پروګرام په امتحاني ډول د محمداغې ولسوالۍ راپیل کړ او وروسته به يې د لوګر مرکز او نورو ولسوالیو ته هم وغځوي.
د ده په وینا چې دا پروګرام د کرنې وزارت د کورني اقتصاد د برنامې په چوکاټ کې پلی کېږي او د شاتو د مچېو او صندوقونو تر څنګ ګټه اخېستونکو ته ۹ قلمه نور توکي هم چې دې کاروبار لپاره ورته اړتیا ده، ورکول کېږي.
محمد دین مومند زیاته کړه:
"موږ نن ورځ د لوګر د محمداغې په ولسوالۍ کې لسګونو بې وزلو ښځو او کورنیو ته د شاتو مچۍ وویشلي ، هر فامیل ته مو دوه صندوقه د شاتو مچۍ او دوه خالي صندوقونه ورکړل، د دې لپاره چې دا تکثیر کړي او همدارنګه نهه قلمه نور ضروري مواد، بوره ده او نور مو مستفدینو ته وویشل شول. "
د دې کسب کاروباریان وايي چې د مچېو پر کاروبار لږ لګښت کېږي، خو ګټه يې کورنیو ته ډېره ده.
د شاتو د مچېو د یو شرکت مشر محمدعمر وايي، که یوه کورنۍ له شلو تر ۲۵ صندوقو پورې مچۍ ولري، نو د ټولې کورنۍ اقتصادي مشکلات يې پرې حلېږي.
دی په ټوله کې د شاتو لپاره بازار موندنه یوه مهمه ستونزه یادوي او زیاتوي چې ډېری حکومتي ادارې او موسسې بهرني مالونه خوښوي چې دا کار بیا کاروباریانو او د دې هېواد داخلي تولیداتو ته زیان رسوي.
مدنې فعال مطیع الله سرور وايي چې د لوګر اب او هوا د شاتو د مچېو د پاللو لپاره مناسبه ده، خو د کرنې ریاست ورته پوره پاملرنه نهده کړې او دا کاروبار په معیاري ډول نهدی برابر شوی.
دی زیاتوي که فارم لرونکو لپاره بازار موندنه وشي او نورې لازمې اسانتیاوې ورته برابرې شي، نو دا کار وبار به چټکۍ وده کولی شي.
د لوګر د کرنې ریاست د مچېو د برخې مسوول محمدناصر وايي چې یاد ولایت د شاتو د مچېو د پاللو لپاره مناسبه اب و هوا لري او دلته د کال په هر موسم کې مچېو لپاره بېلابېل صحرايي او اصلاح شوي ګلونه پیدا کېږي.
د ده په وینا چې په لوګر کې دا مهال خواوشا لس زره کورنۍ د شاتو د مچېو د پاللو کاروبار لري.
راپور: نجیب الله الوخېل- لوګر