د کندز ولایت د خاناباد ولسوالۍ اوسېدونکي وايي چې د غیر مسؤلو وسلهوالو تر منځ په خپلمنځې جګړه کې ۱۷ تنو ملکي وکړو ته مرګ ژوبله اوښتې ده.
د خاناباد ولسوالۍ خلک وايي چې د خپلسرو وسلهوالو له خپلسریو او بېځایه ځورونو څخه پوزې ته راغلي یوو.
د خاناباد ولسوالي د کندز ښار ختیځ لورې ته په ۲۰ کېلومټرۍ کې موقعیت لري او د دې ولسوالۍ ډېر خلک پر زراعت او مالدارۍ بوخت دي.
د خاناباد ولسوالۍ خلک شکایت کوي چې تېره ورځ د دې ولسوالۍ په ښار کې د دوو ډلو خپلسرو وسلهوالو تر منځ جګړه کې ۲ دوه تنه ملکي وګړي وژل شوي او ۱۵ نور ملکیان ټپیان شوي چې په دې شمېر کې ښځې، کوچنیان او ځوانان شامل دي.
د دغې ولسوالۍ خلک وايي چې دوی په وار وار مرکزي حکومت ته خپلې ستونزې رسولي، څو په خاناباد کې غیر مسؤل وسلهوال خالي سلاح کړي، خو تر اوسه پورې د دغو خپلسرو وسلهوالو د مخنیوي په برخه کې کوم عملي اقدام نهدی شوی.
د خاناباد ولسوالۍ دوو تنو اوسېدونکو په دې اړه ازادي راډیو ته وویل:
"زما نوم الله نور دی، خلک د دغو غیرمسؤل وسلهوالو له ظلم او بې بندو باریو په تنګ شوي، هره ورځ د دوی تر منځ جګړه وي، تېره ورځ هم د خپلسرو وسلهوالو تر منځ جګړه وشوه چې له کبله یې یو توغندی په بازار کې ولېګد او ډېر کسان پهکې ټپیان شول، دولت باید د دغو غیر مسؤله وسلهوالو مخه ونیسي."
"غلام حضرت یم، زه د دغې جګړې متضرر یم، تر اوسه پورې مو په دې جګړه کې دوه نفره مړه دي،۱۵ نفر ټپیان شوي هم دي، ټول خلک او کورنه د تهدید لاندې دي، خو د حکومت له دننه د دغو ټوپکیان ملاټر کېږي او دغه ټوپکیان په سیمه کې پر خلکو هر ډول ظلم او زیاتی کوي، موږ له مرکزي حکومت څخه غواړو چې دغه خپلسرې وسلهوالې ډلې ژر تر ژره خالي سلاح کړي."
په ورته وخت کې د دې ولسوالۍ یو بل تن اوسېدونکی بیا وايي چې ډېری خلک د غیرمسؤله وسلهوالو د ظلم او بېځایه ځورونې له کبله دې ته اړ شول، څو د دغو خپلسرو وسلهوالو د ظلم څخه د خلاصون په خاطر په خپلو سیمو کې له وسلهوالو مخالفینو څخه ملاټر اعلان کړي.
ده زیاته کړه:
"دغه پخواني ټوپکیان، قاتلان او جنایتکاران یو ځل بیا مسلح شوي او په سیمه کې خلک په بېلابېلو پلمو ځوروي، همدارنګه په خپلمنځ کې جنګېږي، خو د دوی د جګړو ډېر زیان ملکي خلکو ته رسېږي."
بلخوا د خاناباد ولسوال حیاتالله امیري هم د خلکو دغه څرګندونې مني او وايي، دوی د دغو خپلسرو وسلهوالو د خالي سلاح کولو په اړه د مرکزي حکومت له جګ پوړو چارواکو سره، همدارنګه د کندز له سیمهییزې ادارې سره خبرې کړې دي.
ښاغلي امیري وویل:
"موږ له ولایت سره دغه موضوع شریکه کړې، همدارنګه له وکیلانو سره مو هم شریکه کړې، څو د خاناباد مظلوم ولس غږ لوړ پوړو چارواکو ته ورسوي چې په دې اړه یو منظم پلان ونیسې، دغه کوم مسلح کسان چې په واقعیت له دولت سره همکاره دي، هغوې باید د قانون په چوکاټ کې ځای پر ځای شي او هغه مسلح کسان چې خلکو ته او دولت ته ستونزې جوړوي، باید مرکزي دولت ورته یو پلان ونیسې او خلک د دغو ټوپکیانو له شره خلاص کړي."
ښاغلي امیري پر مرکزي حکومت غږ کوي چې دغې ولسوالۍ ته جدې پاملرنه وکړي او ځانګړي ځواکونه راولېږي، څو په خاناباد کې ټول خپلسري وسلهوال خالي سلاح کړي.
د یادونې وړ ده چې د ولسمشريزو ټاکنو پر مهال د ملي یوالي حکومت مشرانو د کندز خلکو سره ژمنې کړې وې چې د بریا په صورت کې به دوی په لومړي قدم کې د دې ولایت په کچه غیر مسؤل وسلهوال خالي سلاح کړي، خو تر اوسه پورې د ملي یوالي حکومت مشرانو په دې اړه کوم جدې غبرګون نهدی ښودلی.
راپور: اجمل ارین