د کابل چاپ ورځپاڼو د نننیو ګڼو مهم سرلیکونه تر ډېره د ازبکستان په پلازمېنه تاشکند کې د افغانستان د سولې او د ترهګرۍ په وړاندې د مبارزې لهپاره نړیوالې غونډې ته ځانګړې شوې دي.
- ملي ارمان
ملي ارمان ورځپاڼې د تاشکند د نړیوال کنفرانس په اړه د اروپایي ټولنې نظر راخیستی دی او لیکلي یې دي چې د سولې په اړه دا نړیوال کنفرانس د افغانستان لهپاره مهم دی.
ورځپاڼې لیکلي دي چې دا نړیوال کنفرانس پرون پیل شوی چې نن هم دوام کوي او افغان ولسمشر اشرف غني چې پرون تاشکند ته رسېدلی دی، د ملګرو ملتونو له لوی منشي، د اروپایي ټولنې د بهرني سیاست له مشر سره یوځای په دې کنفرانس کې ګډون کوي.
ورځپاڼې وړاندې د دې غونډې په اړه د اجرائیه رئیس عبدالله عبدالله څرګندونې راخیستي او لیکلي دي چې ښاغلي عبدالله هیله څرګنده کړه چې د کابل پروسې د دوهمې ناستې په تعقیب دا نړیواله غونډه هم په افغانستان کې د سولې او ثبات د ټینګښت په برخه کې مرسته وکړي.
ورځپاڼې په کابل کې د اروپایي ټولنې د سفیر څرګندونې هم راخیستې دي او د ده په حوالهیې لیکلي دي چې طالبان باید د افغان حکومت د سولې طرحه ومني.
- ویسا
خو ویسا ورځپاڼې بیا د تاشکند غونډې په اړه د ولسي جرګې د غړو نظرونه راخیستي دي چې تر ډېره د سولې روانو هلو ځلو ته خوشبینه نهدي.
ورځپاڼې د ملا منصور د وژلو په اړه د نویو حقایقو رابرسېره کېدو ته په اشارې لیکلي دي چې خپاره شوي ټول شواهد دا ښیي چې ملا منصور د جګړې پر ځای د سولې او تفاهم غوښتونکی و، حال دا چې د ورځپاڼې په وینا نوموړی پهدې نامه ووژل شو چې د سولې مخالف و.
ورځپاڼې وړاندې پر طالبانو د سولې لهپاره موجوده فشارونو ته په اشارې لیکلي دي چې دا فشارونه د دې لهپاره دي چې اصلاً د جګړې جغرافیه او شعار د بدلېدو په حال کې دی.
ورځپاڼې د خپل بحث په پای کې لیکلي دي، که دا هڅې بریالۍ هم شي، نو هېڅکله په افغانستان کې د جګړې د ختمېدو او سولې د ټینګښت په معنی نهده.
- هېواد
خو هېواد دولتي ورځپاڼې بیا د تاشکند غونډه د افغان سولې لهپاره مهمه بللې او لیکلي یې دي چې پهدې نړیواله غونډه کې به د کابل پروسې د دوهمې غونډې نتایج هم وارزول شي.
ورځپاڼې لیکلي دي چې افغان حکومت هڅه کوي چې پهدې غونډه کې په افغانستان کې د سولې د هڅو په اړه یوه سیمهییزه اجماع رامنځته کړي.
ورځپاڼې د تاشکند غونډې په اړه په خپله تبصره کې د سولې د هڅو او ترهګرۍ پر ضد د مبارزې په وړاندې پر موجوده ستونزو هم بحث کړی دی.
ورځپاڼه لیکي:
پهدې غونډه کې باید سپینې خبرې وشي چې څوک ترهګر افغانستان ته راستوي او د جګړې اور ته لمن وهي او د دې تر څنګ طالبان ولې د پاکستان برمته دي او نهشي کولای د سولې لهپاره زړه ښه کړي.
ورځپاڼه لیکي چې د پاکستان تر څنګ اوس پر ایران او روسیې هم دا تور پورې کېږي چې د داعش په پلمه د طالبانو ملاتړ کوي او هغوی ته وسلې او نورې پوځي مرستې ورکوي.
- دنیا
دنیا ورځپاڼې هم د تاشکند غونډې په اړه د ولسي جرګې د ځینو غړو نظرونه راخیستي دي او لیکلي دي، پهداسې حال کې چې په تاشکند کې د سولې مقدماتي غونډه پرانیستل شوې ده، د ولسي جرګې ځیني غړي وایي چې د کورنۍ اجماع پرته د نړیوالې اجماع رامنځته کول ستونزه نههواروي.
ورځپاڼې بیا په خپله سرلیکنه کې لیکلي دي چې که حکومت لومړی د کورنیو ستونزو د حل لهپاره یوې هوکړې ته رسیدلای وی، نو د تاشکند په څېر د غونډو پایلې به زیاتې ګټورې وی.
خو دې ورځپاڼې هم په خپله تبصره کې سپارښتنه کړې ده چې د تاشکند په غونډه کې باید سپینې خبرې وشي چې په سیمه کې د ترهګرۍ ملاتړي هېوادونه کوم دي.
ورځپاڼې دا هم لیکلي دي چې لومړی باید په افغانستان کې سوله رامنځته شي او بیا د سیمهییزې همکارۍ په اړه خبرې وشي.
- انیس
انیس دولتي ورځپاڼې هم لیکلي دي چې په افغانستان کې د سولې لهپاره روانې هڅې د سیمې د ټولو هېوادونو په ګټه دي او دا باور یې څرګند کړی دی چې د کابل پروسې د دوهمې ناستې د ملاتړ کوونکو د ښه نیت له کبله د تاشکند غونډه به د سولې د پلوي ځواکونو په شمېر کې زیاتوالی راولي.
ورځپاڼې دا هم لیکلي دي، که رښتیني او عملي ګامونه واخیستل شي، د جګړې تور ټغر به ټول او د سولې لهپاره د افغانانو هیلې به وغوړېږي.