- واشنګټن پوسټ
واشنګټن پوسټ ورځپاڼې په خپلې تازه ګڼې کې د «ماروین وین باوم» په نوم د یو لیکوال لنډه تبصره خپره کړې چې سرلیک یې دی «که امریکا له افغانستان څخه سرتېري وباسي، دا هېواد به بیا د ګډوډۍ ډګر شي.»
دا تبصره د ریچارډ کوهین د هغه لیکنې په ځواب کې ده چې ویلي و «له افغانستانه د امریکايي سرتېرو د وتلو وخت رارسیدلی دی.»
د واشنګټن پوسټ د دې تبصرې لیکوال وايي، که امریکايي پوځیان له افغانستانه ووځي، نو افغان حکومت به ډېر ژر سقوط وکړي.
د لیکوال په وینا دا ځل به نتیجه د ۱۹۹۰ میلادي کال څخه ډېر توپیر ولري.
د لیکوال په وینا دا به د ویتنام څخه د امریکا د وتلو په څېر یو څه نهوي چې ریچارډ کوهین یې یادونه کړې، بلکې داسې به وي لکه امریکا چې په افغانستان کې په لوی لاس یو اوږده او خونړي کورني جنګ ته شرایط برابر کړي وي.
د لیکوال په وینا له افغانستان تر وخت مخکې د امریکايي سرتېرو د وتلو په صورت کې به طالبان، داعش وسلهواله ډله، القاعده او افغان جنګسالاران د خپلو قومي ملېشو په ملتیا د یو بل سره د واک او شتمنیو پر سر ونښلي.
د سیمې هېوادونو لکه ایران، پاکستان، روسیې او هندوستان لاسوهنې او نیابتي ډلې به د افغانستان د دې کورنۍ جګړې لمبې لا تودې وساتي او په میلیونونو افغانان به له خپل هېواده کډه کېدو ته اړ شي.
که امریکا له افغانستان څخه سرتېري وباسي، دا هېواد به بیا د ګډوډۍ ډګر شي.
لیکوال د لیکنې په پای کې سپارښتنه کوي او وايي، له جګړې زموږ د درک وړ ستړیا باید پر موږ «امریکایانو» داسې سترګې پټې نهکړي چې په ډېره خوارۍ د جوړ شوي افغان دولت، سقوط ومنو.
- سټارز اېنډ سټرایپس
سټارز اېنډ سټرایپس ورځپاڼې چې په نظامې مسئلو لیکنې خپروي، په خپلې تازه ګڼې کې د کابل د جمعې د ورځې د هغې چاودنې په اړه لیکنه کړې چې د سړک د غاړې یو پلورونکی ماشوم یې وواژه او تر ۲۲ زیات نور کسان یې ټپیان کړل.
ورځپاڼه وايي، د جمعې په ورځ په لومړنیو راپورونو کې ویل شوي چې په دې چاودنه کې چې د استرالیا د سفارت د موټرو یو کاروان یې هدف و، بهرنیان نهدي ټپیان شوي، خو اوس د اسټرالیا د بهرنیو چارو وزیرې جولې بیشپ ویلي چې د کابل په دې چاودنه کې د دې هېواد دوه قراردادیان سرسري ټپیان شوي دي.
نوموړې ویلي چې د استرالیا د سفارت نورو کارکوونکو ته زیان نهدی رسیدلی.
د اسټرالیا د بهرنیو چارو وزیرې په یو خپاره کړي بیان کې د کابل په دې چاودنه کې د وژل شویو او ټپیانو له کورنیو سره خواخوږي ښودلې ده.
سټارز اېنډ سټرایپس وايي، په کابل په وروستیو میاشتو کې دا ډول څو نورو مرګونو چاودنو او بریدونو مسؤلیت وسلهوالو طالبانو او داعش ډلې منلی چې په کې ولسي خلکو ته درنه مرګ ژوبله اوښتې ده.