د کندهار د دیني عالمانو د اصلاحي شورا مشر او د کندهار اوسيدونکي وایي، د روژې د مياشتې په مناسبت دوی له وسلهوالو غواړي چې له جګړې او وسلهوال مخالفت څخه لاس واخلي.
د کندهار ښار اوسېدونکي وايي، حکومت او وسلهوال مخالفین باید د روژې په میاشت کې د جنګ پرځای سوله وکړي.
کندهار ښاریان وايي، نور له جنګه ستړي دي او د حکومت له ټولو وسلهوالو مخالفینو يې دا غوښتنه ده چې د روژې په مبارکه میاشت کې وسلې پر ځمکه کېږدي او د سولې او پخلاینې لار غوره کړي.
دوی وايي، روژه د برکت او رحمتونو میاشت ده او په دغه میاشت کې ټول مسلمانان باید پهخپلو زړونو کې د کرکې او بدبینۍ پرځای مینې او ورورولۍ ته ځای ورکړي.
د کندهار د ښار یو اوسیدونکی سیف الله یې په اړه وايي:
"د وسلهوالو مخالفینو څخه دا غوښتنه لرو چې د روژې په مبارکه میاشت کې له جګړې لاس واخلي او سوله وکړي."
په ورته وخت کې د کندهار د عالمانو د اصلاحي شورا مشر مولوي عبيدالله فیضاني هم د روژې په میاشت کې تاوتريخوالي يو ناخوښه عمل بولي او له وسلهوالو غواړي چې پهدې مياشت کې له هر راز مخالفته لاس واخلي.
دی وايي:
"د روژې په میاشت کې هر مسلمان مکلف دی، لکه څنګه چې د خوراک او څښاک څخه پرهیز کوي، همداسې د قتل او هر ډول ناوړه عمل څخه پرهیز وکړي، زما غوښتنه د دولت او وسلهوالو مخالفینو څخه دا ده چې پهدې مبارکه میاشت کې سره کیني او سوله وکړي."
بلخوا د کندهار د سولې د ولایتي کمېټې د دارالنشا رئیس محمد عمر ساطع هم وایي، که سوله وشي هېواد به د ترقۍ لور ته روان شي او وسلهوال به هم عادي ژوند پېل کړي.
د یادونې وړ ده چې هر اختر، روژه او د نوي کال په پیل کې افغانان په جنګ کې له ښکېلو غاړو د جګړې د بندېدو غوښتنه کوي، خو هېڅکله هم د دوی غږ نهدی اورېدل شوی او نه هم د ټوپکو خولې ستړې شوې دي.
راپور : صادق رښتینی