پهداسې حال کې چې د طالبانو ځینو سیمهییزو قوماندانانو یو وار بیا اوربند ته لېوالتیا ښکاره کړې، د سولې عالي شورا وايي له حکومت او طالبانو غواړي چې دایمي اوربند وکړي.
د سولې عالي شورا ویاند احسان طاهري وویل، د سولې عالي شورا د دواړو خواو ترمنځ اوربند ته فضا برابروي او تمه لري چې دواړه خواوې به اوربند وکړي ځکه چې دا د درست افغانستان د خلکو غوښتنه ده.
د وسلهوالو طالبانو قاضيالقضات مولوي عبدالحکیم په یوه خبرپاڼه کې د اختر په شپو ورځو کې اوربند ته د خپلې ډلې لېوالتیا ښودلې ده.
په هرات کې د ازادي راډیو خبریال چې دا خبرپاڼهیې ترلاسه کړې، وايي چې اوربند ته د طالبانو لېوالتیا د هرات د چارواکو له هرکلي سره مخامخ شوې ده.
د طالبانو د قاضيالقضات اعلامیه په بغلان کې هم د خلکو لاس ته رسېدلې او په هغې کې د طالبانو مشرتابه ته په خطاب کې راغلي چې په هغو خبرو کې ګډون وکړي چې د واقعي سولې او د عام ولس د خوشحالۍ سبب کېږي او په عین حال کې په افغانستان کې دننه د ولس له رښتینو استازو، مخورو او بېطرفه عالمانو سره خبرې وکړي.
د افغانستان د سولې عالي شورا ویاند هم هیله څرګندوي چې طالبان به د ده په وینا د افغانستان د خلکو غوښتنې او د اسلامي نړۍ د دیني عالمانو فتوا ته په درناوي سوله وکړي.
پرون په خوست کې یو شمېر قومي مشرانو، دیني عالمانو او د مدني ټولنو غړو له حکومت او طالبانو وغوښتل چې اوربند وکړي او د سولې لپاره مخامخ خبرو ته کېني.
